Read Nguna Togoa Etafe North LEVITIKO 6 Bible Online

LEVITIKO 6 - Nguna Togoa Etafe North bible

LEVITIKO 6

¹Go Yehovah e pasa paki Moses, po naga,

²Waina te naata sikai e pe mari naleo sa, po mari natapiriana sikai dip̃a Yehovah, po mari malauweluki paki tea ni m̃aladigi ki nia nalo ni naleo sikai waina e maneana pavaigoro e, kite nalo ni nanadisokiana, kite nalo ni navanakoana, kite e pe riesoki tea ni m̃aladigi ki nia:

³Kite e pe vap̃ai tea waina e puoli, po pasagoro e, po pivisa sorosoro; doko te navatuna ni naleo maga wanogoe waina naatam̃oli sikai e pe mari a, po mari naleo sa asa:

⁴Ragi wanogoe ega wo doko, waina e pe mari naleo sa go sogi e liko asa, naga ega liliua ki tea waina e dape pavakoto asa, kite tea waina e dape a pae namari‐kasua‐ki‐ana, kite tea waina e pei tea vituakiana paki nia naga ega vavaigoro e, kite naleo waina e puoli go e pap̃ai a,

⁵Kite te naleo waina e pivisa sorosoro asa; ega liliua ki puti a, go ega sokari a ki namagovai kelima kakana: go ega vitua ki nia paki tea waina e pei talakeana, naaleatia wanogoe waina e pei tea ataeana naga sogi e liko asa.

⁶Go ega viragi navituaana ni natapiriana aneana umai paki Yehovah, shiip anoai sikai m̃elu navata, tea mamaau p̃ia, pataka ni nanoap̃otaeana anigo, ega vei navituaana sikai ni natapiriana paki tea viri:

⁷Go tea viri ega maneana mari natap̃augoroana narae ni Yehovah, go ega maneana pei tea midoakikorokoroana; nalo ni te naleo sikai waina e mari a go pae asa sogi e liko asa.

⁸Go Yehovah e pasa paki Moses, po naga,

⁹P̃a tip̃aki Aaron go natuna maga, po naga, Tea waia e pei nawotaeana ni navituaana tap̃arakiana: navituaana tap̃arakiana ega one nakapu doko wede ni naviriana p̃ogi mamau pa pa paki malip̃ogi; go nakapu ega to pavaga doko wede ni naviriana.

¹⁰Go tea viri ega suni sugoro ni linen aneana, go ega kovagoro nawilina ki tea vasiana vuru ni linen aneana; go ega tape lua natanoapu maga ni nakapu waina e pei tea kani‐puoli‐kiana pilake navituaana tap̃arakiana doko wede ni naviriana, go ega toropusi ra nadigi ni wede ni naviriana.

¹¹Go ega sawo lua sugoro aneana maga, po suni oli ra ki sugoro p̃ota maga, po dape lua natanoapu maga pano paki etaku ni tokora ni nam̃enakiana, paki tokora tautau sikai.

¹²Go nakapu waina e doko wede ni naviriana ega to pavaga asa, ega ta mate mau; go tea viri ega to dap̃ara ki nakau kokolo asa sara malip̃ogi: go ega toropusi navituaana tap̃arakiana asa, go ega tap̃ara ki nap̃eletia ni navituaana maga ni natam̃ateana asa.

¹³Nakapu ega to pavaga wede ni naviriana pitip̃atip̃a; go ega ta mate mau.

¹⁴Go tea waia e pei nawotaeana ni navituaana ni flaur: Aaron natuna maga euga vitua ki nia narae ni Yehovah, kivea ki wede ni naviriana.

¹⁵Go ega tape lua aneana kiana nam̃elearuna ega vura, ki flaur wia ni navituaana ni flaur, pilake naroro kakana, go libano mamau puti waina e doko elagi ni navituaana ni flaur, go ega tap̃ara ki nia wede ni naviriana, tea ni nap̃o lolo, e pei namidoaki‐parati‐kiana kakana paki Yehovah.

¹⁶Go tea tupele, Aaron ma natuna maga euga kani a: leven ega tika asa, go ega vei tea kaniana tokora tapu sikai; doko roara ni tap̃aup̃au ni nasaisaiana, euga kani a asa.

¹⁷Ega vei tea taoniana leven ega tika asa. A po pitua ki nia e pei namagovai adeada ni navituaana aginau maga pae nakapu: e pei tea tapu warua liu, e dakiusi navituaana ni namarinaleosaana, go navituaana ni natapiriana.

¹⁸Aaron natuna naanoai maga mamau puti euga kani a, ega vei natawonakiana sikai waina ega tu mau du usuraki tagona animu maga, m̃elu navituaana maga paki Yehovah pae nakapu: sara naata waina eu kisidogo ra, euga tapu.

¹⁹Go Yehovah e pasa paki Moses, po naga,

²⁰Tea waia e pei naviriana ni navinaga ki Aaron go ki natuna maga, waina euga vitua ki nia paki Yehovah naaleatia waina ega vei tea vuvuraikiana; namagovai kerualima ni efah ni flaur wia ega vei navituaana ni flaur ni sara naaleatia, namagovai sikai malip̃ogi, go namagovai kerua ragi melu.

²¹Ega vei tea veniana pilake naroro doko vatu; ragi waina ega maso, p̃a tape a umai: tea mateletele veniana maga p̃a vitua ki da euga vei navituaana ni navinaga, tea ni nap̃o lolo paki Yehovah.

²²Go tea viri natuna sikai waina e pei tea vuvuraikiana doko oli a, ega vitua ki nia: e pei natawonakiana doko mau doko paki Yehovah; ega vei tea tap̃ara‐ki‐puti‐ana.

²³Go sara navituaana ni flaur ki tea viri ega vei tea tap̃ara‐ki‐puti‐ana: ega ta pei tea kaniana mau.

²⁴Go Yehovah e pasa paki Moses, po naga,

²⁵P̃a vasa paki Aaron go paki natuna maga, po naga, Tea waia e pei nawotaeana ni navituaana ni namarinaleosaana: tokora waina navituaana tap̃arakiana e pei tea maripunueana asa, tokora wanogoe navituaana ni namarinaleosaana ega vei tea maripunueana asa narae ni Yehovah: e pei tea tapu warua liu.

²⁶Tea viri waina ega vitua ki nia dip̃a namarinaleosaana, ega kani a: ega vei tea kaniana tokora tapu sikai, roara ni tap̃aup̃au ni nasaisaiana.

²⁷Tea mamau puti waina eu kisidogo nap̃okasina, euga tapu: go waina te nada e pe siri ki te sugoro, p̃a sarue lua tea waina e siri ki nia tokora tapu sikai.

²⁸Go lasa ni naruku waina e pei tea veniana asa, ega vei tea marip̃oraworaeana: go waina e pe vei tea veniana lasa ni brass, ega vei tea soro‐kasua‐kiana, po pei tea sarue‐lua‐ana ki noai.

²⁹Sara tea viri naanoai maga euga kani a: e pei tea tapu warua liu.

³⁰Go te navituaana ni namarinaleosaana sikai, waina nadana e pei tea viragiana umai paki ekopu ni tap̃aup̃au ni nasaisaiana, naga ega vei natap̃augoroana tokora tapu, ega ta pei tea kaniana mau: ega vei tea tap̃arakiana ki nakapu.