Read Nguna Togoa Etafe North LEVITIKO 4 Bible Online

LEVITIKO 4 - Nguna Togoa Etafe North bible

LEVITIKO 4

¹Go Yehovah e pasa paki Moses, po naga,

²P̃a vasa paki Israel natuna maga, po naga, Waina te naata sikai e pe mari naleo sa, pae nasalup̃eana, dip̃a te natip̃akiana maga ki Yehovah nalo ni naleo maga waina euga ta pei tea mariana mau, go e pe mari dip̃a te sikai kakada:

³Waina e pe vei tea viri, tea vuvuraikiana, waina e pe mari naleo sa naga nae e pei nalakena sogi e liko narei; ragi wanogoe ega vitua ki, dip̃a namarinaleosaana aneana waina e mari naleo sa asa, kau anoai vusavusa sikai, tea mamaau p̃ia, ega vei navituaana ni namarinaleosaana paki Yehovah.

⁴Go ega viragi kau anoai vusavusa wanogoe umai paki m̃aladigi ki namata ni tap̃aup̃au ni nasaisaiana narae ni Yehovah; go ega toropusi nam̃elearuna nap̃au ni kau anoai vusavusa wanogoe, po mari punue a narae ni Yehovah.

⁵Go tea viri, tea vuvuraikiana, ega tape kovai nada ni kau anoai vusavusa wanogoe, po piragi a umai paki tap̃aup̃au ni nasaisaiana:

⁶Go tea viri ega pupugi nakinina nadana, po meseura ki nada paka larua narae ni Yehovah, kivea ki nakulukulu taugoro‐p̃otae ni tokora tapu.

⁷Go tea viri ega tape kovai nadana po doropusi a ega toko napati maga ni wede ni naviriana, tea ni nap̃o wia narae ni Yehovah, waina e doko ekopu ni tap̃aup̃au ni nasaisaiana; go ega taki puti nada ni kau anoai vusavusa nalake ni wede ni naviriana ni navituaana tap̃arakiana, waina e doko pisari namata ni tap̃aup̃au ni nasaisaiana.

⁸Go ega tape lua nap̃eletia mamau puti m̃elu dua ki kau anoai ni navituaana ni namarinaleosaana; nap̃eletia waina e kovagoro namaritaana maga, go nap̃eletia mamau puti waina e doko namaritana.

⁹Go nap̃elekevatuna dua, go nap̃eletia waina e doko ara, waina e doko m̃aladigi ki nawarena maga, go nalaolao waina e doko elagi ki nadanikapuna, pilake nap̃elekevatuna maga,

¹⁰ega tape lua ra, Dapala tea maga waina eu pei tea tapeluaana m̃elu dua ki oks ni naviriana ni navituaana maga ni natam̃ateana: go tea viri ega tap̃ara ki da wede ni naviriana ni navituaana tap̃arakiana.

¹¹Go nawili ni kau anoai, go nap̃okasina mamau puti, pilake nap̃auna, go pilake natuana maga, go namaritaana maga,

¹²go nataena, Ega tape lua kau anoai mamau paki etaku ni tokora ni nam̃enakiana, paki tokora tautau sikai, tokora waina natanoapu maga eu pei tea takiana asa, po dap̃ara ki nia doko nakau kokolo ni nakapu: tokora waina natanoapu maga eu pei tea takiana asa, tokora wanogoe ega vei tea tap̃arakiana asa.

¹³Go waina nasaisaiana mamau ni Israel eu pe mari naleo sa pae nasalup̃eana, go naleo wanogoe e pe vei tea tasurukiana paki namata maga ni nasaisaiana, go eu pe mari naleo sikai waina Yehovah e pitip̃aki asa naga ega ta pei tea mariana mau, go sogi e pe liko ara;

¹⁴Ragi waina namarinaleosaana waina eu mari naleo sa asa e pei tea ataeana, ragi wanogoe nasaisaiana mamau ega vitua ki kau anoai vusavusa sikai ega vei navituaana ni namarinaleosaana, po piragi a umai paki kivea ki tap̃aup̃au ni nasaisaiana.

¹⁵Go tea matua maga ni nasaisaiana euga toropusi nam̃elearuda maga nap̃au ni kau anoai wanogoe narae ni Yehovah: go kau anoai wanogoe ega vei tea maripunueana narae ni Yehovah.

¹⁶Go tea viri, tea vuvuraikiana, ega viragi nada ni kau anoai wanogoe umai paki tap̃aup̃au ni nasaisaiana:

¹⁷Go tea viri ega pupugi nakinina nadana, po meseura ki nia paka larua narae ni Yehovah, kivea ki nakulukulu taugoro‐p̃otae.

¹⁸Go ega tape kovai nadana po doropusi a ega toko napati ni wede ni naviriana waina e doko narae ni Yehovah, waina e doko ekopu ni tap̃aup̃au ni nasaisaiana, go ega taki lua nada mamau puti nalake ni wede ni naviriana ni navituaana tap̃arakiana, waina e doko pisari namata ni tap̃aup̃au ni nasaisaiana.

¹⁹Go ega tape lua puti nap̃eletia m̃elu dua ki nia, po dap̃ara ki nia wede ni naviriana.

²⁰Ega mari dapala nogoe paki kau anoai wanogoe; dapala waina e mari a paki kau anoai ni navituaana ni namarinaleosaana, dapala nogoe ega moro mari a paki tea waia: go tea viri ega madeada mari natap̃augoroana, go ega madeada pei tea midoakikorokoroana.

²¹Go ega tape lua kau anoai wanogoe paki etaku ni tokora ni nam̃enakiana, po dap̃ara ki nia dapala waina e dap̃ara ki kau anoai vea: e magi nasaisaiana pei navituaana ni namarinaleosaana.

²²Waina tea maraki sikai e pe mari naleo sa pae nasalup̃eana dip̃a naleo maga mamau puti sikai kakada, waina Yehovah Sup̃e aneana e pitip̃aki asa naga euga ta pei tea mariana mau, go sogi e pe liko asa;

²³Waina namarinaleosaana aneana waina e mari naleo sa asa, e pe vei tea noasaiana paki nia; ega viragi naninani sikai umai, tea anoai tea mamaau p̃ia, ega vei naviriana ni navinaga aneana;

²⁴Go ega toropusi nam̃elearuna nap̃au ni naninani wanogoe, po mari punue a tokora waina eu do mari punue navituaana tap̃arakiana asa narae ni Yehovah: e pei navituaana sikai ni namarinaleosaana.

²⁵Go tea viri ega tape kovai nada ni navituaana ni namarinaleosaana ki nakinina, po doropusi a ega toko napati maga ni wede ni naviriana ni navituaana tap̃arakiana, go ega taki lua puti nada nalake ni wede ni naviriana ni navituaana tap̃arakiana.

²⁶Go ega tap̃ara ki nap̃eletiana mamau puti wede ni naviriana, ega tapala nap̃eletia ni naviriana ni navituaana maga ni natam̃ateana: go tea viri ega maneana mari natap̃augoroana nalo ni namarinaleosaana aneana, go ega maneana pei tea midoakikorokoroana.

²⁷Go waina te naata sikai ni narei maga ni navanua e pe mari naleo sa pae nasalup̃eana dip̃a naleo maga mamau puti sikai kakada, waina Yehovah e pitip̃aki asa naga euga ta pei tea mariana mau; go sogi e pe liko asa;

²⁸Go waina namarinaleosaana aneana waina e mari naleo sa asa, e pe vei tea noasaiana paki nia, ragi wanogoe ega viragi naninani sikai umai, tea goroi tea mamaau p̃ia, ega vei naviriana ni navinaga aneana dip̃a namarinaleosaana aneana waina e mari naleo sa asa.

²⁹Go ega toropusi nam̃elearuna nap̃au ni navituaana ni namarinaleosaana, po mari punue navituaana ni namarinaleosaana wanogoe tokora ni navituaana tap̃arakiana.

³⁰Go tea viri ega tape kovai nadana ki nakinina, po doropusi a ega toko napati maga ni wede ni naviriana ni navituaana tap̃arakiana, go ega taki lua puti nadana nalake ni wede ni naviriana.

³¹Go ega tape lua nap̃eletiana mamau puti ega tapala waina nap̃eletia e pei tea tapeluaana m̃elu dua ki naviriana ni navituaana maga ni natam̃ateana; go tea viri ega tap̃ara ki nia wede ni naviriana, ega vei nap̃o lolo paki Yehovah; go tea viri ega maneana mari natap̃augoroana, go ega maneana pei tea midoakikorokoroana.

³²Go waina e pe viragi shiip natuna sikai umai raki navituaana ni navinaga aneana ni navituaana ni namarinaleosaana, ega viragi a umai ega vei tea goroi, tea mamaau p̃ia.

³³Go ega toropusi nam̃elearuna nap̃au ni navituaana ni namarinaleosaana, po mari punue a raki navituaana ni namarinaleosaana, tokora waina eu do mari punue navituaana tap̃arakiana asa.

³⁴Go tea viri ega tape kovai nada ni navituaana ni namarinaleosaana ki nakinina, po doropusi a ega toko napati maga ni wede ni naviriana ni navituaana tap̃arakiana, go ega taki lua nadana mamau puti nalake ni wede ni naviriana:

³⁵Go ega tape lua nap̃eletiana mamau puti ega tapala waina nap̃eletia ni shiip natuna e pei tea tapeluaana m̃elu dua ki naviriana ni navituaana maga ni natam̃ateana; go tea viri ega tap̃ara ki da wede ni naviriana, euga toko navituaana maga paki Yehovah pae nakapu: go tea viri ega maneana mari natap̃augoroana nalo ni namarinaleosaana waina e mari naleo sa asa, go ega maneana pei tea midoakikorokoroana.