Read Nguna Togoa Etafe North ISA 54 Bible Online

ISA 54 - Nguna Togoa Etafe North bible

ISA 54

¹P̃a lega, tea dim̃o O, waina ku da pisola mau; p̃a tatapua ki nalegaana, po pioso kasua, nigo waina ku da dogo navitinuana ni navisolaana mau: nalakena natu maga ni tea masikina doko eu laapa liu piakiki maga ki nagoroi waina anawota e doko, Yehovah e noa e.

²Tokora ni tap̃aup̃au anigo ega welewelea, go euga vitosi nakulukulu taugoro‐p̃otae maga ni tokora tokoana anigo maga; p̃a ta mari malemale mau, natali anigo maga euga parau, uuna anigo maga euga kasua.

³Nalakena p̃a wo peravera paki taleva ni matua go paki taleva ni mawiri; go naworaworam̃a maga euga wo peanipioli ki nalauna maga, po mari maso maladi maga euga vei tokora tokoana maga.

⁴P̃a ta mataku mau; nalakena p̃a wo da maliere mau: go p̃a ta pinovinoi mau; nalakena p̃a wo da pei tea toropusiana paki namaliereana mau: nalakena p̃a wo malio ki namaliereana ni naveinaatara‐ana anigo, go p̃a wo da moro midoaki nadododaoana ni naveimalepu‐ana anigo mau.

⁵Nalakena Tea Tawona ki‐go e pei am̃awota; Yehovah ki taua maga e pei nagisana: go Tea Tapu ki Israel e pei Tea Taulua ko; nae ega wo pei tea sosoana ki Sup̃e ki maramana mamau.

⁶Nalakena Yehovah e soso ko dapala tea laki sikai waina e pei tea toropusiana go e dogokitesa nap̃op̃ona, dapala tea laki sikai waina e pei tea toropusiana, go e ko pei naatara doko, Sup̃e anigo e noa e.

⁷A doropusi ko ku doko ragi ni nawilimatana sikai; ma aga wo piragi soki ko ki nadodomiana warua maga.

⁸Ki namaritausuana lelep̃esi a dasuru ki naraegu paki‐go ragi ni nawilimatana sikai; ma ki nadodomiana doko mau aga wo saup̃ia ki‐go, Yehovah Tea Taulua ko e noa e.

⁹Nalakena tea waia e dakiusi naaleatia maga ki Noah paki nau: nalakena dapala waina a pivisa naga noai maga ki Noah euga wo da moro muagoro maramana mau, dapala nogoe a moro pivisa naga aga wo da maritausu ki‐go, kite pasa kasua ki‐go mau.

¹⁰Nalakena tava warua maga euga m̃elu pano, go tava sula maga euga vei tea tapeluaana pano; ma nadodomiana aginau ega wo da m̃elu dua ki‐go pano mau, go navasasokiana ni natam̃ateana aginau ega wo da pei tea tapeluaana pano mau, Yehovah waina e saup̃ia ki‐go e noa e.

¹¹Nigo tea rogokitesa O, tea suiduletuleakiana ki nalagi, go tea tika ki navasapakavakaleana, p̃a leo, aga wo lawo ki vatu kakam̃a maga ki tea oraorana visarasara maga, po nadi ki laketano kakam̃a maga ki safir maga.

¹²Go aga wo mari namata leoduru kakam̃a maga ki rubi maga, go namata‐pua kakam̃a maga ki karbunkel maga, go p̃aaka kakam̃a ki vatu wia masauniana maga.

¹³Go natum̃a maga mamau puti euga wo pei tea vasapiseikiana ki Yehovah; go natam̃ateana ki natum̃a maga ega wo p̃arua.

¹⁴P̃a wo pei tea lawo‐ki‐laketokoana doko namarinaleoleanaana: p̃a wo doko uvea ki nariesokiana, nalakena p̃a wo da mataku mau; go ki nam̃anaunauana, nalakena ega wo da umai paki m̃aladigi ki‐go mau.

¹⁵P̃a leo, euga saisai, ma ega ta pae au mau: tea maga waina eu pe tum̃ada saisai ki da dip̃a ko, eu pe wo dowo ako.

¹⁶P̃a leo, kinau a dawona ki mataisau ni airon waina e sui nam̃elevara vavaga maga, po piragi lua nalikau sikai m̃elu ara ega vei tea ni nawosiana aneana; go a dawona ki tea mari pavakoto naga ega mari sa sa ki.

¹⁷Te nalikau sikai e pe vei tea mari‐dawonakiana naga e pe mari dip̃a ko, e pe wo da mari matua mau; go sara namena waina euga wo duleana dip̃a ko navasap̃otaeana, p̃a wo dip̃akotovi ra. Tea wanogoe e pei p̃aumaso ki tea suasua maga ki Yehovah, go namarinaleoleanaana adeada pae au, Yehovah e noa e.