Read Nguna Togoa Etafe North LEVITIKO 3 Bible Online

LEVITIKO 3 - Nguna Togoa Etafe North bible

LEVITIKO 3

¹Go waina naviriana ni navinaga aneana e pe vei naviriana ni navituaana maga ni natam̃ateana; waina e pe vitua ki tea ni navata ni katel, e pe vei tea anoai kite tea goroi, ega vitua ki nia ega vei tea mamaau p̃ia narae ni Yehovah.

²Go ega toropusi nam̃elearuna nap̃au ni naviriana ni navinaga aneana, po mari punue a namata ni tap̃aup̃au ni nasaisaiana: go Aaron natuna maga, tea viri maga, euga meseura ki nadana wede ni naviriana daliviri.

³Go ega vitua ki naviriana sikai ni navituaana maga ni natam̃ateana, tea mariana pae nakapu paki Yehovah; nap̃eletia waina e kovagoro namaritana maga, go nap̃eletia mamau puti waina e doko namaritana maga.

⁴Go nap̃elekevatuna dua, go nap̃eletia waina e doko ara, waina e doko m̃aladigi ki nawarena maga, go nalaolao waina e doko elagi ki nadanikapuna, pilake nap̃elekevatuna maga, ega tape lua ra.

⁵Go Aaron natuna maga euga tap̃ara ki nia wede ni naviriana, doko elagi ni naviriana tap̃arakiana, waina e doko nakau kokolo doko nakapu: e pei navituaana sikai pae nakapu, tea ni nap̃o lolo paki Yehovah.

⁶Go waina naviriana ni navinaga aneana raki naviriana ni navituaana maga ni natam̃ateana paki Yehovah, e pe vei tea ni navata ni shiip; e pe vei tea anoai kite tea goroi, ega vitua ki nia ega vei tea mamaau p̃ia.

⁷Waina e pe vitua ki shiip natuna sikai raki naviriana ni navinaga aneana, ega vitua ki nia narae ni Yehovah:

⁸Go ega toropusi nam̃elearuna nap̃au ni naviriana ni navinaga aneana, po mari punue a kivea ki tap̃aup̃au ni nasaisaiana: go Aaron natuna maga euga meseura ki nadana wede ni naviriana daliviri.

⁹Go ega vitua ki naviriana ni navituaana maga ni natam̃ateana, navituaana pae nakapu paki Yehovah; nap̃eletiana, napuena m̃anopunopu mamau, ega tape lua e m̃elu dua ki navatu ni nam̃aduna; go nap̃eletia waina e kovagoro namaritana maga, go nap̃eletia mamau puti waina e doko namaritana maga,

¹⁰Go nap̃elekevatuna dua, go nap̃eletia waina e doko ara, waina e doko m̃aladigi ki nawarena, go nalaolao waina e doko elagi ki nadanikapuna, pilake nap̃elekevatuna maga, ega tape lua ra.

¹¹Go tea viri ega tap̃ara ki nia wede ni naviriana: e pei navinaga ni navituaana pae nakapu paki Yehovah.

¹²Go waina naviriana ni navinaga aneana e pe vei naninani sikai, ega vitua ki nia narae ni Yehovah:

¹³Go ega toropusi nam̃elearuna nap̃auna, po mari punue a kivea ki tap̃aup̃au ni nasaisaiana: go Aaron natuna maga euga meseura ki nadana wede ni naviriana daliviri.

¹⁴Go ega vitua ki te seara kakana ega vei naviriana ni navinaga aneana, navituaana pae nakapu paki Yehovah; nap̃eletia waina e kovagoro namaritana maga, go nap̃eletia mamau puti waina e doko namaritana maga.

¹⁵Go nap̃elekevatuna dua, go nap̃eletia waina e doko ara, waina e doko m̃aladigi ki nawarena maga, go nalaolao waina e doko elagi ki nadanikapuna, pilake nap̃elekevatuna maga, ega tape lua ra.

¹⁶Go tea viri ega tap̃ara ki da wede ni naviriana: e pei navinaga ni navituaana pae nakapu, tea ni nap̃o lolo: nap̃eletia mamau puti e pei agi Yehovah.

¹⁷Ega vei natawonakiana sikai waina ega tu du po du mau du usuraki tagona animu maga doko natokoana animu maga mamau puti, naga kuga ta gani nap̃eletia kite nada mau.