Read Nguna Togoa Etafe North ISA 57 Bible Online

ISA 57 - Nguna Togoa Etafe North bible

ISA 57

¹Tea leana e pano puoli, go te naata e da midoa ki nia nap̃op̃ona mau; go naatam̃oli dodomi‐dodomiana maga eu pei tea tapeluaana pano, namidoakiusiusiana e dika naga tea leana e pei tea tapeluaana pano pa dua ki tea sa waina ega umai.

²E sili paki natam̃ateana; eu maromaro one matigoda, sara naata sikasikai waina eu surata naleanaana adeada.

³Ma kuga risu umai paki m̃aladigi, nimu nagoroi wosidoa natuna maga, nawora ni namaripeleana go ni namasausaraana.

⁴Ku do mari saudoa ki sei? Ku do maga po do lua mena ki namenamu dip̃a sei? Nimu ku da pei natapiriana natuna maga, namarisoreana naworana sikai, kite?

⁵Nimu waina ku dum̃amu mari mu ku pavaga m̃aleoputo ni nakau oak maga, melu ni sara nakau mamalakesa; waina ku mari punue piakirikiri maga nap̃aloa maga, tokora ni nasavasiliana maga ni vatu laketoko maga?

⁶Matele anigo e doko m̃aleoputo ni vatu m̃om̃oa maga ni nap̃aloa; nara, nara eu pei matele anigo: ku lip̃aki navituaana takiana sikai paki da, ku pitua ki navituaana ni flaur paki da. Kinau aga wo peani namaroana nalo ni naleo maga wanogoe, kite?

⁷Ku lawo ki nawewele anigo nam̃asua ni tava vakilagi sikai waina e doko elagi: go ku sake paki asa pano naga p̃a vitua ki naviriana.

⁸Go ku sike lawo ki navaivaiana anigo doko nataku ni namata sili maga go nakautu maga: nalakena ku doropusi au po dum̃am̃a lagai pakasa ki‐go paki tea p̃ota sikai, go ku sake paki asa; ku mari nawewele anigo e p̃elewelea, po dum̃am̃a mari navasasokiana sikai paki da; ku masau p̃arua ki nawewele adeada ragi waina ku punusi nam̃alam̃alaana.

⁹Ku dum̃am̃a puvurai ki‐go ki naroro po pa punusi Molek, go ku mari tea ni nap̃o lolo anigo maga eu laapa, go ku dip̃aki lua tea tautauana anigo maga pano paki uvea, go pakipua pa pa paki Sheol.

¹⁰Ku mawosa nalakena navarauana ni napua anigo; ma ku da noa naga, Naleogoroana e dika: nakasuaana anigo e pei tea vakamaurikiana; nalakena tea wanogoe ku da manainai mau.

¹¹Go ku matau ki sei po m̃anaunau asa, naga ku sorosoro, go ku da midoa ki nau mau, kite midoa ki soki au nap̃op̃om̃a mau? Kinau a da punuta doko ragi varau mau, kite? Go nigo ku da matau kinau mau.

¹²Aga wo noa pakasa ki namarinaleoleanaana anigo; go nawosiana anigo maga, nara euga wo da silae ko mau.

¹³Ragi waina p̃a vioso, tea mamaragokiana anigo maga euga vualua ko; ma nalagi ega wo sui pulua ki puti ra pano, namero sikai ega wo dape lua ra pano, ma tea waina e do pavatu au, ega wo peani navanua, go ega wo peani pioli ki tava tapu aginau.

¹⁴Go ega wo noa naga, Kuga totoni, kuga totoni, kuga mari m̃ata ki napua, kuga tape dakati tea tapilagonaana m̃elu dua ki napua ki narei aginau.

¹⁵Nalakena Tea Vakilagi waina e doko elagi mau, Nawota Doko Mau Doko, waina nagisana e pei Tea Tapu, e noa dapala nea, e naga, Kinau a doko tokora tapu ni elagi, ma a sikoti tea waina naatana e pei tea mari‐p̃oroworosiana po pakitano, naga aga vakamauri ki naata ni tea vakitano, go naga aga vakamauri ki nap̃op̃o ni tea mari‐p̃oroworosiana.

¹⁶Nalakena aga wo da pululu doko mau doko mau, go aga wo da maritausu pa pa ega tu mau du mau: mase nap̃op̃ona e pe sirinopu naraegu, go naatana mauri maga waina a dum̃agu mari ra.

¹⁷Nalakena namarinaleotageleana ni namatam̃aguraana aneana, kinau a maritausu po atugi a, a maritausu po dum̃agu dasuru ki naraegu: go e maradoa pano po moro maradoa pano po dum̃ana dausi napua ni nap̃op̃ona.

¹⁸Kinau a punusi namariana aneana maga, go aga wo mari pauri a: go aga wo pitana ki nia, po lagati dua e navakavakaleana maga, nae go tea susue aneana maga.

¹⁹Kinau a dawona ki nawa ni nagole maga: natam̃ateana, natam̃ateana ega vei agi tea waina e doko uvea go agi tea waina e doko m̃aladigi, Yehovah e noa e; go aga wo mari pauri a.

²⁰Ma naatam̃oli sigisigileo e dakiusi natarereana ni natasi; nalakena e mari sap̃o maromaro, dakiusi noai kakana maga e do puta sake ki nalepa go ki naloa.

²¹Natam̃ateana ega wo dika paki tea sigisigileo, Sup̃e aginau e noa e.