Read Nguna Togoa Etafe North ISA 61 Bible Online

ISA 61 - Nguna Togoa Etafe North bible

ISA 61

¹Naata ni Yehovah Sup̃e e doko au; nalakena Yehovah e puvurai kinau naga aga rogorogo ki narogorogoana wia maga paki tea matemate maga; e dip̃aki lua au umai naga aga mari pauri tea vei p̃op̃o maworawora maga, naga aga rogorogo ki naveresiana paki tea viragi‐luapavakotoana maga, go ki namoroleosai‐ana paki tea kesa maga;

²Naga aga rogorogo ki natau ni nasaup̃iaana ki Yehovah, go naaleatia ni nasikoana ki Sup̃e anigida; naga aga vasapakavakale tea maga mamau puti waina eu do susue;

³Naga aga magi tea maga waina eu do susue doko Sion dawonaki, naga aga tua ra vauvau sikai ega oli natano‐apu, naroro ni nalaelaeaana ega oli nasusueana, sugoro kovagoro ni nasamasamaana oli navei‐p̃op̃o‐madagaana; naga euga vei tea sosoana ki nakau maga ni namarinaleoleanaana, tea lawoana maga ki Yehovah, naga ega vei tea samasamaniana.

⁴Go euga wo moro davagi tokora makaka tuai maga, euga wo moro sike lawo ki tea sapuraki one vea maga, go euga wo moro davagi piri natokoana makaka maga, maso maladi vea maga ni tagona laapa.

⁵Go nam̃enaki‐atatoko maga euga wo lawodu po pagani navata animu maga, go tea ni navanua p̃ota maga euga wo pei tea sisi natano animu maga go tea wosiwosi maga ni roara ni vaine animu maga.

⁶Ma kuga wo pei tea sosoana ki tea viri maga ki Yehovah: naatam̃oli maga euga wo soso mu ki tea suasua maga ki Sup̃e anigida: kuga wo gani nasogolapaana ki nalauna maga, go nasamasamaana adeada kuga wo dum̃amu pakavakae mu asa.

⁷Nalakena ku sua namaliereana paka rua; go nalakena nadododaoana e pei matele animu: nalakena tea wanogoe kuga wo peani matele paka rua doko navanua animu: nasamasamaana waina ega tu du po du mau du ega wo pei animu.

⁸Nalakena kinau Yehovah a dodomi naleanaana, a pilosi namaripavakotoana go namarinaleotageleana; go aga wo dua ra navituadip̃aana adeada lomau, go aga wo mari navasasokiana sikai paki da waina ega wo du du po du mau du.

⁹Go naworada ega wo pei tea ataeana m̃aleoputo ni nalauna maga, go natuda maga m̃aleoputo ni narei maga: tea maga mamau puti waina eu punusi ra euga wo atae ra, naga eu pei narei sikai waina Yehovah e pasap̃ia ki da.

¹⁰Aga wo laelaea Yehovah ki nalaelaeaana warua, naatagu ega wo samasamani Sup̃e aginau; nalakena e sugoro au ki sugoro maga ni namautipauriana, e kovagoro au ki sugoro kovagoro ni namarinaleoleanaana, dapala tea vitawiri sikai waina e dum̃ana dekei ki nia ki vauvau sikai, go dapala nagoroi laki sikai waina e dum̃ana dekei ki nia ki naloriki wia maga.

¹¹Nalakena dapala waina natano e do pitua ki nasirina, go dapala waina roara e do mari tea waina e pei tea sapurakiana asa e do pisou; dapala nogoe Yehovah Sup̃e ega wo mari namarinaleoleanaana go nasamasamaana eroga visou narae ni nalauna maga mamau puti.