Read Nguna Togoa Etafe North LEVITIKO 5 Bible Online

LEVITIKO 5 - Nguna Togoa Etafe North bible

LEVITIKO 5

¹Go waina te naata sikai e pe mari naleo sa, e pe rogo navasaana ni navivisaana, go e pei tea noasokisoki sikai waina ega noasai e pe vunusi a kite e pe atae a, go waina e pe ta noasai a mau, ragi wanogoe ega tapetape namarinaleotageleana aneana:

²Kite waina sikai e pe kisidogo te navatuna waina e loa, e pe vei nap̃atoko mate sikai ni nalo mauri waina e loa, kite e pe vei nap̃atoko mate sikai ni katel waina eu loa, kite e pe vei nap̃atoko mate sikai ni nalo kakaravi maga waina eu loa, go e pe vei tea tasurukiana pae asa, go nae e pe loa, ragi wanogoe sogi ega liko asa:

³Kite waina e pe kisidogo nap̃atoko ni naatam̃oli waina e loa pae te navatuna waina e loa asa, go e pe vei tea tasurukiana pae asa; ragi waina e po atae a, ragi wanogoe sogi ega liko asa:

⁴Kite waina te naata sikai e pe vasa p̃aragoto ki nagolena maga, po pivisa naga ega mari tea sa, kite naga ega mari tea wia, ki te navatuna waina naata sikai e pe vasa p̃aragoto asa ki navivisaana sikai, go e pe vei tea tasurukiana pae asa; ragi waina e po atae a, ragi wanogoe sogi ega liko asa nalo ni naleo maga wanogoe sikai kakada:

⁵Go ega wo doko, ragi waina sogi e pe liko asa doko tea sikai ni tea maga wanogoe, naga ega noasai namarinaleosaana waina e po mari naleo sa asa:

⁶Go ega viragi navituaana ni natapiriana aneana umai paki Yehovah, nalakena namarinaleosaana aneana waina e po mari naleo sa asa, tea goroi sikai m̃elu navata, shiip natuna sikai kite naninani sikai, raki navituaana ni namarinaleosaana; go tea viri ega maneana mari natap̃augoroana nalo ni namarinaleosaana aneana.

⁷Go waina naleo aneana e pe ta pataka naga ega viragi shiip natuna sikai umai, ragi wanogoe ega viragi navituaana ni natapiriana aneana umai paki Yehovah, nalo ni tea waina e mari naleo sa asa, ega vei taroa dua kite tokopea vusavusa dua; sikai raki navituaana ni namarinaleosaana, go kerua raki navituaana tap̃arakiana.

⁸Go ega viragi ra umai punusi tea viri, go nae ega vitua ki tea vea raki navituaana ni namarinaleosaana, go ega viloki kotovi lua nap̃auna m̃elu dua ki nanoana, ma ega ta dap̃oraworae a mau:

⁹Go ega meseura ki nada seara ni navituaana ni namarinaleosaana nadigi ni wede ni naviriana; go nada waina e doko, ega vei tea taki‐puti‐ana nalake ni wede ni naviriana: e pei navituaana sikai ni namarinaleosaana.

¹⁰Go ega vitua ki kerua raki navituaana tap̃arakiana, pataka ni natawonakiana: go tea viri ega maneana mari natap̃augoroana nalo ni namarinaleosaana aneana waina e po mari naleo sa asa, go ega maneana pei tea midoakikorokoroana.

¹¹Ma waina naleo aneana e pe ta pataka ni taroa dua, kite tokopea vusavusa dua, ragi wanogoe ega viragi naviriana ni navinaga aneana umai dip̃a tea waina e mari naleo sa asa, ega vei kekerualima ni efah ni flaur wia, raki navituaana ni namarinaleosaana; ega ta daki naroro asa mau, go ega ta doropusi libano asa mau: nalakena e pei navituaana ni namarinaleosaana.

¹²Go ega viragi a umai punusi tea viri, go tea viri ega tape te seara ki nam̃elearuna ega vura, ega vei namidoaki‐paratikiana kakana, po dap̃ara ki nia wede ni naviriana, doko navituaana maga ki Yehovah pae nakapu: e pei navituaana sikai ni namarinaleosaana.

¹³Go tea viri ega maneana mari natap̃augoroana nalo ni namarinaleosaana aneana waina e mari naleo sa asa, doko te naleo sikai ni naleo maga wanogoe, go ega maneana pei tea midoakikorokoroana: go tea waina e doko ega vei agi tea viri, dapala navituaana ni flaur.

¹⁴Go Yehovah e pasa paki Moses, po naga,

¹⁵Waina te naata sikai e pe mari te natapiriana sikai po mari naleo sa pae nasalup̃eana nalo ni naleo tapu maga ki Yehovah; ragi wanogoe ega viragi navituaana ni natapiriana aneana umai paki Yehovah, shiip anoai sikai tea mamaau p̃ia m̃elu navata, waina p̃a noa p̃otae naulu kakana pae shekel ni silver, shekel ni tokora tapu, ega vei navituaana sikai ni natapiriana:

¹⁶Go ega lagati tea waina e mari naleo sa asa nalo ni naleo tapu, go ega sokari a ki namagovai kelima kakana, po dua tea viri asa: go tea viri ega maneana mari natap̃augoroana ki shiip anoai ni navituaana ni natapiriana, go ega maneana pei tea midoakikorokoroana.

¹⁷Go waina te naata sikai e pe mari naleo sa, po mari te navatuna sikai ni naleo maga waina Yehovah e pitip̃aki asa naga euga ta pei tea mariana mau; e pe ta atae a mau, ma sogi ega liko asa, go ega tapetape namarinaleotageleana aneana.

¹⁸Go ega viragi shiip anoai sikai umai punusi tea viri, tea mamaau p̃ia m̃elu navata, pataka ni nanoap̃otaeana anigo, ega vei navituaana sikai ni natapiriana: go tea viri ega maneana mari natap̃augoroana dip̃a naleo waina e mari naleo sa asa pae nasalup̃eana, go ega maneana pei tea midoakikorokoroana.

¹⁹E pei navituaana sikai ni natapiriana: sogi e liko asa lomau narae ni Yehovah.