Read Nguna Togoa Etafe North LEVITIKO 27 Bible Online

LEVITIKO 27 - Nguna Togoa Etafe North bible

LEVITIKO 27

¹Go Yehovah e pasa paki Moses, po naga,

²P̃a vasa paki Israel natuna maga, po noa ki da naga, Ragi waina naatam̃oli sikai ega mari nasaiana mamau sikai, p̃a noap̃otae naulu kaka ni naatam̃oli maga wanogoe waina euga vei tea vituakiana paki Yehovah.

³Go nanoap̃otaeana anigo nalo ni naulu ni naanoai ni natau rualima dua pa pa paki natau rualima latesa, p̃a noa naulu kakana ega vei shekel ni silver rualima lima, pae shekel ni tokora tapu.

⁴Go waina e pe vei nagoroi, p̃a noa naulu kakana ega vei shekel rualima dolu.

⁵Go waina e pe vei tea ni natau lima pa pa paki natau rualima dua, ragi wanogoe p̃a noa naulu kaka ni naanoai ega vei shekel rualima dua, go ni nagoroi ega vei shekel rualima sikai.

⁶Go waina e pe vei tea ni atelagi sikai pa pa paki natau lima, ragi wanogoe p̃a noa naulu kaka ni naanoai ega vei shekel lima ni silver, go ni nagoroi ega vei shekel dolu ni silver.

⁷Go waina e pe vei tea ni natau rualima latesa kite do liu; e pe vei naanoai, ragi wanogoe p̃a noa naulu kakana ega vei shekel rualima sikai tamate lima, go ni nagoroi ega vei shekel rualima sikai.

⁸Ma waina e pe tika tea waina e pataka ni nanoap̃otaeana anigo, ragi wanogoe ega vei tea lawo‐ki‐ana narae ni tea viri, go tea viri ega noap̃otae naulu kakana; pataka ni namariataeana ki tea waina e sai a, tea viri ega noap̃otae naulu kakana.

⁹Go waina e pe vei nalo tuavati sikai waina naatam̃oli ega vitua ki nia ega vei naviriana ni navinaga paki Yehovah, tea mamau puti wanogoe waina te naata ega vitua ki nia paki Yehovah ega wo dapu.

¹⁰Ega ta doa panop̃ota ki nia mau, ega ta oli tea wia ki tea sa, kite tea sa ki tea wia mau: go waina e pe oli nalo tuavati, tea wanogoe go tea waina e oli a asa eroga rua dapu.

¹¹Go waina e pe vei nalo tuavati sikai waina e da dautau mau, waina eu da pitua ki nia ega vei naviriana ni navinaga paki Yehovah mau, ragi wanogoe ega viragi nalo tuavati wanogoe umai ega tu narae ni tea viri:

¹²Go tea viri ega noap̃otae naulu kakana, e pe vei tea wia kite tea sa: dapala waina nigo tea viri, p̃a wo noap̃otae naulu kakana, ega tapala nogoe.

¹³Ma waina ega taulua e, ragi wanogoe ega rogovi a ki namagovai kelima kakana, pataka ni nanoap̃otaeana anigo.

¹⁴Go ragi waina naatam̃oli sikai ega tapugoro nasum̃a aneana naga ega tapu paki Yehovah, ragi wanogoe tea viri ega noap̃otae naulu kakana, e pe vei tea wia kite tea sa: dapala waina tea viri ega noap̃otae naulu kakana, ega tapala nogoe.

¹⁵Go waina naatam̃oli wanogoe waina e dapugoro e, e pe taulua nasum̃a aneana, ragi wanogoe ega rogovi a ki namagovai kelima ni naulu ni nanoap̃otaeana anigo, go ega wo pei tea aneana.

¹⁶Go waina naatam̃oli sikai e pe tapugoro paki Yehovah te matele ni vanua ni naveaniana aneana, ragi wanogoe p̃a noap̃otae naulu kakana ega vataka sikai ma napati waina eu lawo e asa: homer sikai ni barle ega vei shekel ni silver rualima lima.

¹⁷Waina e pe tapugoro vanua aneana pae natau ni yubele, pataka ni naulu waina p̃a wo noap̃otae a, ega tapala nogoe doko.

¹⁸Ma waina e pe tapugoro vanua aneana edaku ki natau ni yubele, ragi wanogoe tea viri ega maneana noap̃otae naulu kakana pataka ni natau maga waina eu ko doko pa pa paki natau ni yubele, go naulu ni nanoap̃otaeana anigo ega wo pakitano.

¹⁹Go naata waina e dapugoro vanua wanogoe e pe masau daulua e, ragi wanogoe ega rogovi a ki namagovai kelima ni naulu waina p̃a wo noap̃otae a, go ega wo pei tea aneana lomau.

²⁰Go waina e pe ta masau daulua vanua wanogoe mau, kite e pe sori a paki te naata p̃ota, go ega wo da moro pei tea tauluaana te ragi mau:

²¹Ma vanua wanogoe, waina ega vei tea veresiana natau ni yubele, ega wo dapu paki Yehovah, dapala vanua waina eu dua kotovi a asa; ega vei naveaniana ki tea viri.

²²Go waina e pe tapugoro paki Yehovah vanua sikai waina e pakotovi a, waina e da pei vanua ni naveani‐pioli‐kiana aneana mau;

²³Ragi wanogoe tea viri ega vuausi paki nia naulu kakana pa pa paki natau ni yubele: go naaleatia wanogoe ega vitua ki naulu wanogoe ega tapala naleo tapu sikai paki Yehovah.

²⁴Doko natau ni yubele, vanua wanogoe ega liliu paki tea waina e pakotovi a pae asa, paki tea waina vanua e pei tea aneana dapala naveaniana sikai pae naveani‐pioli‐kiana.

²⁵Go sara naulu waina p̃a wo noap̃otae ra, euga vei shekel ni tokora tapu: cerah rualima dua euga vei shekel sikai.

²⁶Ma takavea ni nalo tuavati maga waina e pei takavea ki Yehovah, te naata ega ta dapugoro e mau; e pe vei oks kite shiip, ma e pei agi Yehovah.

²⁷Go waina e pe vei nalo tuavati sikai waina e da dautau mau, ragi wanogoe ega taulua e, ega tapala naulu waina p̃a wo noap̃otae a, go ega rogovi a ki namagovai kelima kakana: kite waina e pe ta pei tea tauluaana mau, ragi wanogoe ega vei tea soriana pataka ni nanoap̃otaeana anigo.

²⁸Ma te naleo vituakiana waina te naata sikai e pe tua kotovi Yehovah asa ni sara naleo waina e peani a, e pe vei naatam̃oli kite e pe vei nalo tuavati, kite e pe vei vanua ni naveaniana aneana, ega ta pei tea soriana kite dauluaana mau: naleo vitua‐kotovi‐ana mamau puti eu pei tea tapu warua liu paki Yehovah.

²⁹Te navitua‐kotovi‐ana waina naatam̃oli maga eu pitua‐ki‐kotovi a, ega ta pei tea tauluaana mau: ega vei tea toropusiana paki namateana lomau.

³⁰Go sara kekerualima ni natano, e pe vei napati ni vanua, kite e pe vei nawa ni nakau, ma e pei agi Yehovah: e pei tea tapu paki Yehovah.

³¹Go waina te naata sikai e pe taulua te namagovai m̃elu kekerualima aneana, go ega rogovi a ki namagovai kelima kakana.

³²Go sara kekerualima ni navata ni katel, kite ni navata ni shiip go ni naninani, tea mamau puti waina eu surata etano ki tiko, kekerualima kakada ega vei tea tapu paki Yehovah.

³³Ega ta leousiusi a mau, e pe vei tea wia kite e pe vei tea sa, go ega ta oli a mau: go waina e pe oli a, tea wanogoe go tea waina e oli a asa, eroga rua pei tea tapu; ega ta pei tea tauluaana mau.

³⁴Tea maga wanogoe eu pei natip̃akiana maga waina Yehovah e dip̃aki Moses asa doko tava Sinai raki Israel natuna maga.