Read Nguna Togoa Etafe North ISA 7 Bible Online

ISA 7 - Nguna Togoa Etafe North bible

ISA 7

¹Go e pakilina naaleatia maga ki Ahas natu ni Yotham, natu ni Ussiah nawota ni Yudah, naga Resin nawota ni Siria, go Pekah natu ni Remaliah nawota ni Israel, ero sake paki Yerusalem pano naga eroga mari navakalo dip̃a e; ma ero mari sa marimatua ki nia.

²Go eu noa ki tea ni nasum̃a ki David, eu naga, Siria ma Efraim ero pulutaki. Go nap̃op̃ona e duruuru, go nap̃op̃o ni narei aneana, dapala waina nakau maga ni mala ni nakau eu pei tea turuakiana ki nalagi.

³Go Yehovah e noa ki Isaiah, e naga, P̃a tave pano, nimu ma natum̃a Shear‐yashub, naga p̃a sua Ahas namatap̃ago ni napua ni noai ni namarourou ni elagi, napua warua ni vanua ki tea sarue maga;

⁴Go p̃a noa ki nia, p̃a naga, P̃a vavaigoro, go p̃a tu dorogo; p̃a ta mataku mau, go nap̃op̃om̃a ega ta m̃anaunau mau, nalakena naseati asua dua waia, nalakena namaetoana vivitinu ki Resin go Siria, go ki natu ni Remaliah.

⁵Nalakena Siria e mari nasekeana sa dip̃a ko, nara ma Efraim go natu ni Remaliah, doko do naga,

⁶Tuga sake pano dip̃a Yudah, po mari sa ki nia, go tuga tape pavakoto asa, po lawo ki nawota sikai, natu ni Tabeel, ega toko m̃aleoputo kakana:

⁷Yehovah Sup̃e e noa dapala nea, e naga, Ega wo da dapala nogoe mau, go ega wo da pakilina mau.

⁸Nalakena Damaseko e pei nap̃au ni Siria, go Resin e pei nap̃au ni Damaseko: go natau rualima latesa tamate lima euga wo da nopu mau, go Efraim ega wo pei tea marip̃oraworaeana, naga ega wo da moro pei nalauna sikai mau:

⁹Go Samaria e pei nap̃au ni Efraim, go natu ni Remaliah e pei nap̃au ni Samaria. Ku pe wo da saralomau asa mau, ku pe wo da pei tea lawosokiana mau.

¹⁰Go Yehovah e moro pasa paki Ahas,

¹¹po naga, P̃a tatagovi Yehovah Sup̃e anigo ki navaivaiana sikai; e pe vakipua dapala Sheol, kite e pe vakilagi dapala nakoroatelagi.

¹²Ma Ahas e naga, Aga wo da datago mau, go aga wo da maridogo Yehovah mau.

¹³Go e naga, Kuga rogo, nimu tea ni nasum̃a ni David O; ku midoaki nia naga e da pei te navatuna waina ku mari naatam̃oli maga eu mawosa, ma ku moro masauna naga kuga mari Sup̃e aginau ega mawosa, kite?

¹⁴Nalakena tea wanogoe Yehovah ega wo dum̃ana dua mu navaivaiana sikai; kuga leo, nagoroi atara sikai ega wo diena, po dape natuna naanoai sikai, go ega wo salagisana ki Immanuel.

¹⁵Ega wo gani batar go honi, ragi waina ega wo atae p̃otae po karaikita tea sa, po matadoa tea wia.

¹⁶Nalakena piakiki wanogoe ega wo da atae mau naga ega karaikita tea sa, po matadoa tea wia, ma navanua ki nawota dua waina ku mamarago ki da, ega wo pei tea toropusiana sua.

¹⁷Yehovah ega wo mari naaleatia maga euga wo pakilina ki‐go, go paki narei anigo, go paki nasum̃a ni tamam̃a, naaleatia maga waina eu da pakilina mau pae naaleatia waina Efraim e m̃elu dua ki Yudah pano pa pa pa; e pei nawota ni Assiria.

¹⁸Go ega wo pakilina naaleatia wanogoe, naga Yehovah ega wo saveu ki lago waina e doko namatap̃ago ni noaisara maga ni Ityipt, go ki bii waina e doko navanua ni Assiria.

¹⁹Go euga wo mamau puti umai, po lawo doko nap̃aloa maso maladi maga, go valea maga ni vatu laketoko maga, go namalasi ni nataputea vivitip̃a, go napega maga mamau puti.

²⁰Go naaleatia wanogoe Yehovah ega wo masi lua navanua anigo, nalolu ni nap̃auna go ni natuana, go ni nasina, ki tea masi sikai waina ega vei tea vasadapuiana pae taleva kerua ni Noaisara, pae nawota ni Assiria nogo.

²¹Go ega wo pakilina naaleatia wanogoe, naga naatam̃oli sikai ega wo pakale kau vusavusa sikai, go shiip ega rua;

²²Go ega wo pakilina naga ega wo gani batar, nalakena milk waina euga wo pitua ki nia, ega wo p̃arua: nalakena sara naata waina euga wo mauri doko m̃aleoputo ni navanua, euga wo gani batar go honi.

²³Go ega wo pakilina naaleatia wanogoe naga tea makalikali maga go tea vivitip̃a maga euga wo doko sara tokora waina vaine manu sikai eu pea doko ara sala vea, vaine maga waina eu sikasikai pataka ni shekel sikai ni silver.

²⁴Tea sikai e pe vaki asa pano, e pe wo puati naasu go nalua maga; nalakena tea makalikali maga go tea vivitip̃a maga euga wo doko usuraki navanua mamau.

²⁵Go tava mamau puti waina eu pea sove ra ki tea sove natano maga, naata sikai ega wo da moro paki asa mau, nalakena ega wo matau ki tea makalikali maga go tea vivitip̃a maga; ma euga wo pei tokora maga waina katel euga wo pei tea kakaroana asa, go waina shiip euga wo surata asa.