Read Nguna Togoa Etafe North ISA 65 Bible Online

ISA 65 - Nguna Togoa Etafe North bible

ISA 65

¹A pei tea mariana a doko lina ki tea maga waina eu da pusuusu kinau mau; a pei tea vap̃aiana ki tea maga waina eu da laaga au mau: a noa naga, Kinau nea, kinau nea, paki nalauna sikai waina e da pei tea sosoana pae nagisagu mau.

²A sai ki nam̃elearugu maga naaleatia mamau paki narei vei p̃auluulu sikai, waina eu do surata napua sikai waina e da p̃ia mau, doko do dum̃ada dausi namidodoana adeada maga;

³Narei sikai waina eu mari au a maeto sara ragi, eu da mataku kite maliere asa mau, eu mari naviriana maga roara maga, po dap̃ara ki tea ni nap̃o wia wede maga ni brik;

⁴Waina eu doko m̃aleoputo ni matigo maga, po m̃enaki doko tokora maga ni nasiliana; waina eu gani nap̃okasi ni wago, go nasua ni tea mamaragokiana maga e doko lasa adeada maga;

⁵Waina eu naga, P̃a tu uvea kinau, p̃a ta umai paki m̃aladigi kinau mau, nalakena kinau a pei tea mari‐masale‐kiana pa dua ki‐go: nara eu pei naasua sikai nagisugu, nakapu sikai waina e do soro naaleatia mamau.

⁶P̃a leo, e pei tea midiriana naraegu; aga wo da punuta mau, ma aga wo pitua dip̃a, aga wo pitua dip̃a paki narum̃ada,

⁷Namarinaleotageleana adeada maga, go namarinaleotageleana maga ki tamada maga waina eu dap̃ara ki tea ni nap̃o wia nam̃asua ni tava maga, po pasa sa kinau nam̃asua ni tava sula maga, Yehovah e noa e: nalakena tea wanogoe aga wo dowogi paki narum̃ada ki namoriana dip̃a nawosiana vea adeada maga.

⁸Yehovah e noa dapala nea, e naga, Dapala waina waine vau e pei tea vap̃aiana doko m̃okai ni nawa ni vaine, go tea sikai e naga, Tuga ta mari sa ki nia mau, nalakena navasap̃iakiana sikai e doko asa: kinau ma aga wo mari ega tapala nogoe, nalakena tea suasua aginau maga, aga wo da mari puoli ki puti ra mau.

⁹Go aga wo mari nawora sikai ega tave m̃elu Yakob, go ega tave m̃elu Yudah, tea sikai waina ega veani tava aginau maga: go tea matadoaana aginau ega wo peanipioli ki nia, go tea suasua aginau maga euga wo doko asa.

¹⁰Go Sharon ega wo pei napega sikai ni navata maga ni shiip, go nap̃aloa ni Akor ega wo pei tokora sikai waina navata maga ni katel euga one natano asa, agi narei aginau waina eu laaga au,

¹¹Ma nimu waina ku doropusi Yehovah, waina ku malio ki tava tapu aginau, waina ku ovara ki wede sikai paki Kad, po pakavuro lasa munu ki waine sarisariana paki Meni;

¹²Aga wo pitua ki mu paki lova, go kuga wo mamau puti doko etano paki namaripunuvunueana: nalakena kinau a pioso, go nimu ku da pasadara mau; kinau a pasa, go nimu ku da daki dorogo mau; ma ku mari tea waina e sa namatagu maga, po matadoa tea waina a da maro asa mau.

¹³Nalakena tea wanogoe Yehovah Sup̃e e noa dapala nea, e naga, Kuga leo, tea suasua aginau maga euga wo ganikani, ma nimu kuga wo pitolo: kuga leo, tea suasua aginau maga euga wo munu, ma nimu kuga wo madou: kuga leo, tea suasua aginau maga euga wo laelaea, ma nimu kuga wo pei tea toropusiana paki namaliereana:

¹⁴Kuga leo, tea suasua aginau maga euga wo lega nalakena nasamasamaana ni nap̃op̃oda, ma nimu kuga wo dagi nalakena nasusueana ni nap̃op̃omu, go kuga wo lalagaarova nalakena narogokitesaana ni naatamu.

¹⁵Go kuga wo doropusi nagisamu ega vei navasasakiana sikai paki tea matadoaana aginau, go Yehovah Sup̃e ega wo mari punue ko; go ega wo salagisa ni tea suasua aneana maga ki nagisa p̃ota sikai:

¹⁶Naga tea waina ega tum̃ana pasap̃ia ki nia maramana, ega wo dum̃ana pasap̃ia ki nia pae Sup̃e ni nalomauana; go tea waina ega vivisa maramana, ega wo pivisa pae Sup̃e ni nalomauana; nalakena narogokitesaana maga ni sala vea eu pei tea maliokiana, go nalakena eu pei tea tasurukiana paki namatagu maga.

¹⁷Nalakena p̃a leo, a dawona ki nakoroatelagi vau maga, go maramana vau sikai: go naleo vea maga euga wo da pei tea midoakiana mau, kite umai paki namidodoana mau.

¹⁸Ma kuga samasama po laelaea pa pa ega tu mau du, doko tea waina a dawona ki nia: nalakena p̃a leo, a dawona ki Yerusalem e pei nalaelaeaana sikai, go narei kakana e pei nasamasamaana sikai.

¹⁹Go aga wo laelaea Yerusalem, po samasama narei aginau: go nadaleo ni natagiana ega wo da moro pei tea rogoana asa mau, kite nadaleo ni nakaiana.

²⁰Pipia sikai tea ni nakup̃a visa maau ega wo da moro mate asa mau, kite namariki sikai waina e da pakavuro naaleatia aneana maga mau: nalakena piakiki wanogoe ega wo mate natau aneana ega vei p̃onotia sikai, go tea waina e mate natau aneana e da pa parati ki p̃onotia sikai mau, ega wo pei tea vasasakiana sikai.

²¹Go euga wo davagi nasum̃a maga, po doko ara doko; go euga wo lawo roara maga ni vaine, po gani nawada.

²²Euga wo da davagi nasum̃a naga tea p̃ota ega toko asa; euga wo da lalawo naga tea p̃ota ega kanikani: nalakena naaleatia maga ni narei aginau euga wo dakiusi naaleatia maga ni nakau sikai, go tea matadoaana aginau euga wo peani namaroana ni ragi varau nalo ni nawosiana ni nam̃elearuda maga.

²³Euga wo da p̃osiwosi mawosa m̃oli mau, kite dape piakiki naga ega vei tea marisakiana mau; nalakena eu pei naworawora vasap̃iakiana ki Yehovah waina e pasa p̃ia ki da, nara ma natuda maga eu mamau.

²⁴Go ega wo pakilina naga euga wo da pioso mau, ma kinau aga wo pasadara; go ragi waina euga ko do pasa, ma kinau aga wo dogo.

²⁵Wulf go shiip natuna eroga wo saisai ganikani, go laion ega wo gani nam̃enau dapala oks: go nam̃otam̃ota ega wo pei navinaga ki m̃aata. Namarisakiana go namaripuolikiana eroga wo dika usuraki tava tapu aginau, Yehovah e noa e.