Read Nguna Togoa Etafe North YEREMIAH 11 Bible Online

YEREMIAH 11 - Nguna Togoa Etafe North bible

YEREMIAH 11

¹Navasaana waina e pae Yehovah umai paki Yeremiah,

²e naga, Kuga rogo navasaana maga ni navasasokiana waia, po pasa paki naatam̃oli maga ni Yudah, go paki naatatoko maga ni Yerusalem;

³Po noa ki da, naga, Yehovah Sup̃e ki Israel e noa dapala nea, e naga, Naatam̃oli ega vei tea vasasakiana, waina ega wo da dogo parati ki navasaana maga ni navasasokiana waia mau,

⁴Waina a dip̃aki tamamu maga asa doko naaleatia waina a piragi lua ra m̃elu dua ki navanua ni Ityipt umai, m̃elu dua ki upu ni vatu, doko do naga, Kuga rogo parati ki nadaleogu, po mari ega vataka ni tea mamau puti waina a dip̃aki mu ara: dapala nogoe kuga wo pei narei aginau, go aga wo pei Sup̃e animu:

⁵Naga aga lawosoki navivisaana waina a pivisa asa paki tamamu maga, naga aga tua ra navanua sikai waina e sara ki milk go ki honi, dapala waina e doko naaleatia waia. Go kinau a pasadara, po naga, Amen, Yehovah O.

⁶Go Yehovah e noa kinau, e naga, P̃a rogorogo ki navasaana maga mamau puti waia natokoana maga ni Yudah, go napua maga ni Yerusalem, doko do naga, Kuga rogo navasaana maga ni navasasokiana waia, po mari patakana.

⁷Nalakena kinau a noasokisoki paki tamamu maga doko naaleatia waina a piragi lua ra sake m̃elu dua ki navanua ni Ityipt umai, go pa pa paki naaleatia waia, a noasokisoki pitip̃atip̃a, doko do naga, Kuga rogo parati ki nadaleogu.

⁸Ma eu da dogo parati kinau kite daki nadaligada mau, ma eu mamau puti surata doko navei‐p̃au‐kasuaana ni nap̃op̃osaana adeada: nalakena tea wanogoe aga wo piragi navasaana maga mamau puti ni navasasokiana waia paki da, waina a dip̃aki da asa naga euga mari ra, ma eu da mari ra mau.

⁹Go Yehovah e noa kinau, e naga, Namaridip̃aana sikai e pei tea vap̃aiana m̃aleoputo ni naatam̃oli maga ni Yudah, go m̃aleoputo ni naatatoko maga ni Yerusalem.

¹⁰Eu maradoa liliu paki namarinaleotageleana maga ki tea matua vea adeada maga, waina eu karai dogo navasaana aginau maga; go eu pano po dausi sup̃e p̃ota maga naga euga madeada suasua: nasum̃a ni Israel go nasum̃a ni Yudah eu mari kotovi navasasokiana aginau waina a mari a paki tamada maga.

¹¹Nalakena tea wanogoe Yehovah e noa dapala nea, e naga, Kuga leo, aga wo piragi tea sa paki da, waina euga wo da mariatae sava m̃elu dua ki nia mau; go euga wo pioso paki nau, ma aga wo da daki dorogo paki da mau.

¹²Go natokoana maga ni Yudah, go naatatoko maga ni Yerusalem euga wo pano po pioso paki sup̃e maga waina eu do dap̃ara ki tea ni nap̃o wia paki da: ma nara euga wo da mauti ra doko ragi ni narogokitesaana adeada mau.

¹³Nalakena pataka ni naveveana ni natokoana anigo maga, naveveana ni sup̃e anigo maga e pataka sikai, Yudah O; go pataka ni naveveana ni napua maga ni Yerusalem, naveveana ni wede maga ni naviriana waina ku sike lawo ki da, naga kuga tap̃ara ki tea ni nap̃o wia ara paki Baal, e pataka sikai.

¹⁴Nalakena tea wanogoe p̃a ta magi narei waia pavara mau, kite sike naviosoana mau, kite natapasavasaana mau: nalakena aga wo da daki dorogo paki da mau ragi waina euga wo pioso paki nau doko ragi ni narogokitesaana adeada.

¹⁵Ekasana tea dodomiana e mari tea mamaragokiana maga ekopu ni nasum̃a aginau? Nasaiana maga go nap̃okasi tapugoroana euga wo dape lua nasigisigileoana anigo maga pa dua ki‐go pano kite? Kite p̃a wo pei tea mautiana pae ara, kite?

¹⁶Yehovah e salagisam̃a ki nakau oliva malakesa, tea leom̃atakiana waina e dau ki nawa wia: ma ki namarip̃araiana warua, nae ega wo dokoni nakapu asa, go arana maga euga wo pei tea kani‐puolikiana.

¹⁷Nalakena Yehovah ki taua maga waina e lawo ko, e dawona ki nasaana dip̃a ko, nalakena namarinaleosaana ni nasum̃a ni Israel go ni nasum̃a ni Yudah, waina eu dum̃ada madeada mari a, doko do dap̃ara ki tea ni nap̃o wia paki Baal, po mari au a maeto.

¹⁸Go Yehovah e mari a e pei tea ataeana paki nau, go a atae a: go nigo ku pisei kinau namariana sa adeada maga.

¹⁹Ma kinau a dakiusi shiip natuna matemate sikai waina e pei tea viragiana pano paki namaripunueana; a da atae naga eu midoakip̃ai namidoakip̃aiana maga dip̃a au mau, doko do naga, Tuga mari puoli ki nakau wanogoe, go nawa kakana, go tuga taelua e m̃elu dua ki navanua ki tea mauri maga, naga nagisana ega ta moro pei tea midoakiana mau.

²⁰Ma Yehovah ki taua maga O, waina ku do pasap̃otae leana, waina ku do maridogo nap̃elekevatu maga go nap̃op̃o, aga wo punusi nasikoana anigo waina p̃a wo mari a paki da: nalakena a noa pakasa ki navululuana aginau paki‐go.

²¹Nalakena tea wanogoe Yehovah e noa dapala nea nalo ni naatam̃oli maga ni Anathoth, waina eu do laaga namauriana aginau, doko do naga, P̃a ta peanoasai ki nagisa ni Yehovah mau, naga p̃a ta mate ki nam̃elearugami mau:

²²Nalakena tea wanogoe Yehovah ki taua maga e noa dapala nea, e naga, Kuga leo, aga wo parati ra: natureai maga euga wo mate ki lova; natuda naanoai maga go natuda nagoroi maga euga wo mate ki navitoloana;

²³Go te namagovai kakada ega wo da madeada pei tea toropusiana ega toko mau: nalakena aga wo piragi nasaana umai paki naatam̃oli maga ni Anathoth, doko natau waina euga wo pei tea varatiana asa.