Read Nguna Togoa Etafe North ISA 56 Bible Online

ISA 56 - Nguna Togoa Etafe North bible

ISA 56

¹Yehovah e noa dapala nea, e naga, Kuga vavaigoro navasap̃otaeana, po mari namarinaleoleanaana: nalakena namautipauriana aginau e pei m̃aladigi naga ega umai, go namautiana aginau naga ega vei tea maripakasakiana.

²Ae namaropaana ki naatam̃oli waina e do mari tea wanogoe, go ki naatam̃oli natuna waina e do midoaki soki a; waina e do pavaigoro sabbath naga ega ta mari m̃oli ki nia mau, go waina e do mauti nam̃elearuna naga ega ta mari te naleo sa mau.

³Nam̃enaki‐atatoko waina e dum̃ana puluti Yehovah ega ta noa naga, Yehovah e p̃otae lua au m̃elu dua ki narei aneana: go atavau ega ta noa naga, P̃a leo, kinau a pei nakau kokolo sikai.

⁴Nalakena Yehovah e noa dapala nea, e naga, Nalo ni atavau maga waina eu do pavaigoro sabbath aginau maga, po do matadoa naleo maga waina a maro ara, po do midoaki soki navasasokiana aginau;

⁵Aga wo dua tea maga wanogoe namidoakilagatiana sikai go nagisa sikai m̃aleoputo ni nasum̃a aginau go m̃aleoputo ni p̃aaka aginau, waina e p̃ia liu piakiki naanoai maga go piakiki nagoroi maga: aga wo dua ra nagisa sikai waina ega tu du po du mau du, waina ega wo da pei tea taeluaana mau.

⁶Go nam̃enaki‐atatoko maga waina eu dum̃ada puluti Yehovah, naga euga maneana suasua, go naga euga dodomi nagisa ni Yehovah, naga euga vei tea suasua aneana maga, sara naata waina eu do pavaigoro sabbath naga euga ta mari m̃oli ki nia mau, go waina eu do midoaki soki navasasokiana aginau;

⁷Tea maga wanogoe aga wo piragi ra umai paki tava tapu aginau, po mari ra euga laelaea doko nasum̃a aginau ni natapasavasaana: navituaana tap̃arakiana adeada maga go naviriana adeada maga euga wo pei tea viragiana wede ni naviriana aginau; nalakena nasum̃a aginau ega wo pei tea sosoana ki nasum̃a sikai ni natapasavasaana agi nalauna maga mamau puti.

⁸Yehovah Sup̃e waina e do saisai ki tea kopasiluaana maga ni Israel, e noa naga, Aga wo saisai ki tea p̃ota maga umai punusi a, euga sokari tea aneana maga waina eu pei tea saisaikiana sua.

⁹Nimu nalo mila maga ni vanua, go nimu nalo mila maga ni namalasi, kuga mamau puti umai po dinomi tea kati‐p̃oraeana animu.

¹⁰Tea vavaigoro aneana maga eu kesa: eu mamau puti dika naataeana, eu mamau puti pei koria pusa maga, eu mari sap̃o arom̃aki; eu do one natano, doko do p̃erea, doko do masau p̃arua ki namaturuana.

¹¹Ioro, eu pei koria mata soki maga, waina eu da mariatae puka mau, go eu pei tea leoparatiki maga waina eu mari sap̃o midoaki atae: eu mamau puti pae napua adeada maga pano, eu sikasikai pano raki nataluaana adeada.

¹²Eu noa naga, Kuga umai, aga wo dape waine, go tuga tum̃agida pakavuro gida ki namunuana kasua; go matamai ega wo doko dapala naaleatia waia, ega wo p̃arua po moro p̃arua liu.