Read Nguna Togoa Etafe North ISA 66 Bible Online

ISA 66 - Nguna Togoa Etafe North bible

ISA 66

¹Yehovah e noa dapala nea, e naga, nakoroatelagi e pei malo tasake aginau, go maramana e pei malo vasiana ni nam̃elegu maga: nasum̃a waina kuga wo maginau davagi a wai? Go tokora ni namaromaroana aginau wai?

²Nalakena naleo maga mamau puti wanogoe nam̃elearugu ero mari ra, go dapala nogoe naleo maga mamau puti wanogoe eu pei tea aginau, Yehovah e noa e: ma aga wo leo paki naatam̃oli vei p̃op̃ovakitano waina naatana e pei tea marip̃oroworosiana, go waina e duruuru navasaana aginau.

³Tea waina e mari punue oks sikai, e dakiusi tea waina e mari punue naatam̃oli sikai; tea waina e mari naviriana ki shiip natuna sikai, e dakiusi tea waina e dae kotovi nanoa ni koria sikai; tea waina e pitua ki navituaana sikai ni flaur, e dakiusi tea waina e pitua ki navituaana takiana sikai ni nada ni wago; tea waina e dap̃ara ki libano, e dakiusi tea waina e pasap̃ia ki idolo sikai: nara eu dum̃ada matadoa napua adeada maga, go naatada e maro tea mamaragokiana adeada maga;

⁴Kinau ma aga wo madeada matadoa narogokitesaana, po mari tea mataukiana adeada maga euga vakilina ki da; nalakena ragi waina a pioso, te naata e da pasadara mau; ragi waina a pasa, eu da dakidorogo mau: ma eu mari tea waina e sa namatagu maga, po matadoa tea waina a da maro asa mau.

⁵Kuga rogo navasaana ki Yehovah, nimu waina ku duruuru navasaana aneana, e naga, Taimu maga waina eu pilosi mu, waina eu kopasi lua mu pano nalakena nagisagu, eu naga, Yehovah ega vei tea samasamaniana, naga auga vunusi nalaelaeaana animu; ma nara euga wo pei tea toropusiana paki namaliereana.

⁶Nadaleo sikai ni namarip̃araiana e m̃elu natokoana, nadaleo sikai e m̃elu nasum̃a tapu, nadaleo sikai ni Yehovah waina e do lagati pitua ki navituadip̃aana paki tea kokona ki nia maga.

⁷Ragi waina e ko da sua navitinuana ni navisolaana mau, ma e pisola; ragi waina navitinuana aneana e ko da umai mau, ma e dape natuna naanoai sikai.

⁸Sei e dogo tea tapala nogoe sikai? Sei e punusi tea tapala nogoe maga? Navanau sikai ega wo sua navitinuana ni navakilinaana po pakilina naaleatia ega sikai maau, kite? Nalauna sikai ega wo pakilina ragi ni nawilimatana sikai, kite? Nalakena ragi waina Sion e sua navitinuana ni navisolaana, ragi sikai maau wanogoe e pisola po dape natuna maga.

⁹Aga mari piakiki naga ega vakilina, po da suasua naga ega vakilina mau, kite? Yehovah e noa e: go kinau waina a mari a naga ega vakilina, aga wo p̃ogoro nasum̃a ni kanao, kite? Sup̃e anigo e noa e.

¹⁰P̃a laelaea, Yerusalem O, go kuga samasama asa, nimu tea mamau puti waina ku dodomi a: kuga sokamidi ki nalaelaeaana asa, nimu mamau puti waina ku susue nalo kakana:

¹¹Naga kuga susu po puka ki nasusuna ni navakavakaleana aneana maga; naga kuga munu p̃arua po peani namaroana nalapalapaana ni nasamasamaniana aneana.

¹²Nalakena Yehovah e noa dapala nea, e naga, P̃a leo, aga wo sai ki natam̃ateana paki nia dapala noaisara sikai, go nasamasamaana ni nalauna maga dapala nap̃ap̃a noaisara lelep̃esi sikai, go kuga wo susu ki nia; kuga wo pei tea tapetapeana naruna, po pei tea vakaleana nap̃atuana maga.

¹³Dapala tea sikai waina p̃ilana e pakavakale a, dapala nogoe kinau ma aga wo pakavakale mu; go kuga wo pei tea vakavakaleana Yerusalem.

¹⁴Go kuga wo punusi a, go nap̃op̃omu ega wo laelaea, go navatumu maga euga wo siria dapala nam̃enau malakesa: go ega wo pei tea ataeana naga nam̃elearu ni Yehovah e sikoti tea suasua aneana maga, go namaetoana aneana e dip̃a tea kokona ki nia maga.

¹⁵Nalakena p̃a leo, Yehovah ega wo umai pilake nakapu, go kariot aneana maga euga wo dakiusi suitaviro; naga ega vitua ki namaetoana aneana ki namaritausuana, go navasakasuaana aneana ki soro ni nakapu.

¹⁶Nalakena Yehovah ega wo pasap̃otae sara nap̃okasi ki nakapu go ki lova aneana: go tea maga waina euga wo pei tea atugiana ki Yehovah euga wo laapa.

¹⁷Tea maga waina eu dum̃ada puvurai ki da, po dum̃ada mari ra eu dautau naga euga vaki roara maga, waina eu dausi tea sikai waina e doko m̃aleoputo kakada, doko do gani nap̃okasi ni wago, go tea mamaragokiana, go kusue; nara euga wo pei taua puoli, Yehovah e noa e.

¹⁸Nalakena a atae nawosiana adeada maga go namidodoana adeada maga; naaleatia ega wo umai, go aga wo piragi saisai ki nalauna maga go namena maga mamau puti; go euga wo umai, po punusi nasamasamaana aginau.

¹⁹Go aga wo lawo ki navaivaiana sikai m̃aleoputo kakada, go tea kakada maga waina euga vei tea mautiana, aga wo dip̃aki lua ra pano paki nalauna maga, paki Tarshish, go paki Pul, go paki Lud, tea vua p̃elua ki naasu paki Tubal go Yavan, paki naureure maga ni uvea, waina eu da dogo nalo kakagu mau, kite punusi nasamasamaana aginau mau; go euga wo dogorogo ki nasamasamaana aginau usuraki nalauna maga.

²⁰Go euga wo piragi lua taimu maga mamau puti m̃elu dua ki nalauna maga mamau puti umai, euga vei navituaana sikai paki Yehovah, euga wo sakesaake horse maga, go kariot maga, go vala maga, go mule maga, go nalo tuavati sava m̃araverave maga, po umai paki tava tapu aginau Yerusalem, Yehovah e noa e, ega tapala Israel natuna maga waina eu dape navituaana adeada maga umai doko lasa tautau sikai, paki ekopu ni nasum̃a ki Yehovah.

²¹Go aga wo piragi lua te seara kakada euga vei tea viri maga, naworawora ni Levi, Yehovah e noa e.

²²Nalakena dapala waina nakoroatelagi vau maga go maramana vau, waina aga wo dawona ki da, euga wo doko mau doko naraegu, Yehovah e noa e, dapala nogoe naworaworamu go nagisamu euga wo doko mau doko.

²³Go ega wo pakilina naga pae atelagi vau sikai paki atelagi vau p̃ota sikai, go pae sabbath sikai paki sabbath p̃ota sikai, sara nap̃okasi euga wo umai naga euga lotu naraegu, Yehovah e noa e.

²⁴Go euga wo dave pano, po leo paki nap̃atoko mate maga ni naatam̃oli maga waina eu dapiri dip̃a au: nalakena ula kakada ega wo da mate mau, go nakapu kakada ega wo da pei tea vuepunueana mau; go euga wo pei tea mamaragokiana sikai paki sara nap̃okasi.