Read Nguna Togoa Etafe North YEREMIAH 12 Bible Online

YEREMIAH 12 - Nguna Togoa Etafe North bible

YEREMIAH 12

¹Ku pei tea leana, Yehovah O, ragi waina a mari navululuana aginau paki‐go; ma aga ko pululu navululuana aginau paki‐go: ekasana napua ki tea sigisigileo e do disu p̃ia? Ekasana tea maga waina eu do mari malauweluki eu do mamau puti doko p̃ia doko?

²Nigo ku lawo ra, go eu koakoa; eu ulua, go eu dau ki nawa: ku doko m̃aladigi doko nawokada, ma ku doko uvea doko nap̃op̃oda.

³Ma nigo Yehovah O, ku atae au; ku leousiusi au, po maridogo nap̃op̃ogu paki‐go: p̃a vuati lua ra pano dakiusi shiip waina euga wo pei tea maripunueana, po dap̃otae ra doko raki naaleatia ni namaripunueana.

⁴Pa pa paki seve ragi navanua ega wo malepu doko, go nataputea ni navanua mamau ega wo kokolo? Nalakena nasigisigileoana ki tea maga waina eu doko asa doko, nalo tuavati maga go manu maga eu pano puoli; nalakena nasigisigileoana ki naatatoko maga waina eu naga, Sup̃e ega wo da punusi tea waina tu do mari a mau.

⁵Ku pe sava sikoti naatam̃oli maga waina eu sava natuada, go nara eu pe mari ko ku mawosa, dapale sava ku pe mariatae sava sikoti horse maga po da mawosa mau? Go ku pe rowo doko navanua sikai ni natamateana, ku pe wo mari ega tapale sava doko namalasi wono ni Yordan?

⁶Nalakena taimu maga, go nasum̃a ni tamam̃a, nara ma eu mari malauweluki paki‐go; nara ma eu pioso kasua nalo kakam̃a: go eu pe vasa paki‐go ki navasaana wia maga, ma p̃a ta saralomau ara mau.

⁷A doropusi nasum̃a aginau, a dip̃adoa tea veaniana aginau; a pitua ki tea dodomiana ni naatagu paki nam̃elearu ni tea kokona ki nia maga.

⁸Tea veaniana aginau e po dakiusi laion sikai ni namalasi paki nau: e lua ki nadaleona dip̃a au; nalakena tea wanogoe a pilosi a.

⁹Tea veaniana aginau e dakiusi manu vuap̃orae sikai waina e karakaratia, kite? Manu vuap̃orae maga eu mari dip̃a e daliviri, kite? Kuga vano, kuga viragi saisai ki nalo mila maga mamau puti, kuga viragi ra umai naga euga kani dinomi a.

¹⁰Tea leoparatiki laapa eu mari sa ki roara ni vaine aginau, eu pasi puludoa matele aginau ki nam̃eleda, eu mari matele masauniana aginau e pei maso maladi p̃alo sikai.

¹¹Eu mari a e pei maso maladi sikai; e do mari nasusueana paki nau, nalakena e pei maso maladi doko; navanua mamau e pei tea mariana e pei maso maladi, nalakena te naata sikai e da midoa ki nia nap̃op̃ona mau.

¹²Tea mari pavakoto maga eu rumai doko tokora vakilagi maga mamau puti ni masop̃alo: nalakena lova ki Yehovah e do dinomi pae namatap̃ago sikai ni navanua pano pa pa paki namatap̃ago kerua ni navanua: te nap̃okasi e da peani natam̃ateana mau.

¹³Eu sapura ki napati ni whiit, go eu dagaukotovi tea makalikali maga; eu dum̃ada pitua ki da paki navitinuana, go eu da peani te nataluaana asa mau; go euga wo maliere ki nalolovaeana adeada, nalakena namaetoana vivitinu ki Yehovah.

¹⁴Yehovah e noa dapala nea dip̃a tea sa maga mamau puti waina eu doko m̃aladigi kinau, waina eu kisidogo tea veaniana waina a mari narei aginau Israel naga eu peani pioli ki nia, e naga, Kuga leo, aga wo paku dakati ra m̃elu dua ki navanua adeada, go aga wo paku dakati nasum̃a ni Yudah m̃elu dua ki m̃aleoputo kakada.

¹⁵Go ega wo pakilina, edaku ki waina aga wo paku dakati ra, naga aga wo moro maritadodomi ra; go aga wo moro piragi ra sara naata sikasikai paki tea veaniana aneana, go sara naata sikasikai paki navanua aneana.

¹⁶Go ega wo pakilina, waina eu pe suasua atae dogo parati ki napua maga ki narei aginau, naga euga vivisa pae nagisagu, doko do naga, Yehovah e mauri; ega tapala waina eu pasa pisei ki narei aginau naga euga vivisa pae nagisa ni Baal; ragi wanogoe eu pe wo pei tea tavagiana doko m̃aleoputo ni narei aginau.

¹⁷Ma te nalauna sikai e pe karai daki dorogo, kinau a pe wo paku dakati a, po mari puoli ki nia, Yehovah e noa e.