Read Nguna Togoa Etafe North LEVITIKO 21 Bible Online

LEVITIKO 21 - Nguna Togoa Etafe North bible

LEVITIKO 21

¹Go Yehovah e pasa paki Moses, po naga, P̃a vasa paki tea viri maga, Aaron natuna maga, po noa ki da naga, Te naata sikai ega ta dum̃ana mari a ega loa nalo ni tea mate m̃aleoputo ni narei aneana;

²Ma nalo ni namatarau garagaara aneana sikina, waina eu pei namatarau garagaara ni m̃aladigi ki nia, nalo ni p̃ilana, go nalo ni tamana, go nalo ni natuna naanoai, go nalo ni natuna nagoroi, go nalo ni taina;

³Go nalo ni gorena mutawono sikai, namatarau garagaara ni m̃aladigi ki nia, waina e ko da laki te naanoai mau, nalo ni nae e sikina e mariatae dum̃ana mari a ega loa nalo kakana.

⁴Nae e pei naatam̃oli vakilagi sikai m̃aleoputo ni narei aneana, go ega ta dum̃ana mari a ega loa, po dum̃ana mari sa ki nia naga ega vei tea midoakip̃alo‐kiana.

⁵Euga ta karo nap̃auda euga m̃asua mau, kite masi kotovi nalolu nasida mau, kite mari natotovaana ni nap̃atokoda mau.

⁶Nara euga magi Sup̃e adeada dapu, go euga ta mari m̃oli ki nagisa ni Sup̃e adeada mau: nalakena navituaana tap̃arakiana maga paki Yehovah, navinaga ki Sup̃e adeada, nara eu do pitua ki da: nalakena tea wanogoe euga tapu.

⁷Euga ta dawiri nagoroi masausara sikai, kite nagoroi sikai waina e loa; go euga ta dawiri nagoroi sikai waina anawota e dip̃aki lua e pano: nalakena eu magi Sup̃e adeada pei tea tapu.

⁸Nalakena tea wanogoe p̃a tapugoro e; nalakena nae e do pitua ki navinaga ki Sup̃e anigo: ega tapu paki‐go: nalakena kinau Yehovah, waina a dapugoro ko, kinau a dapu.

⁹Go te natu nagoroi sikai ki tea viri e pe mari dapala nagoroi masausara sikai, po dum̃ana midoaki p̃alo ki nia, e mari tamana ma e pei tea midoaki‐p̃alokiana: nagoroi wanogoe ega vei tea tap̃arakiana ki nakapu.

¹⁰Go tea viri waina e pei tea vakilagi liu taina maga, waina eu daki naroro vuvuraiana nap̃auna, go waina e pei tea tapugoroana naga ega suni sugoro tapu maga, ega ta peresi nalolu nap̃auna ega varau mau, kite puap̃orae sugoro aneana maga mau;

¹¹Go ega ta pa punusi te nap̃atoko mate sikai mau, kite dum̃ana mari a ega loa nalo ni tamana, kite nalo ni p̃ilana;

¹²Go ega ta dave m̃elu dua ki ekopu ni tokora tapu paki katama mau, kite mari m̃oli ki tokora tapu ki Sup̃e aneana mau; nalakena natapugoroana ni naroro vuvuraiana ki Sup̃e aneana e doko asa: kinau a pei Yehovah.

¹³Go ega tawiri nagoroi mutawono sikai.

¹⁴Ega ta dawiri nagoroi malepu sikai, kite nagoroi toropusiana sikai, kite nagoroi sikai waina e peani naloaana sikai, kite nagoroi masausara sikai: ma ega tawiri nagoroi mutawono sikai, tea ni narei aneana.

¹⁵Go ega ta mari naworaworana ega vei tea midoakip̃alo‐kiana m̃aleoputo ni narei aneana mau: nalakena kinau a pei Yehovah waina a dapugoro e.

¹⁶Go Yehovah e pasa paki Moses, po naga,

¹⁷P̃a vasa paki Aaron, po naga, Te naata sikai ni naworaworam̃a usuraki tagona adeada maga e pe veani te wotu sikai, naata wanogoe ega ta paki m̃aladigi naga ega vitua ki navinaga ki Sup̃e aneana mau.

¹⁸Nalakena te naata sikai e pe veani wotu sikai, e pe mari sa disu paki m̃aladigi mau: tea kesa, kite gole, kite tea waina e peani nagisu mawora, kite waina e peani natawotu varau,

¹⁹Kite te naata sikai waina nam̃ele natuana e mawori, kite nam̃elearuna e mawori,

²⁰Kite m̃adu tagele, kite natipua, kite mata sa, kite e pe veani nakarokaroana, kite e pei navakarago, kite laso makoto;

²¹Te naata sikai ni naworawora ni Aaron, waina e pe veani wotu sikai, ega ta umai paki m̃aladigi mau naga ega vitua ki navituaana tap̃arakiana maga paki Yehovah: e peani wotu sikai; ega ta umai paki m̃aladigi naga ega vitua ki navituaana ni navinaga ki Sup̃e aneana mau.

²²Naata wanogoe ega kani navinaga ki Sup̃e aneana, tea tapu p̃arua liu, go tea tapu.

²³Ma ega ta sili paki ekopu ni tea taugoro‐p̃otae mau, kite disu paki m̃aladigi ki wede ni naviriana, nalakena e peani wotu sikai; naga ega ta mari m̃oli ki tokora tapu aginau maga mau: nalakena kinau a pei Yehovah waina a dapugoro ra.

²⁴Go Moses e pasa asa paki Aaron, go paki natuna maga, go paki Israel natuna maga mamau puti.