Read Nguna Togoa Etafe North ISA 5 Bible Online

ISA 5 - Nguna Togoa Etafe North bible

ISA 5

¹Kuga rogo nalegaana waina aga magi tagu ri lega asa, nalegaana aneana nalo ni roara ni vaine aneana. Tagu ri wanogoe e pei talakea ni roara ni vaine sikai tava m̃anopunopu wia liu sikai:

²Go e marigoro e ki nakoro ulua sikai, po mari pakasa ki nia, po lawo e ki vaine wialua maga; e davagi nasum̃a varau pakilagi m̃aleoputo kakana, go e moro kili m̃oru ni navasokiana ni nawa ni vaine asa: go e leogoro naga ega tau ki nawa gagadi, ma e dau ki nawa kokona.

³Go ragi waia, nimu naatatoko maga ni Yerusalem, go naatam̃oli maga ni Yudah O, kuga vasap̃otae namawota kakagu go ni roara ni vaine aginau, a pavara ni mu asa.

⁴A pe moro mariatae mari nasava roara ni vaine aginau, waina a ko da mari a asa mau? Ekasana e pitua ki nawa kokona, ragi waina a leogoro naga ega vitua ki nawa gagadi?

⁵Ita; aga wo noakisai mu tea waina aga wo mari a paki roara ni vaine aginau: aga wo dape lua nakoro ni nakau ulua kakana, go ega wo pei tea kani‐dinomiana; aga wo dakai p̃aaka kakana, go ega wo pei tea vasi‐puludoaana:

⁶Aga wo doropusi a ega vei maso maladi doko; ega wo da pei tea tagaupakasakiana kite sove‐pakasakiana mau; ma tea vivitip̃a maga go tea makalikali maga euga wo p̃otu sake asa: go aga wo dip̃aki napopouru maga naga euga ta moro pue a mau.

⁷Nalakena roara ni vaine ki Yehovah ki taua maga, e pei nasum̃a ni Israel, go naatam̃oli maga ni Yudah eu pei tea lawoana masauniana aneana: go e leogoro naleanaana, ma kuga leo, natakiana ni nada; go namarinaleoleanaana, ma kuga leo, nakuapiosoana sikai.

⁸Ai ki tea maga waina eu do sokari nasum̃a ki nasum̃a, go vanua ki vanua, pa pa namalopa e dika, go eu pei nara mau waina eu pei naatatoko maga ni navanua!

⁹Yehovah ki taua maga e pasa nadaligagu, e naga, Ega vei lomau, nasum̃a laapa, tea warua go tea leom̃atakiana maga, euga wo maladi doko, naatam̃oli ega tika ara.

¹⁰Nalakena roara ni vaine eker rualima sikai ega wo pitua ki bath ega sikai maau, go napati ni korn omer sikai ega wo pitua ki efah ega sikai maau.

¹¹Ai ki tea maga waina eu do duleana malip̃ogi loaloa, naga euga to sava dausi namunuana kasua; waina eu doko asa doko pa pa paki p̃ogi matua, pa pa waine e mari namaetoana adeada e pavaga!

¹²Ai ki da eu do mari katakata ki harp go ki lute, ki tabret go ki lokore, po do munu waine nakaniana adeada maga: ma eu da midoaki tea wosiwosikiana maga ki Yehovah mau, kite punusi nawosiana ni nam̃elearuna maga mau.

¹³Nalakena tea wanogoe narei aginau eu po pei tea viragi‐luapavakotoana, nalakena eu dika naataeana: go naatam̃oli dodomadaganiana adeada maga eu pitolo, go taua adeada eu madou.

¹⁴Nalakena tea wanogoe Sheol e dum̃ana mari namasauana aneana e po p̃elewelea, go nawokana e maga p̃arua: go tea dodomadaganiana maga ni Yerusalem go taua kakana, go navakilagiana kakana, go tea waina e do pakavakae m̃aleoputo kakana, euga wo diro asa.

¹⁵Go naatam̃oli vakitano e po pei tea mariana e pakitano mau, go naatam̃oli vakilagi e po pei tea viragiana pakitano, go namata ni tea mari lagilagi eu po pei tea mariana eu pakitano:

¹⁶Ma Yehovah ki taua maga e pei tea sikeana pakilagi doko naleanaana, go Sup̃e Tea Tapu e dapu doko namarinaleoleanaana.

¹⁷Ragi wanogoe shiip natuna maga euga wo ganikani dapala eu pe toko malo kanikani adeada, go tea m̃anopunopu go naninani natuna maga euga wo ganikani m̃aleoputo ni tea sapuraki one kakana maga.

¹⁸Ai ki tea maga waina eu do dosagi namarinaleotageleana ki natali maga ni nap̃aloana, po do dosagi namarinaleosaana ki tea tapala namea sikai ni kart:

¹⁹Waina eu do naga, Ega mari m̃araverave, ega mari nawosiana aneana ega sava m̃araverave, naga tuga vunusi a: go namidoakip̃otaeana ki Tea Tapu ki Israel ega umai paki m̃aladigi, naga tuga atae a!

²⁰Ai ki tea maga waina eu soso tea sa ki tea wia, go tea wia ki tea sa; waina eu noa naga namaligo e pei namarama, go namarama e pei namaligo; waina eu noa naga tea kokona e pei tea gagadi, go tea gagadi e pei tea kokona!

²¹Ai ki tea maga waina eu dum̃ada mikoaki ki da naga eu manumatua, po dum̃ada pei tea midoaki atae maga namatada!

²²Ai ki tea maga waina eu piviari munu waine, go ki naatam̃oli maga waina eu mari kasua naga euga munu namunuana kasua visarasara:

²³Waina eu do dape ruku naga euga mari leana ki tea sigisigileo, po do dape lua naleanaana m̃elu dua ki tea leana.

²⁴Nalakena tea wanogoe dapala waina mena ni nakapu e do gani nap̃olaga, go dapala waina nam̃enau kokolo e do mavunuvanu ki mena ni nakapu, dapala nogoe nakoada ega wo madada, go napum̃ada ega wo pei tea suipuluakiana pano dakiusi nam̃otam̃ota: nalakena eu dip̃adoa nawotaeana ki Yehovah ki taua maga, po midoaki p̃alo ki navasaana ki Tea Tapu ki Israel.

²⁵Nalakena tea wanogoe namaetoana ki Yehovah e pavaga dip̃a narei aneana, go e sai ki nam̃elearuna dip̃a ra, po atugi ra, go tava maga eu duruuru, go nap̃atoko mate adeada eu dapala nasogosogo m̃aleoputo ni napua maga. Nalakena tea mamau puti wanogoe namaetoana aneana e da liliu mau, ma nam̃elearuna e ko pei tea saikiana doko.

²⁶Go ega wo sike navaivaiana sikai paki nalauna maga ni uvea, go ega wo saveu ki da pae namatap̃ago ni maramana: go kuga leo, euga wo m̃araverave sava umai:

²⁷Euga wo da mawosa kite dapilagona mau; euga wo da maturu kite matamaturu mau; go tea tasoki namaloda ega wo da pei tea veresiana mau, go natali ni nam̃elevasiana adeada maga ega wo da makoto mau:

²⁸Nalua adeada maga eu makali, go naasu adeada maga eu po pei tea vuap̃eluakiana; go horse adeada maga natap̃alasida maga euga wo pei tea midoakiana naga eu dakiusi vatu kasua, go tea taliepu adeada maga dakiusi suitaviro sikai:

²⁹Nauruuruana adeada ega wo dakiusi laion sikai, go euga wo uru dakiusi laion tureai maga: ioro euga wo uru, po katisoki tea kati‐p̃oraeana, po dape a pano, go tea vualua ega wo dika.

³⁰Go naaleatia wanogoe euga wo saruru dip̃a ra, dakiusi nasaruruana ni natasi: go tea sikai e pe leo paki navanua, p̃a leo, namaligo go narogokitesaana, go namarama e pei tea melugoroana ki napopouru maga.