Read Nguna Togoa Etafe North ISA 9 Bible Online

ISA 9 - Nguna Togoa Etafe North bible

ISA 9

¹Ma tea waina e pea doko narogokitesaana doko sala vea, ega wo da moro doko namaligoligo sala waia. Sala vea e mari navanua ni Sebulun go navanua ni Naftali ero pei tea midoaki‐p̃alo‐kiana, ma sala edaku e mari navanua mamau pisari natasi, e pei tea samasamaniana, navanua waina e doko taleva kerua ni Yordan, Calilea ki nalauna laapa.

²Narei waina eu pea surata namaligo, eu po punusi namarama warua sikai: namarama wanogoe e maramalagati tea maga waina eu pea doko navanua ni melu ni namateana doko.

³Ku mari nalauna eu disu po laapa, ku mari nalaelaeaana adeada e po p̃arua: eu laelaea naraem̃a ki nalaelaeaana ni nalolovaeana, dakiusi waina naatam̃oli maga eu do laelaea ragi waina eu dap̃otawotae tea vuti‐luapavakotoana.

⁴Nalakena nakau nanoa ni natapetapeana aneana, go tiko ni napauna, go nakau varati ki tea riesoki kasua ki nia, ku marikotokotovi ra dapala waina ku mari a paki Midian.

⁵Nalakena nalikau maga mamau puti ki naatam̃oli maga ni navakalo, go tea suniana maga waina eu pei tea sirikiana ki nada, euga wo pei tea tap̃arakiana puti euga vei navinaga ki nakapu.

⁶Nalakena piakiki sikai e manigida pakilina, piakiki naanoai sikai e pei tea vituakiana paki gida; go naveinawotaana ega wo doko napauna, go nagisana ega wo pei tea sosoana ki Tea Midoakip̃otae Manumatua, Sup̃e Kasua Mau, Tama ni Ragi Vatoko, Tea Maraki ni Natam̃ateana.

⁷Naveinawotaana aneana ega wo disu p̃arua, go natam̃ateana ega wo doko mau doko malo tasake ki David go dap̃au namarakiana aneana, naga ega vei tea lawo‐ki‐laketokoana, go naga ega lawodu kasua doko naleanaana go doko namarinaleoleanaana pa pa ega tu du po du mau du. Nasuisuiana ki Yehovah ki taua maga ega wo mari tea wanogoe.

⁸Yehovah e dip̃aki lua navasaana sikai paki Yakob, go e puvua umai doko Israel.

⁹Go narei mamau eu atae a, Efraim go naatatoko maga ni Samaria, waina eu noa ki naleomadagaana go ki nakasuaana ni nap̃op̃oda, eu naga,

¹⁰Brik maga eu pevera, ma tuga wo davagi ki vatu taeana maga: nakau naita maga eu po pei tea taekotoviana eu dowo, ma tuga wo oli ra ki nakau sidar maga.

¹¹Nalakena tea wanogoe Yehovah e sike walu p̃ota aneana maga eu duleana dip̃a ra, go e surupugoni tea kokona ki da maga;

¹²Tea ni Siria kivea, go Filistine maga natakuda; go eu maga ki nawokada po dinomi ra. Nalakena tea mamau puti wanogoe namaetoana aneana e da liliu pano mau, ma nam̃elearuna e ko pei tea saikiana doko.

¹³Ma narei eu da maradoa paki tea waina e atugi ra mau, kite laaga Yehovah ki taua maga mau.

¹⁴Nalakena tea wanogoe Yehovah e daelua m̃elu dua ki Israel, nap̃auna go napuena, ara ni paama go nap̃araerae, naaleatia sikai maau.

¹⁵Naatam̃oli matua go dodomadaganiana e pei nap̃auna; go profeta waina e pasa pisei ki nasorosoroana maga, e pei napuena.

¹⁶Nalakena tea maga waina eu maraki narei waia, eu mari ra eu sasap̃o; go tea maga waina eu pei tea marakiana pae ara, eu pinovinoi.

¹⁷Nalakena tea wanogoe Yehovah e da maro natureai adeada maga mau, go e da dodomi namalepu adeada maga go nagoroi malepu maga mau: nalakena sara naata sikasikai eu pei nakalep̃o go tea mari naleo sa, go sara nawoka sikasikai eu do pasa naveilalaana. Nalakena tea mamau puti wanogoe, namaetoana aneana e da liliu pano mau, ma nam̃elearuna e ko pei tea saikiana doko.

¹⁸Nalakena nasigisigileoana e do soro dakiusi nakapu vavaga; e do gani tea vivitip̃a maga go tea makalikali maga: e do dokoni namalasi wono ni mala ni nakau, eu do sake pakilagi doko napopouru wono ni naasua.

¹⁹Namaritausuana ki Yehovah ki taua maga e dap̃ara ki navanua: narei maga eu pei navinaga ki nakapu; te naata e da p̃op̃osoki taina mau.

²⁰Eu do puasokisoki doko taleva ni matua, ma eu pitolo doko; go eu do ganikani doko taleva ni mawiri, ma eu da puka mau: eu do dum̃ada gani nap̃okasida, sara naata ki tea ni m̃aladigi ki nia:

²¹Manasseh, Efraim; go Efraim, Manasseh: go nara dua ero dip̃a Yudah. Nalakena tea mamau puti wanogoe, namaetoana aneana e da liliu pano mau, ma nam̃elearuna e ko pei tea saikiana doko.