Read Nguna Togoa Etafe North ISA 62 Bible Online

ISA 62 - Nguna Togoa Etafe North bible

ISA 62

¹Nalo ni Sion aga wo da punuta mau, go nalo ni Yerusalem aga wo da maromaro mau, pa pa naleanaana kakana ega tave pano dapala natawarawaraana, go namautipauriana kakana dapala nasulu sikai waina e do soro.

²Go nalauna maga euga wo punusi naleanaana anigo, go nawota maga mamau puti nasamasamaana anigo: go p̃a wo pei tea sosoana ki nagisa vau sikai, waina nawoka ni Yehovah ega wo salagisam̃a asa.

³P̃a wo pei vauvau sikai ni nasamasamaana doko nam̃elearu ni Yehovah, go tap̃au sikai ni naveinawotaana doko nam̃elearu ni Sup̃e anigo.

⁴P̃a wo da moro pei tea sosoana ki Tea Toropusiana mau; go navanua anigo ega wo da moro pei tea sosoana ki Maso Maladi mau: ma p̃a wo pei tea sosoana ki Hefsi‐bah, go navanua anigo ki Biula: nalakena Yehovah e maro ako, go navanua anigo ega wo laki.

⁵Nalakena dapala waina natureai sikai e dawiri nagoroi atara sikai, dapala nogoe natum̃a naanoai anigo maga euga wo dawiri ko: go dapala waina tea vitawiri e laelaeagoro tea laki, dapala nogoe Sup̃e anigo ega wo laelaea ako.

⁶A lawo ki tea leleogoro maga eu doko p̃aaka kakam̃a maga, Yerusalem O; euga wo da punuta mau aleati kite p̃ogi: nimu waina ku do mari Yehovah e midoaki,

⁷kuga ta maromaro mau, Go kuga ta dua e te namaromaroana mau pa pa ega lawo‐ki‐laketoko ki Yerusalem, go pa pa ega mari a ega vei nasamasamaana sikai maramana.

⁸Yehovah e pivisa pae nam̃elearuna ni matua, go pae naru ni nakasuaana aneana, e naga, Lomau, aga wo da moro pitua ki korn anigo ega vei navinaga ki tea kokona ki‐go maga mau; go tea ni nalauna p̃ota maga euga wo da moro munu waine anigo mau, waina nigo ku p̃osiwosi asa:

⁹Ma tea maga waina eu pila daua ki nia euga wo gani a, po samasama ni Yehovah; go tea maga waina eu piragi saisai ki nia euga wo munugi a roara maga ni tokora tapu aginau.

¹⁰Kuga tuaduru, kuga tuaduru namata‐pua maga; kuga mari m̃ata ki napua ki narei; kuga totoni, kuga totoni napua lapa; kuga tape lua vatu maga m̃elu dua ki nia; kuga sike lawo ki manututu sikai paki narei maga.

¹¹Kuga leo, Yehovah e dogorogo paki namatap̃ago ni maramana, e naga, Kuga noa ki Sion natuna nagoroi, kuga naga, P̃a leo, tea mauti pauri ko e umai; p̃a leo, namoriana aneana e sikoti a, go navituadip̃aana aneana e doko kivea ki nia.

¹²Go euga wo soso ra ki Narei Tapu, Tea Tauluaana ki Yehovah: go p̃a wo pei tea sosoana ki Tea Leolaagaana, Natokoana sikai waina e da pei tea toropusiana mau.