Read Nguna Togoa Etafe North YEREMIAH 1 Bible Online

YEREMIAH 1 - Nguna Togoa Etafe North bible

YEREMIAH 1

¹Navasaana maga ki Yeremiah natu ni Hilkiah, ni tea viri maga waina eu doko Anathoth, navanua ni Benyamin:

²Navasaana ki Yehovah e umai paki nia naaleatia maga ki Yosiah natu ni Amon, nawota ni Yudah, doko natau kerualima sikai tamate dolu ni namaramaraana aneana.

³E umai pataka sikai naaleatia maga ki Yehoiakim natu ni Yosiah, nawota ni Yudah, go pa pa paki namatap̃ago ni natau kerualima sikai tamate sikai ki Sedekiah natu ni Yosiah, nawota ni Yudah; go pa pa paki ragi ni naviragi‐lua‐pavakotoana ni Yerusalem doko atelagi kelima.

⁴Go navasaana ki Yehovah e umai paki nau,

⁵e naga, Ragi waina a ko da lakea ki‐go doko nap̃ele, ma a matadoa ko, go ragi waina ku ko da pakilina m̃elu nasum̃a ni kanao, ma a dapugoro ko; a dawona ki‐go ku pei profeta sikai paki nalauna maga.

⁶Go kinau a noa naga, Yehovah Sup̃e O, p̃a leo, kinau a da atae takana waina aga vasa: nalakena a pei piakiki sikai.

⁷Ma Yehovah e noa kinau, e naga, P̃a ta noa naga, Kinau a pei piakiki sikai: nalakena tea mamau puti waina aga wo dip̃aki lua ko paki asa, p̃a wo paki asa pano, go tea waina aga wo dip̃aki‐go asa, p̃a wo pasa asa.

⁸P̃a ta matau ki da mau: nalakena kinau a sikoti ko naga aga mauti ko, Yehovah e noa e.

⁹Go Yehovah e sai ki nam̃elearuna, po kisidogo nagolegu; go Yehovah e noa kinau, e naga, P̃a leo, a po doropusi navasaana aginau maga eu doko nawokam̃a:

¹⁰P̃a vunusi, naaleatia waia a po lawo ki‐go dap̃au nalauna maga go dap̃au namarakiana maga, naga p̃a vaku dakati go naga p̃a rakai, go naga p̃a mari puoli ki go naga p̃a tap̃olosiwo ki; naga p̃a tavagi, go naga p̃a lalawo.

¹¹Go navasaana ki Yehovah e umai paki nau, e naga, Yeremiah, ku punusi nasava? Go a noa naga, A punusi tiko sikai ni nakau amond.

¹²Go Yehovah e noa kinau, e naga, Ku po punusi leana: nalakena kinau a do pavaigoro navasaana aginau naga aga vakavuro e.

¹³Go navasaana ki Yehovah e umai paki nau sala kerua, e naga, Ku punusi nasava? Go a noa naga, A punusi lasa veniana sikai waina e do lotalota; go kivea kakana e do leo pae north.

¹⁴Go Yehovah e noa kinau, e naga, Nasaana ega wo m̃elu north umai po duap̃ora paki naatatoko maga mamau puti ni navanua.

¹⁵Nalakena p̃a leo, aga wo soso naworawora maga mamau puti ni namarakiana maga ni north, Yehovah e noa e; go euga wo umai, go euga wo lawo ki malo tasake adeada sikasikai doko tokora ni nasiliana ni namata‐pua maga ni Yerusalem, go dip̃a p̃aaka kakana maga daliviri, go dip̃a natokoana maga mamau puti ni Yudah.

¹⁶Go aga wo lua ki navasap̃otaeana aginau maga dip̃a ra nalo ni nasigisigileoana adeada mamau puti; nalakena eu doropusi au, po dap̃ara ki tea ni nap̃o wia paki sup̃e p̃ota maga, po lotu ki nawosiana maga ni nam̃elearuda maga.

¹⁷Nalakena tea wanogoe p̃a tum̃am̃a dasoki namalom̃a, po duleana, po pasa paki da ki tea mamau puti waina a dip̃aki‐go asa: p̃a ta m̃anaunau nalo kakada mau, mase kinau a pe mari ko nam̃anaunauana naraeda.

¹⁸Nalakena p̃a leo, naaleatia waia a mari ko ku pei natokoana p̃aakagoroana sikai, go vatu lawodu sikai, go nakoro maga ni brass, dip̃a navanua mamau, go dip̃a nawota maga ni Yudah, dip̃a tea maraki kakana maga, dip̃a tea viri kakana maga, go dip̃a narei ni navanua.

¹⁹Go nara euga wo marimari dip̃a ko; ma euga wo da marimatua ki‐go mau: nalakena kinau a sikoti ko doko, naga aga vualua ko, Yehovah e noa e.