Read Nguna Togoa Etafe North ISA 60 Bible Online

ISA 60 - Nguna Togoa Etafe North bible

ISA 60

¹P̃a tuleana, p̃a maramalaga; nalakena namarama anigo e umai, go nasamasamaana ki Yehovah e sake ako.

²Nalakena p̃a leo, namaligo ega wo kovagoro maramana, go namaligo wono ega wo kovagoro narei maga: ma Yehovah ega wo sake ako, go nasamasamaana aneana ega wo pei tea vunusiana ako.

³Go nalauna maga euga wo umai paki namarama anigo, go nawota maga euga wo umai paki natawarawaraana ni nasakeana anigo.

⁴P̃a sike namatam̃a maga, po leo daliepu po punusi: eu mamau puti dum̃ada saisai ki da, eu rumai punusi ko: natum̃a naanoai maga euga wo pae uvea umai, go natum̃a nagoroi maga euga wo pei tea tapetapeana ki naruda maga.

⁵Ragi wanogoe p̃a wo leo punusi, po maramalaga, go nap̃op̃om̃a ega wo duruuru po p̃elewelea; nalakena nalapalapaana ni natasi ega wo maradoa paki‐go, go nasogolapaana ni nalauna maga ega wo umai paki‐go.

⁶Taua warua sikai ni kamel maga ega wo donigoro ko, kamel vusavusa maga ni Midian go ni Efah; tea maga mamau puti wanogoe euga wo pae Sheba umai: euga wo piragi kold go libano umai; go euga wo dogorogo ki nasamasamaana ni Yehovah.

⁷Navata maga mamau puti ni Kedar euga wo pei tea viragisaisai‐kiana umai paki‐go, shiip anoai maga ni Nebaioth euga wo manigo suasua: euga wo sake pano po pei tea viragiana wede ni naviriana aginau, go aga wo samasama ni nasum̃a ni nasamasamaana aginau.

⁸Nara sei waina eu diri dapala napopouru sikai, go dapala tokopea maga paki namata leoduru adeada maga?

⁹Lomau rarua maga wanogoe euga wo saisai umai punusi au, go rarua maga ni Tarshish euga wo pea, naga euga viragi natum̃a naanoai maga pae uvea umai, nara ma silver go kold adeada euga mamau, agi nagisa ni Yehovah Sup̃e anigo, go agi Tea Tapu ki Israel, nalakena nae e samasamani ko.

¹⁰Go nalauna p̃ota natuda maga euga wo davagi piri p̃aaka anigo maga, go nawota adeada maga euga wo manigo suasua: nalakena doko namaritausuana aginau, kinau a atugi ko, ma doko nasaup̃iaana aginau, a dodomi ko.

¹¹Nalakena tea wanogoe namata‐pua anigo maga euga wo dap̃olaga doko sara ragi; euga wo da pei tea kokoroana mau, aleati kite p̃ogi; naga naatam̃oli maga euga viragi umai paki‐go nasogolapaana ni nalauna maga, nara ma nawota adeada maga euga mamau.

¹²Nalakena nalauna go namarakiana waina e karai manigo suasua, ega wo pano puoli; nalauna maga wanogoe euga wo pei tea mari‐puoli‐kiana.

¹³Nasamasamaana ni Lebanon ega wo pei tea viragiana umai paki‐go, nakau akasia, go nasara, go paine euga mamau; naga malo tokoana ni tokora tapu aginau ega vei tea leom̃atakiana pa, go aga wo mari malo vasiana ni nam̃elegu maga ega vei tea samasamaniana.

¹⁴Go tea maga waina eu diesoki ko natuda maga euga wo umai po kolo suai natano naraem̃a; go tea maga mamau puti waina eu midoaki p̃alo ki‐go, euga wo dowo dap̃olosiwo nam̃ele ni natuam̃a; go euga wo soso ko ki Natokoana ki Yehovah, Sion ki Tea Tapu ki Israel.

¹⁵Ku pei tea toropusiana po pei tea vilosiana, go te naata e da surata duaduru ako mau, ma aga wo mari ko p̃a wo pei nasamasamaana doko mau sikai, namaroana sikai agi tagona laapa.

¹⁶Go p̃a wo pei tea vakasusukiana ki milk ni nalauna p̃ota maga, go p̃a wo susu nasusu ni nawota maga: go p̃a wo atae naga kinau Yehovah a pei tea mautipauri ko, go tea taulua ko, Tea Kasua Mau ki Yakob.

¹⁷Aga wo mari kold ega tu oli brass, go aga wo mari silver ega tu oli airon, go brass ega tu oli nakau, go airon ega tu oli vatu maga: go aga wo mari tasiga anigo maga euga vei natam̃ateana, go tea suatoro anigo maga euga vei naleanaana.

¹⁸Namaripavakotoana ega wo da moro pei tea rogoana navanua anigo mau, kite navei‐maso‐maladiana go namarisasakiana m̃aleoputo ni kokoi anigo maga; ma p̃a wo salagisa ni p̃aaka anigo maga ki Namautipauriana, go namata‐pua anigo maga ki Nasamasamaana.

¹⁹Elo ega wo da moro pei nasulu anigo aleati mau; go atelagi ega wo da moro maramalagati ko p̃ogi: ma Yehovah ega wo pei nasulu anigo waina ega tu du po du mau du, go Sup̃e anigo ega wo pei nasamasamaana anigo.

²⁰Elo anigo ega wo da moro musu mau, go atelagi anigo ega wo da mataru mau: nalakena Yehovah ega wo pei namarama anigo waina ega tu du po du mau, go naaleatia maga ni nasusueana anigo euga wo nopu.

²¹Go narei anigo euga wo mamau puti leana, euga wo peani pioli ki navanua pa pa ega tu mau du; ara ni tea lawoana aginau, nawosiana ni nam̃elearugu maga, naga aga vei tea samasamaniana asa.

²²Tea kiki sa ega wo pei taua warua sikai, go tea manainai ega wo pei nalauna kasua sikai: kinau Yehovah aga wo mari a ega m̃araverave ragi kakana.