Read Nguna Togoa Etafe North LEVITIKO 22 Bible Online

LEVITIKO 22 - Nguna Togoa Etafe North bible

LEVITIKO 22

¹Go Yehovah e pasa paki Moses, po naga,

²P̃a vasa paki Aaron, go paki natuna maga, po noa naga euga tu uvea ki naleo tapu maga ki Israel natuna maga, waina eu maginau dapugoro ra, naga euga ta mari m̃oli ki nagisagu tapu: kinau a pei Yehovah.

³P̃a noa ki da, p̃a naga, Te naata sikai ni naworaworamu mamau puti usuraki tagona animu maga, e pe vaki m̃aladigi ki naleo tapu maga, waina Israel natuna maga eu dapugoro ra paki Yehovah, ragi waina e pe veani te naloaana sikai, naata wanogoe ega vei tea taeluaana m̃elu dua ki naraegu: kinau a pei Yehovah.

⁴Te naata sikai ni naworawora ni Aaron e pe vei lepero sikai, kite e pe veani te nasaraana sikai; ega ta gani naleo tapu maga mau, pa pa ega vea dautau. Go naata waina e pe kisidogo te navatuna waina e loa nalo ni namateana, kite naata waina nasua tare aneana e pe m̃elu pae asa;

⁵Kite naata waina e pe kisidogo te nalo kakaravi sikai, po loa asa, kite e pe kisidogo naatam̃oli sikai waina e peani te naloaana sikai, po loa asa;

⁶Naata waina e pe kisidogo te naleo tapala nogoe, ega loa pa pa paki ragi melu mau, go ega ta gani naleo tapu mau waina e pe ta pea loloso mau.

⁷Go waina elo ega musu, ega wo dautau; go ega wo edaku gani naleo tapu maga, nalakena e pei navinaga aneana.

⁸Tea waina e dum̃ana mate, kite e pei tea kati‐p̃oraeana ki nalo mila maga, ega ta gani a mau, naga ega ta dum̃ana mari a ega loa asa: kinau a pei Yehovah.

⁹Nalakena tea wanogoe euga vavaigoro navasa‐parati‐kiana aginau, mase eu pe tapetape namarinaleosaana nalo kakana, po mate pae asa, waina eu pe mari m̃oli ki nia: kinau a pei Yehovah, waina a dapugoro ra.

¹⁰Tea ni nalauna p̃ota sikai ega ta gani naleo tapu mau: nam̃enaki‐atatoko sikai ki tea viri, kite tea suasua vasadapuiana sikai, ega ta gani naleo tapu mau.

¹¹Ma waina tea viri sikai e pe vakotovi naatam̃oli naga ega vei naviti aneana, navakotoviana ni m̃ane aneana, naata wanogoe ega kani a; go tea maga waina eu pakilina nasum̃a aneana, nara euga kani navinaga aneana.

¹²Go waina tea viri natuna nagoroi sikai e pe laki paki tea ni nalauna p̃ota sikai, nagoroi wanogoe ega ta gani navituaana sikosikoviana ni naleo tapu maga mau.

¹³Ma waina tea viri natuna nagoroi sikai e pe vei malepu, kite tea tip̃akiluaana sikai, go e pe tika piakiki, go e po liliu paki nasum̃a ki tamana, po doko dapala ragi ni navei‐naataraana aneana, nae ega kani navinaga ki tamana: ma tea ni nalauna p̃ota ega ta gani a mau.

¹⁴Go waina naata sikai e pe kani naleo tapu sikai pae nasalup̃eana, ragi wanogoe ega rogovi a ki namagovai kelima kakana, po pitua ki nia paki tea viri.

¹⁵Go euga ta mari m̃oli ki naleo tapu maga ki Israel natuna maga, waina eu pitua ki da paki Yehovah;

¹⁶Po mari ra naga euga tapetape namarinaleotageleana go natapiriana, ragi waina eu gani naleo tapu adeada: nalakena kinau a pei Yehovah waina a dapugoro ra.

¹⁷Go Yehovah e pasa paki Moses po naga,

¹⁸P̃a vasa paki Aaron go paki natuna naanoai maga, go paki Israel natuna maga mamau puti, po noa ki da naga, Te naata sikai ni nasum̃a ni Israel, kite ni tea ni nalauna p̃ota maga doko Israel, e pe vitua ki naviriana ni navinaga aneana sikai, e pe vei nasaiana aneana sikai, kite navituaana suasuakiana aneana sikai, waina e pe vitua ki nia paki Yehovah naga ega vei navituaana tap̃arakiana sikai;

¹⁹Kuga vitua ki tea anoai sikai, tea mamaau p̃ia, ni katel maga, kite ni shiip maga, kite ni naninani maga, naga kuga vei tea midoaki‐m̃ata‐kiana.

²⁰Ma tea waina e pe veani te wotu sikai, tea wanogoe kuga ta pitua ki nia mau: nalakena ega wo da manimu pei tea midoaki‐m̃ata‐kiana mau.

²¹Go waina te naata sikai e pe vitua ki naviriana sikai ni navituaana ni natam̃ateana maga paki Yehovah naga ega vakavuro nasaiana sikai, kite naga ega vei navituaana suasuakiana sikai, m̃elu navata ni kau, kite navata ni naninani kite ni shiip, go ega vei tea wialua naga ega vei tea midoakim̃ata‐kiana; te wotu sikai ega ta doko asa mau.

²²Tea kesa, kite gole, kite pito, kite tea waina e peani te nasaraana sikai, kite nakarokaroana, kite navakarago, tea maga wanogoe kuga ta pitua ki da paki Yehovah mau, kite mari navituaana tap̃arakiana sikai ara paki Yehovah doko wede ni naviriana.

²³Kau anoai sikai kite shiip natuna sikai waina e pe veani natawotuna sikai e pe varau kite e pe tika, tea wanogoe ku mariatae pitua ki nia ega vei navituaana suasuakiana sikai; ma ega wo da pei tea midoakim̃ata‐kiana mau raki nasaiana sikai.

²⁴Nalo tuavati waina e peani nalasona e pei wola, kite e pei tea one‐p̃orosiana, kite mawora, kite e pei tea tovae‐kotoviana, tea tapala nogoe kuga ta pitua ki nia paki Yehovah mau; kuga ta mari tea wanogoe doko te tokora ni navanua animu mau.

²⁵Go pae nam̃elearu ni tea ni nalauna p̃ota, kuga ta pitua ki navinaga ki Sup̃e animu ki tea sikai ni tea maga wanogoe mau; nalakena tea sa waina e doko ara, eu da pei tea mamaau p̃ia: euga wo da manimu pei tea midoaki‐m̃ata‐kiana mau.

²⁶Go Yehovah e pasa paki Moses, po naga,

²⁷Ragi waina kau goroi, kite shiip, kite naninani, e pe visola po dape natuna, ragi wanogoe natuna ega toko sikoti p̃ilana naaleatia larua; go pae nakup̃a kelatolu e pataka ni naviriana ni navinaga ni navituaana tap̃arakiana paki Yehovah.

²⁸Go e pe vei kau kite e pe vei shiip goroi sikai, ma kuga ta mari punue ra ma natuna naaleatia sikai maau mau.

²⁹Go ragi waina kuga vitua ki naviriana sikai ni navasa‐dodo‐m̃ata‐kiana paki Yehovah, kuga vitua ki nia pae nap̃op̃o‐suasua‐ana mamau animu naga kuga vei tea midoaki‐m̃ata‐kiana asa.

³⁰Naaleatia sikai maau wanogoe ega vei tea kani‐puti‐ana; kuga ta doropusi te seara kakana ega toko pa pa paki malip̃ogi: kinau a pei Yehovah.

³¹Nalakena tea wanogoe kuga vavaigoro parati ki natip̃akiana aginau maga, po do mari pataka da: kinau a pei Yehovah.

³²Go kuga ta mari m̃oli ki nagisagu tapu mau; ma kinau aga wo dapu m̃aleoputo ni Israel natuna maga: kinau a pei Yehovah waina a dapugoro mu,

³³Waina a piragi lua mu m̃elu dua ki navanua ni Ityipt umai, naga aga vei Sup̃e animu: kinau a pei Yehovah.