Read Nguna Togoa Etafe North LEVITIKO 18 Bible Online

LEVITIKO 18 - Nguna Togoa Etafe North bible

LEVITIKO 18

¹Go Yehovah e pasa paki Moses, po naga,

²P̃a vasa paki Israel natuna maga, po noa ki da, Kinau a pei Yehovah Sup̃e animu.

³Kuga ta mari dakiusi natomariana maga waina eu do mari ra navanua ni Ityipt, tokora waina ku pea doko asa: go kuga ta mari dakiusi natomariana maga waina eu do mari ra navanua ni Kanaan, tokora waina a piragi mu paki asa: go kuga ta surata dausi natawonakiana adeada maga mau,

⁴Kuga to mari pataka ni navasap̃otaeana aginau maga, go kuga vavaigoro natawonakiana aginau maga, po surata asa: kinau a pei Yehovah Sup̃e animu.

⁵Nalakena tea wanogoe kuga vavaigoro parati ki natawonakiana aginau maga, go navasap̃otaeana aginau maga: waina naatam̃oli sikai e pe to mari patakana, e pe wo mauri: kinau a pei Yehovah.

⁶Te naata sikai kakamu ega ta paki m̃aladigi ki tea ni namatarau garagaara aneana, naga ega lagai pakasa ki nam̃alam̃alaana aneana mau: kinau a pei Yehovah.

⁷P̃a ta lagai pakasa ki nam̃alam̃alaana ki tamam̃a, waina e pei nam̃alam̃alaana ki p̃ilam̃a: nae e pei p̃ilam̃a; p̃a ta lagai pakasa ki nam̃alam̃alaana aneana mau.

⁸P̃a ta lagai pakasa ki nam̃alam̃alaana ki nagoroi ki tamam̃a mau: e pei nam̃alam̃alaana ki tamam̃a.

⁹Go p̃a ta lagai pakasa ki nam̃alam̃alaana ki gorem̃a mau, tamam̃a natuna nagoroi, kite p̃ilam̃a natuna nagoroi, e pe vakilina kiam̃a, kite e pe vakilina tokora p̃ota sikai, p̃a ta lagai pakasa ki nam̃alam̃alaana aneana mau.

¹⁰P̃a ta lagai pakasa ki nam̃alam̃alaana ki natu nagoroi ki natum̃a naanoai, kite natu nagoroi ki natum̃a nagoroi mau: nalakena nam̃alam̃alaana adeada e pei nam̃alam̃alaana anigo.

¹¹P̃a ta lagai pakasa ki nam̃alam̃alaana ki natu nagoroi ki tamam̃a anagoroi, waina e pei namavesi ki tamam̃a, nae e pei gorem̃a, p̃a ta lagai pakasa ki nam̃alam̃alaana aneana mau.

¹²P̃a ta lagai pakasa ki nam̃alam̃alaana ki tamam̃a gorena mau: nae e pei tea ni namatarau garagaara ki tamam̃a.

¹³P̃a ta lagai pakasa ki nam̃alam̃alaana ki p̃ilam̃a taina mau: nalakena nae e pei tea ni namatarau garagaara ki p̃ilam̃a.

¹⁴P̃a ta lagai pakasa ki nam̃alam̃alaana ki tamam̃a taina mau, p̃a ta paki m̃aladigi ki anagoroi: nae e pei p̃ilam̃a kiki.

¹⁵P̃a ta lagai pakasa ki nam̃alam̃alaana ki sulim̃a mau: nae e pei nagoroi ki natum̃a naanoai; p̃a ta lagai pakasa ki nam̃alam̃alaana aneana mau.

¹⁶P̃a ta lagai pakasa ki nam̃alam̃alaana ki taim̃a anagoroi: e pei nam̃alam̃alaana ki taim̃a.

¹⁷P̃a ta lagai pakasa ki nam̃alam̃alaana ki nagoroi sikai go ki natuna nagoroi; p̃a ta puati natu nagoroi ki natuna naanoai, kite natu nagoroi ki natuna nagoroi, naga p̃a lagai pakasa ki nam̃alam̃alaana aneana; nalakena nara eu pei tea ni namatarau garagaara ni m̃aladigi ki da: e pei nasigisigileoana lomau.

¹⁸P̃a ta saisai sikoti tai ni am̃agoroi, po lagai pakasa ki nam̃alam̃alaana aneana mau, ragi waina am̃agoroi e ko mauri doko.

¹⁹Go p̃a ta paki m̃aladigi ki nagoroi sikai naga p̃a lagai pakasa ki nam̃alam̃alaana aneana, ragi waina e doko p̃aova nalo ni naloaana aneana.

²⁰Go p̃a ta one sikoti nagoroi ki tea ni m̃aladigi ki‐go mau, po dum̃am̃a mari ko ku loa sikoti a.

²¹Go p̃a ta pitua ki te naworam̃a sikai ega vei tea tap̃arakiana pulemauri paki Molok mau, go p̃a ta mari m̃oli ki nagisa ni Sup̃e anigo mau: kinau a pei Yehovah.

²²P̃a ta one sikoti naanoai dakiusi eu one sikoti nagoroi: e pei namamaragokiana.

²³Go p̃a ta one sikoti te nalo tuavati mau, po dum̃am̃a mari ko ku loa sikoti a: go te nagoroi sikai ega ta lawodu narae ni te nalo tuavati, naga ega ta one sikoti a mau: e pei nawosiana sa lomau.

²⁴Kuga ta dum̃amu mari mu kuga loa ki te navatuna sikai ni naleo maga waia mau: nalakena nalauna maga waina kinau a kopasi lua ra padua ki naraemu, nara eu pei tea mariana eu loa ki naleo maga mamau puti wanogoe:

²⁵Go navanua e po loa: nalakena tea wanogoe a do parati a namarinaleotageleana aneana, go navanua e do lua ki tea maga waina eu doko asa.

²⁶Nalakena tea wanogoe nimu kuga vavaigoro parati ki natawonakiana aginau maga, go navasap̃otaeana aginau maga, go kuga ta mari namamaragokiana maga wanogoe sikai kakada mau; nimu naatatoko maga, kite tea ni nalauna p̃ota waina e m̃enaki‐atatoko sikoti mu:

²⁷(Nalakena naatam̃oli maga ni navanua waina eu pea ki mu, nara eu mari namamaragokiana maga mamau puti wanogoe, go navanua e po loa;)

²⁸Go nimu kuga ta mari navanua ega loa mau, mase e pe moro lua ki mu pano, dapala waina e lua ki nalauna waina e doko pea ki mu.

²⁹Nalakena naata waina e pe mari namamaragokiana maga wanogoe sikai kakada, naata wanogoe ega vei tea taeluaana m̃elu dua ki narei aneana.

³⁰Nalakena tea wanogoe kuga rogo parati ki navasaparatikiana aginau, naga kuga ta mari natomariana mamaragokiana maga wanogoe sikai kakada mau, waina nara eu pea do mari a pea ki mu, go naga kuga ta dum̃amu mari mu kuga loa asa mau: kinau a pei Yehovah Sup̃e animu.