Read Nguna Togoa Etafe North ISA 8 Bible Online

ISA 8 - Nguna Togoa Etafe North bible

ISA 8

¹Go Yehovah e noa kinau, e naga, P̃a tape vatu warua go p̃elewelea sikai, go p̃a midiri ega toko lina asa Maher‐shalal‐hash‐bas;

²Go tea noasokisoki lomau dua, Uriah tea viri, go Sekariah natu ni Yeberekiah, ero maginau pei tea noasokisoki maga.

³Go a pa punusi nagoroi aginau; go e diena, po dape natuna naanoai sikai. Go Yehovah e noa kinau, e naga, P̃a salagisana ki Maher‐shalal‐hash‐bas.

⁴Nalakena piakiki wanogoe ega ko da noa atae naga mama kite teete, go nasogolapaana ni Damaseko go natapepavakotoana ni Samaria, euga wo pei tea viragi‐lua‐pavakotoana pano kivea ki nawota ni Assiria.

⁵Go Yehovah e moro pasa paki nau,

⁶po naga, Nalakena narei waia eu karaikita noai maga ni Shiloah waina eu do sara matemate, go eu do sara ki namatakuana narae ni Resin go ni natu ni Remaliah;

⁷Nalakena tea wanogoe, p̃a leo, Yehovah ega wo mari noai maga ni Noaisara euga wo sake dip̃a ra, euga wo kasua po laapa, nawota ni Assiria nogo, go nasamasamaniana aneana mamau: go ega wo sake po donigoro nap̃ap̃a noaisara kakana maga, po lelep̃esi kalau natavaki kakana maga:

⁸Go ega wo sara pano paki Yudah; ega wo lelep̃esi po sara duaduru po pano; ega wo sake pa pa ega liliu nanoana; go nalivaruna vitosiana maga eroga wo pakavuro naweleweleana ni navanua anigo, nalakena Sup̃e e sikoti gida doko.

⁹Kuga atae, nimu narei maga O, naga kuga wo m̃anaunau; go kuga taki dorogo, nimu tea mamau puti ni navanua maga ni uvea: ku pe tum̃amu dasoki mu ki nalikau animu maga, ma ku pe wo m̃anaunau; ku pe marisokisoki, ma ku pe wo navunuvunu.

¹⁰Ku pe saisai pusum̃aki, ma e pe wo pei tea mariana e pe wo pei sarapa; ku pe vasa ki navasaana, ma e pe wo da lawodu mau: nalakena Sup̃e e sikoti gida doko.

¹¹Nalakena Yehovah e dip̃aki nau ki nam̃elearu kasua sikai, po pasa parati kinau naga aga ta surata usi napua ki narei waia mau, e naga,

¹²Narei waia eu pe noa nalo ni te navatuna naga e pe vei nasekeana, kuga ta sikoti ra nasekeana wanogoe mau; go kuga ta matau ki tea waina nara eu matau ki nia mau, kite m̃anaunau asa mau.

¹³Ma kuga vavaigoro naga Yehovah ki taua maga e dapu; go nae ega vei tea mataukiana animu, go nae ega vei tea ni nam̃anaunauana animu.

¹⁴Go ega wo pei tokora sikai ni nasavasiliana; ma ega wo moro pei vatu sikai ni natapilagonaana, go vatu laketoko sikai ni natapilagonaana ni narowoana paki nasum̃a dua ni Israel, go tea katisoki sikai, go vaivai sikai paki naatatoko maga ni Yerusalem.

¹⁵Go tea laapa euga wo dapilagona asa po dowo, po pei tea marip̃oraeana, po pei tea vuagoroana, po pei tea vuatiana.

¹⁶Aga wo solisoki nanoasokisokiana, aga wo pulusoki nawotaeana ega toko m̃aleoputo ni tea tautau aginau maga.

¹⁷Go aga wo leogoro Yehovah, waina e dasuru ki naraena pa dua ki nasum̃a ni Yakob, go aga wo pavatu asa.

¹⁸Kuga leo, kinami ma natugami maga waina Yehovah e dua au ara, au pei tea ni navaivaiana maga go tea ni namagaana maga doko Israel, m̃elu Yehovah ki taua maga waina e doko tava Sion doko.

¹⁹Go eu pe noa ki mu naga kuga vusuusu paki tea vasapua maga go paki tea kikita maga, waina eu do dip̃auru po do dam̃aniginigi: ma narei sikai e pe wo da pusuusu paki Sup̃e adeada mau, kite? Eu pe wo magi tea mauri pusuusu paki tea mate, kite?

²⁰Euga vaki nawotaeana go euga vaki nanoasokisokiana! Lomau eu do pasa tea tapalana maga, waina e da p̃ia ki te navatuna mau.

²¹Go euga wo duaduru navanua, euga wo dogokitesa p̃arua po pitolo: go ega wo pakilina naga ragi waina euga wo pitolo, nap̃op̃oda ega wo sa, go euga wo pasa sa ki nawota adeada go Sup̃e adeada, po leo paki nakoroatelagi:

²²Go euga wo leo paki maramana, go kuga leo, narogokitesaana go namaligo, namaligoligo ni navitivitinuana; go euga wo pei tea tieluaana pano paki namaligo wono.