Read Nguna Togoa Etafe North LEVITIKO 10 Bible Online

LEVITIKO 10 - Nguna Togoa Etafe North bible

LEVITIKO 10

¹Go Aaron natuna maga, Nadab go Abihu, ero dape lasa ni tea ni nap̃o wia adeada sarasara ra, po doropusi nakapu doko asa, go ero doropusi tea ni nap̃o wia paki asa, po pitua ki nakapu p̃ota narae ni Yehovah, waina e da dip̃aki da asa mau.

²Go nakapu e dave umai m̃elu narae ni Yehovah, po gani ra, go ero mate narae ni Yehovah.

³Go Moses e noa ki Aaron, e naga, Tea waia e pei tea waina Yehovah e pasa asa, e naga, Aga wo dum̃agu pisei ki natapuana kakagu m̃aleoputo ni tea maga waina eu doko m̃aladigi ki nau, go doko narae ni narei mamau puti aga wo pei tea samasamaniana. Go Aaron e punuta.

⁴Go Moses e soso Mishael go Elsafan, Ussiel natuna maga, Aaron aloana, umai po noa ki da, e naga, Koroga umai paki m̃aladigi, po dape lua taimu maga m̃elu dua ki kivea ki tokora tapu pano paki etaku ni tokora ni nam̃enakiana.

⁵Go ero disu paki m̃aladigi, po dape lua ra pano doko sugoro tokop̃ai nawilida, paki etaku ni tokora ni nam̃enakiana; dapala waina Moses e noa e.

⁶Go Moses e noa ki Aaron, go ki natuna maga Eleaser go Ithamar, e naga, Nalolu ni nap̃aumu ega ta pei tea veresiana mau, go kuga ta puap̃orae sugoro animu maga mau; naga kuga ta mate mau, go naga ega ta maeto ki narei mamau: ma taimu maga, tea maga mamau puti ni nasum̃a ni Israel, euga lalagaarova navivitinuana ni namaritausuana waina Yehovah e mari a.

⁷Go kuga ta dave m̃elu dua ki namata ni tap̃aup̃au ni nasaisaiana mau, mase ku pe mate: nalakena naroro ni navuvuraiana ki Yehovah e doko mu. Go eu mari pataka ni navasaana ki Moses.

⁸Go Yehovah e pasa paki Aaron, po naga,

⁹P̃a ta munu waine kite namunuana kasua mau, nimu ma natum̃a maga, ragi waina kuga sili paki ekopu ni tap̃aup̃au ni nasaisaiana, mase ku pe mate: ega vei natawonakiana sikai waina ega tu du po du mau du usuraki tagona animu maga:

¹⁰Go naga kuga atae p̃otae tea tapu go tea m̃oli, go tea loa go tea tautau;

¹¹Go naga kuga vasa pisei ki Israel natuna maga natawonakiana maga mamau puti waina Yehovah e noa ki da asa pae nam̃elearu ni Moses.

¹²Go Moses e noa ki Aaron go ki natuna maga waina ero doko, Eleaser go Ithamar, e naga, Kuga tape navituaana ni flaur waina e dupele ni navituaana maga pae nakapu paki Yehovah, go kuga kani a, leven ega tika asa, pisari wede ni naviriana: nalakena e pei tea tapu warua liu:

¹³Go kuga kani a tokora tapu sikai, nalakena e pei tea anigo, go tea ki natum̃a maga, m̃elu navituaana maga pae nakapu paki Yehovah: nalakena kinau a pei tea tip̃akiana asa.

¹⁴Go nagorogoro salesaleakiana go namao sikosikoviana, kuga kani ra tokora tautau sikai; nimu ma natum̃a naanoai maga, go natum̃a nagoroi maga: nalakena eu pei tea anigo, go eu pei tea ki natum̃a naanoai maga, waina e pei tea vituakiana m̃elu naviriana maga ni navituaana maga ni natam̃ateana waina Israel natuna maga euga to mari a.

¹⁵Namao sikosikoviana go nagorogoro salesaleakiana, euga viragi ra umai pilake navituaana maga ni nap̃eletia pae nakapu, euga salesalea ki nia ega vei navituaana salesaleakiana narae ni Yehovah: go ega vei tea anigo, go tea ki natum̃a naanoai maga, ega manimu pei natawonakiana sikai waina ega tu du po du mau du; dapala waina Yehovah e pitip̃aki asa.

¹⁶Go Moses e laaga parati ki naninani, tea ni navituaana ni namarinaleosaana, go kuga leo, e po pei tea tap̃arakiana: go e maeto ki Eleaser go ki Ithamar, Aaron natuna maga waina ero pei tea toropusiana ero doko,

¹⁷go e naga, Ekasana nimu koro da gani navituaana ni namarinaleosaana tokora tapu, nalakena e pei tea tapu warua liu, go e dua mu asa naga koroga tapetape namarinaleotageleana ki taua ni nasaisaiana, naga koroga madeada mari natap̃augoroana narae ni Yehovah?

¹⁸Kuga leo, nadana e da pei tea viragiana umai paki ekopu ni tokora tapu mau: go waina koro pe kani a ekopu ni tokora tapu, dapala waina kinau a pitip̃aki asa, e pe wia.

¹⁹Go Aaron e noa ki Moses, e naga, P̃a leo, naaleatia waia ero po pitua ki navituaana ni namarinaleosaana adeada go navituaana tap̃arakiana adeada narae ni Yehovah; go naleo maga wanogoe eu po dowo au: go a pe kani navituaana ni namarinaleosaana naaleatia waia, e pe wo pei tea midoaki‐m̃ata‐kiana namata ni Yehovah kite?

²⁰Go ragi waina Moses e dogo tea wanogoe, e midoaki m̃ata ki nia.