Read Nguna Togoa Etafe North ISA 63 Bible Online

ISA 63 - Nguna Togoa Etafe North bible

ISA 63

¹Sei wanogoe waina e pae Edom umai, waina e pilake tea suniana miala maga pae Bosrah? Nae wanogoe waina e pei tea samasamaniana doko tea suniana aneana, doko do surata duaduru nawaruaana ni nakasuaana aneana? E pei kinau, tea vasa naleanaana, tea kasua mau naga aga mauti.

²Ekasana tea suniana anigo e miala, go sugoro anigo maga eu dakiusi agi tea waina e do pasi m̃oru ni navasokiana ni nawa ni vaine?

³Kinau a masikinau pasi m̃oru ni navasokiana ni nawa ni vaine; go narei maga te naata sikai kakada e da sikoti au asa mau: a pasisoki ra namaetoana aginau, po pasi puludoa ki da namaritausuana aginau; go nadada e pei tea meseurakiana sugoro aginau maga, go tea suniana aginau maga mamau puti eu pei tea sirikiana.

⁴Nalakena naaleatia ni nasikoana e doko nap̃op̃ogu, go natau ni natauluaana e umai.

⁵Go a leo, go tea silae e dika; go a maga nalakena tea silae e dika: nalakena tea wanogoe narugu e dum̃ana maginau mari namautipauriana; go namaritausuana aginau e silae au.

⁶Go a pasisoki narei maga namaetoana aginau, po mari ra eu matamaloku namaritausuana aginau, go a ligisi nadada paki natano.

⁷Aga wo dogorogo ki nadodomiana maga ki Yehovah, go nasamasamaniana maga ki Yehovah, ega tapala tea mamau puti waina Yehovah e dua gida asa; go nawiaana warua paki nasum̃a ni Israel, waina e dua ra asa pae nasaup̃iaana aneana maga, go pae nalapalapaana ni nadodomiana aneana maga.

⁸Nalakena a naga, Lomau nara eu pei narei aginau, natugu maga waina euga wo da mari malauweluki mau: go nae e pei tea maumau pauri adeada.

⁹E dogokitesa sara narogokitesaana adeada, go agelo ni naraena e mauti ra: pae nadodomiana aneana go pae nasaup̃iaana aneana e daulua ra; go e dape dakati ra, po dapetape ra naaleatia maga mamau puti ni ragi ni tuai.

¹⁰Ma eu mari p̃auluulu, po mari Naatana Tapu e susue: nalakena tea wanogoe e maradoa po pei walup̃ota paki da, po dum̃ana marimari dip̃a ra.

¹¹Ragi wanogoe eu midoaki naaleatia maga ni tuai, go Moses tea suasua aneana, go eu naga, Naatam̃oli wanogoe wai waina e piragi lua ra m̃elu dua ki natasi sake umai, nara ma tea leoparatiki maga ni navata aneana? Nae wai waina e doropusi Naatana Tapu e doko m̃aleoputo kakada?

¹²Waina e mari naruna samasamaniana e sikoti nam̃elearu ni matua ni Moses? Waina e dap̃otae noai kivea ki da, naga ega tum̃ana maneana mari nagisa sikai waina ega tu du po du mau du?

¹³Waina e maraki ra duaduru epua maga, dapala horse sikai masop̃alo, naga eu da dapilagona mau?

¹⁴Dapala katel waina eu siwo paki nap̃aloa pano, Naata ni Yehovah e dua ra namaromaroana: dapala nogoe nigo ku maraki narei anigo, naga p̃a tum̃am̃a manigo mari nagisa samasamaniana sikai.

¹⁵P̃a leo siwo pae nakoroatelagi, po punusi pae tokora tokoana ni natapuana anigo go ni nasamasamaana anigo: nasuisuiana anigo wai, go nakasuaana anigo, go nam̃aem̃aeana ni namaritam̃a, go namaritadodomiana anigo paki nau? P̃a ta mauti ra kiagu mau.

¹⁶Nalakena nigo ku pei Tamagami, ma Abraham e da atae gami mau, go Israel e da leoatae gami mau: Yehovah O, nigo ku pei Tamagami, Tea Taulua gami; nagisam̃a e doko pae tuai pae tuai mau.

¹⁷Yehovah O, ekasana ku mari gami au sasap̃o m̃elu dua ki napua anigo maga, po mari nap̃op̃ogami e kasua naga au da matau ki‐go mau? P̃a liliu nalakena tea suasua anigo maga, nalauna maga ni tea veaniana anigo.

¹⁸Narei tapu anigo eu peani a ragi kiki: tea kokona ki gami maga eu dap̃olosiwo ki tokora tapu anigo.

¹⁹Kinami au dapala tea maga waina ku da maramara dap̃au ra mau; dapala tea maga waina eu da pei tea sosoana pae nagisam̃a mau.