Read Nguna Togoa Etafe North YEREMIAH 10 Bible Online

YEREMIAH 10 - Nguna Togoa Etafe North bible

YEREMIAH 10

¹Kuga rogo navasaana waina Yehovah e noa ki mu asa, nasum̃a ni Israel O:

²Yehovah e noa dapala nea, e naga, Kuga ta ataedogo napua ki tea ni nalauna p̃ota maga mau, go kuga ta m̃anaunau nalo ni navaivaiana maga ni nakoroatelagi mau; nalakena tea ni nalauna p̃ota maga eu m̃anaunau nalo kakada.

³Nalakena natomariana maga ki narei maga eu pei tea p̃alo: nalakena tea sikai e dae kotovi nakau sikai mala ni nakau, nawosiana ni nam̃elearu ni naatam̃oli mataisau waina e p̃osiwosi ki nia ki tagoto sikai.

⁴Eu dekei ki nia ki silver go ki kold; eu durisoki a ki tea tuturi maga go ki hammer maga, naga ega ta parivari mau:

⁵Nasup̃e adeada maga eu dakiusi aroaro maga roara ni kukumpa, eu da pasa mau: e one ara one naga euga vei tea tapetapeana, nalakena eu da mariatae dum̃ada surata mau. Kuga ta matau ki da mau; nalakena eu da mariatae mari tea sa mau, go e da doko ara mau naga euga mari tea wia.

⁶Tea takiusi ko e dika, Yehovah O; nigo ku p̃arua, go nagisam̃a e p̃arua go e marimatua.

⁷Sei ega wo da matau ki‐go, Nawota ni nalauna maga O? Nalakena e pei tea anigo: nalakena tea waina e dakiusi ko e dika m̃aleoputo ni naatam̃oli manumatua maga mamau puti ni nalauna maga, go usuraki namarakiana adeada maga.

⁸Ma eu pei taua malasi waina eu midoaki sap̃o; navasapiseikiana ki nasup̃e maga e da pei te navatuna mau, e pei nakau m̃oli!

⁹Silver waina e pei tea wokati‐p̃elewelea‐kiana e manivenive, e pei tea viragiana pae Tarshish umai, go kold pae Ufas, eu pei nawosiana ki tea wosiwosi kakana, go ni nam̃elearu ni tea vei mataisau ni kold; tea suniana adeada e pei tea miala‐kalakala go tea mialakesakesa; eu mamau puti pei nawosiana ki naatam̃oli midoakiatae maga.

¹⁰Ma Yehovah e pei Sup̃e ni nalomauana; nae e pei Sup̃e mauri, go nawota du mau du: maramana e duruuru namaritausuana aneana, go nalauna maga eu da mariatae soki namaetoana aneana mau.

¹¹Kuga noa ega tapala nea paki da, kuga naga, Sup̃e maga waina eu da mari nakoroatelagi maga go maramana mau, nara euga wo pano puoli m̃elu dua ki maramana, go m̃elu dua ki etano ki nakoroatelagi maga.

¹²Nae e mari maramana doko namarimatuaana aneana, nae e lawoki‐laketoko asa doko namanumatuaana aneana, go doko namidoakiatae‐ana aneana e sai ki nakoroatelagi maga:

¹³Ragi waina e do lua ki nadaleona, nasaruruana ni noai maga e doko nakoroatelagi maga, go e do mari namavu maga eu sake pae namatap̃ago maga ni maramana; e do magi usa mari navila maga, go e do piragi nalagi e dave m̃elu dua ki nasum̃a ni naleo tauakiana aneana maga.

¹⁴Sara naatam̃oli eu pei lala puti, eu dika naataeana; sara naatam̃oli mataisau ni kold eu pei tea toropusiana paki namaliereana nalakena nasup̃e taeana adeada maga: nalakena nasup̃e takiana adeada maga eu mamau puti pei nasorosoroana, go te namero e da doko ara mau.

¹⁵Eu pei tea p̃alo, nawosiana sikai ni namidoakisap̃oana: doko ragi ni namaridogo‐ra‐ana euga wo pano puoli.

¹⁶Tea veanip̃otaeana ki Yakob e da dakiusi tea maga wanogoe mau; nalakena nae e pei tea tawonaki sara naleo mamau puti; go Israel e pei naworawora ni tea veanipioli‐kiana aneana: Yehovah ki taua maga e pei nagisana.

¹⁷P̃a tape dakati tum̃ana anigo, nigo waina ku pei tea kelugoroana O.

¹⁸Nalakena Yehovah e noa dapala nea, e naga, P̃a leo, sala waia aga wo sila ki lua naatatoko maga ni navanua euga vano, go aga wo mari ra nariesokiana, naga euga ataedogo e.

¹⁹Ai kinau nalakena navitinuana aginau! Wotu aginau e p̃arua: ma a naga, Lomau tea waia e pei nariesokiana sikai, go e one au one naga aga soki a.

²⁰Tap̃aup̃au aginau e pei tea tapepavakotoana, go natali aginau maga mamau puti eu makoto: natugu maga eu m̃elu dua kinau pano, go eu da moro doko mau: tea waina ega maginau sike lawo ki tap̃aup̃au aginau e dika, go waina ega maginau sara ki tea taugoro‐p̃otae aginau.

²¹Nalakena tea leoparatiki maga eu po manumatavusa, go eu da pusuusu paki Yehovah mau: nalakena tea wanogoe eu da mari manumatua mau, go navata adeada maga mamau puti eu pei tea taperaverakiana.

²²P̃a leo, nadaleo ni narogorogoana sikai e umai, go navasap̃araiana warua sikai e pae navanua ni north umai, naga ega mari natokoana maga ni Yudah euga vei maso maladi sikai, valea sikai ki koria mila maga.

²³Yehovah O, a atae naga napua ki naatam̃oli e da pei aneana mau: e da pei tea ki naatam̃oli waina e do surata, naga ega tum̃ana lawo‐ki‐laketoko navasiana aneana maga mau.

²⁴Yehovah O, p̃a vasa kasua kinau, ma ega vae totowo leana; ega ta pei ki namaetoana anigo mau, mase ku pe mari au a pe sirinopu.

²⁵P̃a taki namaritausuana anigo paki nalauna maga waina eu da atae ko mau, go paki naworawora maga waina eu da pioso paki nagisam̃a mau: nalakena eu gani dinomi Yakob, eu gani dinomi a, po mari puoli ki nia, go eu mari natokoana aneana e pei maso maladi one.