Read Nguna Togoa Etafe North LEVITIKO 24 Bible Online

LEVITIKO 24 - Nguna Togoa Etafe North bible

LEVITIKO 24

¹Go Yehovah e pasa paki Moses, po naga,

²P̃a vitip̃aki paki Israel natuna maga naga euga tape naroro wia ni oliva tuki‐p̃oroworosiana umai dua ko asa, ega vei tea ni nasulu, naga nasulu ega to soro sara ragi.

³Etaku ni tea taugoro‐p̃otae ni nanoasokisokiana, doko ekopu ni tap̃aup̃au ni nasaisaiana, Aaron ega mari m̃ata ki nia sara ragi, ega to maramalaga pitip̃atip̃a narae ni Yehovah, pae ragi melu pa pa paki malip̃ogi: ega vei natawonakiana sikai waina ega toko mau doko usuraki tagona animu maga.

⁴Ega mari m̃ata ki nasulu maga doko nakau ni nasulu tautau pitip̃atip̃a narae ni Yehovah.

⁵Go p̃a tape flaur wia, po daoni keke rualima sikai tamate dua asa: namagovai kekerualima dua ni efah sikai ega vei keke sikai.

⁶Go p̃a lawo ki da euga vei ovara dua euga latelatesa doko ovara sikai, doko wede tautau narae ni Yehovah.

⁷Go p̃a toropusi libano wia ega toko ovara maga sikasikai, pilake bred, ega vei namidoaki‐lagati‐ana sikai, navituaana taparakiana sikai paki Yehovah.

⁸Sara naaleatia ni sabbath ega ovara ki nia pitip̃atip̃a narae ni Yehovah; ega magi Israel natuna maga pei tea mariana, ega vei natawonakiana sikai waina ega toko mau doko.

⁹Go ega vei agi Aaron ma natuna naanoai maga; go euga kani a doko tokora tapu sikai: nalakena e pei tea tapu warua liu paki nia ni navituaana tap̃arakiana maga paki Yehovah pae natawonakiana sikai waina ega toko mau doko.

¹⁰Go nagoroi ni Israel natuna naanoai sikai, waina tamana e pei tea ni Ityipt, e dave pano sikoti Israel natuna maga: go nagoroi ni Israel natuna wanogoe, go naatam̃oli sikai ni Israel, ero dum̃ada mari ra doko tokora ni nam̃enakiana;

¹¹Go nagoroi ni Israel natuna e pasa sa ki dip̃a Nagisa, po moro pasa sa ki: go eu piragi a umai punusi Moses. Go nagisa ni p̃ilana e pei Shelomith, e pei Dibri natuna nagoroi, tea ni naworawora ni Dan.

¹²Go eu pitua ki nia paki navavaigoroana, naga euga atae navasap̃otaeana ki Yehovah.

¹³Go Yehovah e pasa paki Moses, po naga,

¹⁴P̃a viragi lua naata waina e pasa sa ki, paki etaku ni tokora ni nam̃enakiana; go tea maga mamau puti waina eu dogo e, euga toropusi nam̃elearuda maga nap̃auna, go nasaisaiana mamau euga nadi a ki vatu.

¹⁵Go p̃a vasa paki Israel natuna maga, po naga, Naata waina e pe vasa sa ki Sup̃e aneana, naata wanogoe ega tapetape namarinaleosaana aneana.

¹⁶Go naata waina e pe vasa sa ki dip̃a nagisa ni Yehovah, naata wanogoe ega vei tea toropusiana paki namateana lomau; nasaisaiana mamau euga nadi a ki vatu lomau: go nam̃enaki ega takiusi naatatoko, e pe vasa sa ki dip̃a nagisa ni Yehovah, e pe wo pei tea toropusiana paki namateana.

¹⁷Go tea waina e p̃okati naatam̃oli sikai, dapala e pe mate, ega vei tea toropusiana paki namateana lomau;

¹⁸Go tea waina e p̃okati nalo tuavati sikai, dapala e pe mate, ega oli a lomau: namauriana ega tip̃a namauriana.

¹⁹Go waina naata sikai e pe mari sa ki tea ni m̃aladigi ki nia; tea waina e mari a, ega moro pei tea mariana liliu paki nia;

²⁰Natawotu ega tip̃a natawotu, namata ega tip̃a namata, napati ega tip̃a napati: tea waina e mari a paki te naata, tea wanogoe ega moro pei tea mariana liliu paki nia.

²¹Go tea waina e mari punue nalo tuavati sikai, ega oli a: go tea waina e mari punue naatam̃oli sikai, ega vei tea toropusiana paki namateana.

²²Kuga veani nawotaeana ni navasap̃otaeana sikai maau, nam̃enaki ega dakiusi naatatoko; nalakena kinau a pei Yehovah Sup̃e animu.

²³Go Moses a pasa paki Israel natuna maga, go eu piragi lua tea waina e pasa sa ki, paki etaku ni nam̃enakiana, go eu nadi a ki vatu. Go Israel natuna maga eu mari pataka ni tea waina Yehovah e dip̃aki Moses asa.