Read Nguna Togoa Etafe North ISA 50 Bible Online

ISA 50 - Nguna Togoa Etafe North bible

ISA 50

¹Yehovah e noa dapala nea, e naga, Tusi ni natoropusiana ki p̃ilamu wai, waina a doropusi a pano? Kite tea vitua ki tea seakiana aginau maga sei kakada waina a sori mu paki asa? Kuga leo, nalakena namarinaleotageleana animu maga ku pei tea soriana, go nalakena natapiriana animu maga p̃ilamu e pei tea toropusiana.

²Ekasana naatam̃oli e dika ragi waina a umai? Ragi waina a pioso ekasana te naata e da pasadara au mau? Narugu e po puru naga a mari sa daulua, kite? Kite namarimatuaana e dika au naga aga vualua, kite? P̃a leo, pae navasakasuaana aginau a mari natasi e pei natano garagara, a mari noaisara maga eu pei masop̃alo sikai: naika kakada maga eu p̃oa, nalakena noai e dika, go eu mate ki namadouana.

³A sugoro nakoroatelagi maga ki namaligo wono, go a mari nakulukulu ni sak e pei tea kovagoro kakada.

⁴Yehovah Sup̃e e dua au namena ni navasapiseikiana naga aga atae takana waina aga vakamauri ki tea waina e mawosa, pae navasaana maga: e pulevule au malip̃ogi pae malip̃ogi, e pulevule nadaligagu naga aga rogo dapala tea maga waina eu do pei tea vasapiseikiana.

⁵Yehovah Sup̃e e dakasai nadaligagu, go a da mari p̃auluulu mau, kite atutaku pano mau.

⁶A pitua ki nam̃adugu paki tea atugi maga, go nap̃orogu maga paki tea maga waina eu paku lua nam̃au ni nasigu: a da dasuru ki naraegu pa dua ki namaliereana go nataniuana mau.

⁷Nalakena Yehovah Sup̃e ega wo silae au; nalakena tea wanogoe aga wo da pinovinoi mau: nalakena tea wanogoe a lawo ki naraegu e kasua dapala vatu totova sikai, go a atae naga aga wo da maliere mau.

⁸Tea waina e mari leana kinau e doko m̃aladigi; sei ega wo mari dip̃a au? Aroga rua lawodu: Sei e pei walu kokona kinau? Ega umai paki m̃aladigi kinau.

⁹P̃a leo, Yehovah Sup̃e ega wo silae au; sei ega wo pasa dip̃akotovi au? P̃a leo, euga wo mamau puti disu duai dapala tea suniana sikai; veko ega wo gani puoli ki da.

¹⁰Sei kakamu waina e matau ki Yehovah, doko do dogo parati ki nadaleo ni tea suasua aneana; waina e do surata namaligo, go e dika namarama? Ega saralomau nagisa ni Yehovah po pavatu Sup̃e aneana.

¹¹Kuga leo, nimu mamau puti waina ku dokoni nakapu sikai, waina ku dum̃amu masi riri ki mu ki riri maga ni nakapu: kuga surata papiliu mena maga ni nakapu animu, go m̃aleoputo ni riri maga ni nakapu waina ku dokoni ra. Tea waia kuga wo dape a ki nam̃elearugu; kuga wo one natano doko narogokitesaana.