Read Nguna Togoa Etafe North ISA 58 Bible Online

ISA 58 - Nguna Togoa Etafe North bible

ISA 58

¹P̃a vioso kasua, p̃a ta mari malemale mau, p̃a sike nadaleom̃a dakiusi paiga sikai, po noa pakasa ki paki narei aginau natapiriana adeada, go paki nasum̃a ki Yakob namarinaleosaana adeada maga.

²Ma eu laaga au sara naaleatia, e pei namaroana adeada naga euga atae napua aginau maga: dapala nalauna sikai waina e mari naleanaana, po da doropusi natawonakiana ki Sup̃e adeada mau, eu datagovi au ki natawonakiana ni naleanaana maga, e pei namaroana adeada naga euga vaki m̃aladigi ki Sup̃e.

³Eu naga, Ekasana au pali, go ku da punusi a mau? Ekasana au mari naatagami e dogokitesa, go ku da midoa ki nia mau? Kuga leo, naaleatia ni navaliana animu, ku dum̃amu laaga tea ni namaroana animu, po diesoki tea wosiwosi animu maga mamau puti.

⁴Kuga leo, ku pali, ma e pei navileana go navululuana, go ku do atugi ki nam̃elearu weluakiana ni nasigisigileoana: navaliana animu waina ku mari a naaleatia waia, ega wo da mari nadaleom̃a ega vei tea rogoana elagi mau.

⁵Tea tapala nogoe e pei navaliana waina kinau a matadoa e, kite? E pei naaleatia sikai waina naatam̃oli ega tum̃ana mari naatana ega rogokitesa asa, kite? E pei naga ega tum̃ana kusu ki nap̃auna dapala napati nau sikai, go naga ega tum̃ana maneana p̃elesa ki nakulukulu ni sak go natano‐apu maga etano ki nia, kite? Kuga wo noa naga tea wanogoe e pei navaliana sikai, naaleatia sikai ni namidoakim̃ata‐kiana ki Yehovah, kite?

⁶Navaliana waina kinau a matadoa e, e da pei tea waia, kite? Naga kuga veresi natali solisoki maga ni nasigisigileoana, naga kuga vuakotovi nakau ni nanoa, naga kuga suasua ki tea riesokiana maga naga euga vei tea veresiana pano, go naga kuga mari kotovi sara nakau ni nanoa, kite?

⁷E da pei naga p̃a tap̃otae navinaga anigo dua tea vitolo asa, go naga p̃a viragi tea tika waina e pei tea kopasiluaana ega umai paki nasum̃a anigo, kite? Go ragi waina p̃a vunusi tea waina e dika ki sugoro, naga p̃a sugoro e ki tea suniana sikai; go naga p̃a ta dum̃am̃a atutaku ki‐go paki tea ni nap̃okasim̃a mau, kite?

⁸E pe tapala nogoe, namarama anigo e pe wo dua sai dapala malip̃ogi, go namaripauriana anigo e pe wo p̃ora m̃araverave: go namarinaleoleanaana anigo e pe wo surata pea ki‐go; go nasamasamaana ki Yehovah e pe wo edakugoro ko.

⁹Go p̃a wo pioso, go Yehovah ega wo pasadara ko; p̃a wo kua pioso, go nae ega wo noa, Kinau nea. Ku pe tape lua m̃elu dua ki m̃aleoputo kakam̃a ki nakau ni nanoa, go ki narigiana ni nakini, go ki navasaana ni nasorosoroana;

¹⁰Go ku pe magi tea vitolo muni naatam̃a, po paka maromaro ki tea rogokitesa; ragi wanogoe namarama anigo e pe wo sake namaligo, go namaligoligo anigo e pe wo dakiusi aleati matua:

¹¹Go Yehovah ega wo pitana ki‐go pitip̃atip̃a, po paka maromaro ki naatam̃a tokora garagara maga, po mari navatum̃a maga euga kasua; go p̃a wo dakiusi roara vuevueana sikai, go dakiusi namata noai putaputa sikai, waina noai kakana maga eu da dap̃a mau.

¹²Go tea maga waina euga m̃elu ako, euga wo davagi piri tokora makaka tuai maga: p̃a wo sike lawo ki laketano maga ki tagona laapa; go p̃a wo pei tea sosoana ki tea mari‐p̃onoti tokora marip̃oraeana, go ki tea mari‐pakasa ki napua maga ni natokoana.

¹³Ku pe vuadoa nam̃elem̃a pa dua ki sabbath ki namariana ni namasauana anigo naaleatia tapu aginau; po soso sabbath ki namaroana sikai, go tea tapu ki Yehovah, tea samasamaniana; go ku pe dodomadagani a, po da mari namariana anigo maga, kite laaga tea ni namasauana anigo, kite pasa navasaana anigo maga mau:

¹⁴E pe tapala nogoe, ku pe wo maro Yehovah; go aga wo mari ko p̃a wo sakesaake tokora vakilagi maga ni maramana; go aga wo pagani ko ki p̃aumaso ki tamam̃a Yakob: nalakena nawoka ni Yehovah e noa e.