Read Nguna Togoa Etafe North ISA 55 Bible Online

ISA 55 - Nguna Togoa Etafe North bible

ISA 55

¹O, kuga umai paki noai maga, sara naata waina ku madou, go tea waina e dika ki m̃ane; kuga umai, kuga vakokoto, po ganikani; io, kuga umai, kuga vakotovi waine go milk, m̃ane ega tika go naulu ega tika.

²Ekasana ku dowogi m̃ane raki tea waina e da pei navinaga mau? Go nawosiana animu raki tea waina ku da puka asa mau? Kuga rogo parati kinau, go kuga kani tea waina e p̃ia, go naatamu ega maro ki nam̃aladua.

³Kuga taki nadaligamu, po umai punusi au: kuga rogo, go naatamu ega wo mauri; go aga wo mari navasasokiana sikai paki mu waina ega wo du du po du mau du, nadodomiana aginau waina e pei lomau paki David.

⁴Kuga leo, a pitua ki nia e pei tea noasokisoki sikai paki naatam̃oli maga, tea maraki sikai go tea maramara sikai paki narei maga.

⁵P̃a leo, p̃a wo soso nalauna maga waina ku da atae ra mau, go nalauna maga waina eu da atae ko mau, euga wo sava pano punusi ko, nalakena Yehovah Sup̃e anigo, go nalakena Tea Tapu ki Israel; nalakena e samasama ni ko.

⁶Kuga laaga Yehovah ragi waina e mariatae pei tea vap̃aiana, kuga vioso paki nia ragi waina e doko m̃aladigi:

⁷Tea sigisigileo ega tum̃ana doropusi napua aneana, go naatam̃oli mari dagele ega tum̃ana doropusi namidodoana aneana maga: go ega liliu paki Yehovah, go nae ega wo dodomi a; go paki Sup̃e anigida, nalakena nae ega wo maneana midoakikorokoro p̃arua liu.

⁸Nalakena namidodoana aginau maga eu da pei namidodoana animu maga mau, go napua animu maga eu da pei napua aginau maga mau, Yehovah e noa e.

⁹Nalakena dapala waina nakoroatelagi maga eu pakilagi dap̃au maramana, dapala nogoe napua aginau maga eu pakilagi dap̃au napua animu maga, go namidodoana aginau maga eu dap̃au namidodoana animu maga.

¹⁰Nalakena dapala waina usa e p̃owo siwo umai, go sno pae nakoroatelagi, po da moro liliu paki asa pano mau, ma e do puevue natano, po mari a e siria po pum̃a, naga ega vitua ki napati ni nawa ni nakau paki tea sapuraki, go navinaga kaniana paki tea waina ega kanikani asa:

¹¹Navasaana aginau waina e dave m̃elu nawokagu ega wo dapala nogoe: ega wo da p̃alo liliu paki nau mau, ma ega wo pakavuro tea waina a masauna, go ega wo disu p̃ia paki tea waina a dip̃aki lua e paki asa.

¹²Nalakena kuga wo dave pano ki nalaelaeaana po pei tea viragiana pano ki natam̃ateana: tava warua maga go tava sula maga euga wo datapua ki nalegaana naraemu, go sara nakau ni vanua euga wo dapap̃osawosa.

¹³Nakau paine ega wo p̃ora oli tea vivitip̃a, go nakau nasara ega wo p̃ora oli namatagauta: go ega wo pei tea ni nagisa sikai paki Yehovah, tea ni navaivaiana vatoko sikai waina ega wo da pei tea taeluaana mau.