Read Nguna Togoa Etafe North ISA 53 Bible Online

ISA 53 - Nguna Togoa Etafe North bible

ISA 53

¹Sei e saralomau narogorogoana aginami? Go naru ni Yehovah e pei tea mariana e dokolina paki sei?

²Nalakena e p̃ora sake naraena dapala tea lawoana melumelu sikai, go dapala nasiri sikai m̃elu natano garagara: e pinovinoi go e da pei tea leom̃atakiana mau; go ragi waina tu leo punusi a, e dika nawialuaana naga tuga masauna.

³E pei tea midoaki‐p̃alo‐kiana, po pei tea leodaoana ki naatam̃oli maga; e pei naatam̃oli sikai ni navitinuana maga, go e atae narogokitesaana: go e pei tea midoaki‐p̃alo‐kiana dakiusi tea sikai waina naatam̃oli e lolop̃ota ki nia, go nigida tu da midoa ki nia mau.

⁴Lomau e sua narogokitesaana anigida maga po dapetape navitinuana anigida maga: ma nigida tu midoa ki nia e pei tea varatiana, go tea wokatiana ki Sup̃e, po pei tea atugiana.

⁵Ma e pei tea wokatiana nalakena natapiriana anigida maga, go e pei tea marip̃oroworosiana nalakena namarinaleotageleana anigida maga: navaratiana waina e mari gida tu moro p̃ia, e doko asa; go ki wotu aneana maga, tu pei tea maripauriana.

⁶Tu mamau puti sasap̃o pano dakiusi shiip; tu dawasi sara naata kakagida paki napua anigida maga; go Yehovah e doropusi doko asa, namarinaleotageleana anigida maga mamau puti.

⁷E pei tea riesokiana go e pei tea mariana e dogokitesa, ma e punuta doko; e pei tea viragiluaana dakiusi shiip natuna sikai paki namaripunueana, go dakiusi waina shiip sikai e pusa narae ni tea alati a maga; dapala nogoe nae e punuta doko.

⁸E pei tea viragiluaana ki nariesokiana go ki navasap̃otaeana; go nalo ni tagona aneana, sei ega wo noasai a, nalakena e pei tea taeluaana m̃elu dua ki navanua ki tea mauri maga? E pei tea atugiana nalakena natapiriana ki narei aginau.

⁹Go eu mari matigona e sikoti tea sigisigileo, go e sikoti tea sogolapa doko namateana aneana; ma e da mari te namarinaleosaana mau, go te nasorosoroana e da doko nawokana mau.

¹⁰Go e pei namasauana ki Yehovah naga ega marip̃oroworosi a; e doropusi a paki narogokitesaana: waina namauriana aneana ega wo pei tea vituakiana dip̃a namarinaleosaana, ega wo punusi naworaworana, go naaleatia aneana maga euga wo laapa, go namasauana ki Yehovah ega wo pei tea mariana ega risu p̃ia nam̃elearuna.

¹¹Ega wo punusi nawa ni navitivitinuana ni naatana, go ega wo maro asa: ki naataeana aneana tea suasua leana aginau ega wo mari leana ki tea laapa: go nae ega wo dapetape namarinaleotageleana adeada maga.

¹²Nalakena tea wanogoe aga wo maneana dap̃otae matele sikai sikoti tea vakilagi, go ega wo dap̃otawotae tea vuti‐lua‐pavakotoana sikoti tea marimatua; nalakena e ligisi naatana paki namateana, go e pei tea veveana sikoti tea tapiri maga: ma e dapetape namarinaleosaana ki tea laapa, go e magi tea tapiri maga pavara.