Read Nguna Togoa Etafe North LEVITIKO 1 Bible Online

LEVITIKO 1 - Nguna Togoa Etafe North bible

LEVITIKO 1

¹Go Yehovah e pioso paki Moses, po pasa paki nia m̃elu tap̃aup̃au ni nasaisaiana,

²po naga, P̃a vasa paki Israel natuna maga, po noa ki da naga, Ragi waina te naata sikai kakamu e pe mari naviriana sikai ni navinaga paki Yehovah, kuga mari naviriana ni navinaga animu ni katel, ni navata ni katel, go ni navata ni shiip.

³Waina naviriana ni navinaga aneana e pe vei naviriana tap̃arakiana ni katel, e pe wo pitua ki nia ega vei tea anoai, tea mamaau p̃ia: ega vitua ki nia doko namata ni tap̃aup̃au ni nasaisaiana, naga ega vei tea midoaki‐m̃atakiana narae ni Yehovah.

⁴Go ega toropusi nam̃elearuna nap̃au ni naviriana tap̃arakiana wanogoe; go ega maneana pei tea midoakim̃atakiana naga ega maneana pei natap̃augoroana.

⁵Go ega mari punue kau anoai wanogoe narae ni Yehovah: go Aaron natuna maga, tea viri maga, euga viragi nadana umai, po meseura ki nada wanogoe wede ni naviriana daliviri, waina e doko namata ni tap̃aup̃au ni nasaisaiana.

⁶Go ega woka mulusi naviriana tap̃arakiana, po daekotokotovi a.

⁷Go Aaron tea viri natuna maga euga tokoni nakapu wede ni naviriana, po daua ki nakau kokolo nakapu wanogoe:

⁸Go Aaron natuna maga, tea viri maga, euga toropusi namakotokoto maga, nap̃auna, go nap̃eletia, euga toko nakau kokolo waina e one nakapu doko wede ni naviriana:

⁹Ma namaritana maga go natuana maga, ega sarue ra ki noai: go tea viri ega tap̃ara ki puti a wede ni naviriana, ega vei naviriana tap̃arakiana sikai, naviriana tap̃arakiana pae nakapu, tea ni nap̃o lolo paki Yehovah.

¹⁰Go waina naviriana ni navinaga aneana e pe vei tea ni navata ni shiip, kite ni naninani maga, naga ega vei naviriana tap̃arakiana sikai; ega vitua ki nia ega vei tea anoai, tea mamaau p̃ia.

¹¹Go ega mari punue a nadigina paki north ni wede ni naviriana narae ni Yehovah: go Aaron natuna maga, tea viri maga, euga meseura ki nadana wede ni naviriana daliviri.

¹²Go ega taekotokotovi a ega vilake nap̃auna go nap̃eletiana: go tea viri ega toropusi ra euga toko nakau kokolo waina e one nakapu doko wede ni naviriana:

¹³Ma namaritana maga go natuana maga, ega sarue ra ki noai: go tea viri ega vitua ki tea mamau puti, po dap̃ara ki da wede ni naviriana: e pei naviriana tap̃arakiana sikai, naviriana pae nakapu, tea ni nap̃o lolo paki Yehovah.

¹⁴Go waina naviriana ni navinaga aneana paki Yehovah e pe vei naviriana tap̃arakiana ni manu maga, ragi wanogoe ega vitua ki naviriana ni navinaga aneana ega vei tea ni taroa maga kite tokopea vusavusa maga.

¹⁵Go tea viri ega viragi a umai paki wede ni naviriana, po piloki kotovi nap̃auna, po dap̃ara ki nia wede ni naviriana; go nadana ega sara nadigi ni wede ni naviriana pa pa ega nopu:

¹⁶Go ega vualua navagavagana pilake nam̃auna maga, po nadi ki nia nadigi ni wede ni naviriana paki taleva ni ist, tokora waina natanoapu e doko asa:

¹⁷Go ega p̃ori lovai nalivaruna maga, ma ega ta dap̃oraworae a mau: go tea viri ega tap̃ara ki nia wede ni naviriana, doko nakapu kokolo waina e one nakapu: e pei naviriana tap̃arakiana sikai, naviriana pae nakapu, tea ni nap̃o lolo paki Yehovah.