Read Nguna Togoa Etafe North ISA 52 Bible Online

ISA 52 - Nguna Togoa Etafe North bible

ISA 52

¹P̃a tarapa, p̃a tarapa, p̃a suni nakasuaana anigo, Sion O; p̃a suni sugoro leom̃atakiana anigo maga, Yerusalem O, natokoana tapu: nalakena tea tika natovadaviviana, go tea waina e dika ki natautauana, eroga wo da moro umai paki‐go mau.

²P̃a meseura ki nam̃otam̃ota m̃elu dua ki‐go pano; p̃a tuleana, go p̃a tasake doko malo tasake, Yerusalem O: natali solisoli maga ni nanoam̃a eu maruarua, Sion natuna nagoroi O, waina ku pei tea viragi‐lua‐pavakotoana.

³Nalakena Yehovah e noa dapala nea, e naga, Ku dum̃amu sori sautoga ki mu; go kuga wo pei tea tauluaana masale ki m̃ane.

⁴Nalakena Yehovah Sup̃e e noa dapala nea, e naga, Narei aginau eu siwo paki Ityipt pano sala vea naga euga m̃enaki asa: go naka ni Assiria eu diesoki ra, nalakena e dika.

⁵Go nalakena tea wanogoe, a po pap̃ai nasava nea, Yehovah e noa e, waina narei aginau eu pei tea viragilua‐pavakotoana nalakena e dika? Tea maga waina eu maramara dap̃au ra, eu pakavakae pitip̃atip̃a, Yehovah e noa e, go nagisagu e pei tea vasasakiana sara naaleatia.

⁶Nalakena tea wanogoe narei aginau euga wo atae nagisagu: nalakena tea wanogoe euga wo atae naaleatia wanogoe naga kinau a pei nae waina a pasa; kuga leo, e pei kinau.

⁷Nam̃ele maga ni tea waina e do dogorogo ki narogorogoana wia, ero pei tea leom̃atakiana pa; go waina e do dogorogo ki natam̃ateana, waina e do dape umai narogorogoana wia ni tea wia maga, waina e do dogorogo ki namautipauriana; waina e do noa ki Sion, e naga, Sup̃e anigo e do maramara!

⁸Tea vavaigoro anigo maga euga wo sike nadaleoda! Euga wo sike nadaleoda po mamau lega; nalakena euga wo punusi narae paki narae ragi waina Yehovah ega wo liliu paki Sion.

⁹Kuga tatapua ki nalaelaeaana, kuga mamau puti lega, nimu tokora makaka maga ni Yerusalem: nalakena Yehovah e pakavakale narei aneana, e daulua Yerusalem.

¹⁰Yehovah e dum̃ana mari naruna tapu e dokolina namata ni nalauna maga mamau puti; go namatap̃ago maga mamau puti ni maramana euga wo punusi namautipauriana ki Sup̃e anigida.

¹¹Kuga tave, kuga tave, kuga m̃elu dua ki tokora waia po pano, kuga ta kisidogo te navatuna waina e da dautau mau; kuga m̃elu dua ki m̃aleoputo kakana po pano; kuga tautau, nimu maga waina ku dapetape lasa maga ki Yehovah.

¹²Nalakena kuga wo da m̃araverave pano mau, go kuga wo da pei tea kopasiluaana pano mau: nalakena Yehovah ega wo pea ki mu; go Sup̃e ki Israel ega wo edakugoro mu.

¹³Kuga leo, tea suasua aginau ega wo mari manumatua, ega wo pei tea sikeana pakilagi, po pei tea vuatiana sake, go ega wo pakilagi liu.

¹⁴Dapala waina tea laapa eu saram̃akoto asa, nalakena naraena e pei tea marisakiana e sa panop̃ota liu ki tea ki naatam̃oli, go nap̃atokona ki tea ki naatam̃oli natuna maga,

¹⁵Dapala nogoe nae ega wo meseura ki nalauna laapa, nawota maga euga wo punuta nalo kakana: nalakena tea waina e da pei tea noaana paki da mau, euga wo punusi a; go tea waina eu da dogo e mau, euga wo midoakiatae a.