Read Nguna Togoa Etafe North ISA 51 Bible Online

ISA 51 - Nguna Togoa Etafe North bible

ISA 51

¹Kuga taki dorogo paki nau, nimu waina ku do sava dausi namarinaleoleanaana, nimu waina ku do laaga Yehovah: kuga leo paki vatu laketoko waina ku pei tea taeana m̃elu asa, go paki nawoka ni m̃orutano waina ku pei tea kiliana pae asa.

²Kuga leo paki tamamu Abraham, go paki Sarah waina e dape mu: nalakena a soso e ragi waina e sikina doko, go a pasa p̃ia ki nia, po mari a e pavakawora po laapa.

³Nalakena Yehovah ega wo pasa pakavakale Sion: ega wo pasa pakavakale tea makaka kakana maga mamau puti; go ega wo mari maso maladi kakana ega wo dakiusi Eden, go masop̃alo kakana ega wo dakiusi roara ki Yehovah; nalaelaeaana go nasamasamaana eroga wo pei tea vap̃aiana asa, navasadodom̃atakiana, go nadaleo ni nalegaana.

⁴Kuga taki dorogo paki nau, narei aginau O; go kuga taki nadaligam̃a paki nau, nalauna aginau O: nalakena nawotaeana sikai ega wo m̃elu au pano, go aga wo lawo ki navasap̃otaeana aginau ega wo pei namarama sikai agi narei maga.

⁵Namarinaleoleanaana aginau e doko m̃aladigi, namautipauriana aginau e do pakilina, go narugu maga eroga wo pasap̃otae narei maga; naureure maga euga wo leogoro au, go euga wo pavatu narugu.

⁶Kuga sike namatamu maga paki nakoroatelagi maga, go kuga leo punusi maramana etano: nalakena nakoroatelagi maga euga wo pano puoli dapala naasua, go maramana ega wo disu duai dapala sugoro sikai, go tea maga waina eu doko asa doko, euga wo mate dakiusi namu maga: ma namautipauriana aginau ega wo doko mau doko, go namarinaleoleanaana aginau ega wo da pano puoli mau.

⁷Kuga taki dorogo paki nau, nimu waina ku atae namarinaleoleanaana, narei waina nawotaeana aginau e doko nap̃op̃omu; kuga ta matau ki navasapinoaana ki naatam̃oli maga, go kuga ta m̃anaunau nasuoriana adeada maga mau.

⁸Nalakena veko ega wo gani puoli ki da dapala sugoro sikai, go ula ega wo gani ra dapala wul: ma namarinaleoleanaana aginau ega wo doko mau doko, go namautipauriana aginau paki sara tagona.

⁹P̃a tarapa, p̃a tarapa, p̃a suni nakasuaana, naru ni Yehovah O; p̃a tarapa, dapala naaleatia maga ni tuai, tagona maga ni tuai mau. E da pei nigo mau waina ku daekotokotovi Rahab, go waina ku puri sasama drakon, kite?

¹⁰E da pei nigo mau waina ku mari natasi, noai vakipua warua maga, e pei natano garagara, kite? Waina ku mari natasi pua e pei napua sikai agi tea tauluaana maga naga euga tuagoto asa, kite?

¹¹Nalakena tea wanogoe tea tauluaana maga ki Yehovah euga wo liliu, po umai pilake nalegaana paki Sion; go nasamasamaana waina e du mau du ega wo doko nap̃auda: euga wo dape nasamasamaana go nalaelaeaana, go nasusueana go nagiana eroga wo sava pano.

¹²Kinau, kinau a pei nae waina a do pasa pakavakale ko: nigo ku pei sei, naga p̃a matau ki naatam̃oli waina ega wo mate, go ki naatam̃oli natuna waina e pei tea mariana e dapala nam̃enau?

¹³Go ku malio ki Yehovah, Tea Tawona ki‐go, waina e sai ki nakoroatelagi maga, po lawo‐ki‐laketoko ki maramana; go ku do mataku pitip̃atip̃a sara naaleatia nalakena namaetoana vivitinu ki tea riesoki, ragi waina e dum̃ana dutua ki nia naga ega mari puoli ki. Go namaetoana vivitinu ki tea riesoki wanogoe wai?

¹⁴Tea vua‐pavakotoana ega wo m̃araverave pei tea veresiana; go ega wo da mate po da siwo paki m̃orutano pano mau, go navinaga aneana ega wo da dika mau.

¹⁵Nalakena kinau a pei Yehovah Sup̃e anigo, tea tap̃otae natasi waina napeao kakana maga eu do saruru: Yehovah ki taua maga e pei nagisagu.

¹⁶Go a doropusi navasaana aginau maga eu doko nawokam̃a, go a melugoro ko ki nam̃elearugu, naga aga sai ki nakoroatelagi maga, po lawo‐kilaketoko ki maramana, po noa ki Sion, Nigo ku pei narei aginau.

¹⁷P̃a tarapa, p̃a tarapa, p̃a tuleana Yerusalem O, waina ku munu pae nam̃elearu ni Yehovah ki lasa munu ni namaritausuana aneana; ku munugi tea nadisoki maga ni lasa munu ni natarataaraana, po munu dap̃a ki nia.

¹⁸Natuna naanoai maga waina e dape ra, te sikai kakada waina ega vasa‐pakavakale a e dika; go natuna naanoai maga waina e pakale ra, te sikai kakada waina ega vuati naruna e dika.

¹⁹Naleo dua wanogoe ero pakilina ki‐go; sei ega wo dagisi ko? Navei‐maso‐maladiana go namaripuoli‐kiana, go navitoloana go lova; sei ega wo pasa pakavakale ko?

²⁰Natum̃a naanoai maga eu matekimala, eu dowo one natano dapala antelope sikai waina e doko vaivai sikai; eu pura ki namaritausuana ki Yehovah, ki navasakasuaana ki Sup̃e anigo.

²¹Nalakena tea wanogoe p̃a rogo tea waia, nigo tea rogokitesa, go tea matamaloku, ma e da pei nalakena waine mau:

²²Nawota anigo, Yehovah, go Sup̃e anigo waina e magi narei aneana pasa pululu, e noa dapala nea, e naga, P̃a leo, aga wo dape lua lasa munu ni natarataaraana m̃elu dua ki nam̃elearum̃a, tea nadisoki maga ni lasa munu ni namaritausuana aginau; p̃a wo da moro munugi a mau:

²³Go aga wo doropusi a paki nam̃elearu ni tea maga waina eu diesoki ko; waina eu noa ki naatam̃a, eu naga, P̃a rowo dap̃olosiwo naga auga tuagoto pano: go nigo ku lesi nam̃adum̃a e dapala natano, go e dapala napua ni natokoana agi tea maga waina eu duagoto pano.