Read Nguna Togoa Etafe North YEREMIAH 13 Bible Online

YEREMIAH 13 - Nguna Togoa Etafe North bible

YEREMIAH 13

¹Yehovah e noa dapala nea paki nau, e naga, P̃a vano, po dum̃am̃a manigo pakotovi tasoki sikai ni linen, po dasoki namalom̃a asa, go p̃a ta pupugi a noai mau.

²Dapala nogoe a pakotovi tasoki sikai, pataka ni navasaana ki Yehovah, po dasoki namalogu asa.

³Go navasaana ki Yehovah e umai paki nau sala kerua, e naga,

⁴P̃a tape tasoki waina ku pakotovi a, waina ku dasoki namalom̃a asa, go p̃a tuleana, p̃a vaki Eufrates pano, po dasuru ki nia tokora wanogoe valea sikai ni vatu laketoko.

⁵Go a pano, po dasuru ki nia nadigi ni Eufrates, dapala waina Yehovah e dip̃aki nau asa.

⁶Go e pakilina edaku ki naaleatia laapa, naga Yehovah e noa kinau, e naga, P̃a tuleana, p̃a vaki Eufrates pano, po dape lua tasoki waina a dip̃aki‐go naga p̃a tasuru ki nia, m̃elu dua ki tokora wanogoe.

⁷Go a paki Eufrates pano, po kilikili po dape lua tasoki wanogoe m̃elu dua ki tokora waina a dasuru ki nia asa: go p̃a leo, tasoki wanogoe e pei tea marisakiana, e da moro p̃ia ki te navatuna mau.

⁸Go navasaana ki Yehovah e umai paki nau, e naga,

⁹Yehovah e noa dapala nea, e naga, Ega tapala nogoe aga wo mari sa ki naveip̃op̃ovakilagiana ni Yudah, go naveip̃op̃ovakilagiana warua ni Yerusalem.

¹⁰Narei sa wanogoe, waina eu karai dogo navasaana aginau maga, waina eu surata doko navei‐p̃au‐kasuaana ni nap̃op̃oda, go waina eu pano po dausi sup̃e p̃ota maga naga euga madeada suasua, go naga euga lotu ki da, nara ma euga wo dakiusi tasoki waia, waina e da p̃ia ki te navatuna mau.

¹¹Nalakena dapala waina tasoki e do puluti namalo ni naatam̃oli sikai, dapala nogoe kinau a mari nasum̃a mamau ni Israel go nasum̃a mamau ni Yudah naga euga vuluti au, Yehovah e noa e; naga euga maginau pei narei sikai, go nagisa sikai, go tea ni nasamasamaana sikai, go tea ni nasamasamaniana sikai: ma eu karai daki dorogo.

¹²Nalakena tea wanogoe p̃a noa ki da navasaana waia, p̃a naga, Yehovah Sup̃e ki Israel e noa dapala nea, e naga, Sara lasa euga wo pei tea vakavuroana ki waine: go nara euga wo noa ki‐go, euga wo naga, Kinami au da atae mau naga sara lasa euga wo pei tea vakavuroana ki waine, kite?

¹³Go p̃a noa ki da, p̃a naga, Yehovah e noa dapala nea, e naga, Kuga leo, aga wo pakavuro naatatoko maga mamau puti ni navanua waia ki namatamalokuana, nawota maga waina eu dasake doko malo tasake ki David go tea viri maga, go profeta maga, go naatatoko maga mamau puti ni Yerusalem.

¹⁴Go aga wo nadi ki da dum̃ada dip̃a ra, tamada maga go natuda naanoai maga euga mamau, Yehovah e noa e: aga wo da dodomi ra mau, aga wo da mari malemale paki da mau, aga wo da maritadodomi ra mau, ma aga wo mari puoli ki da.

¹⁵Kuga rogo, po daki nadaligamu; kuga ta pei tea vei p̃op̃ovakilagi maga mau: nalakena Yehovah e pasa.

¹⁶Kuga vitua ki nasamasamaana paki Yehovah Sup̃e animu, mase e pe maligoligo, go natuamu eu pe tapilagona tava maligo maga; go ragi waina ku pe laaga namarama, e pe mari a e pe vei melu ni namateana, po mari a e pe vei maligo wono.

¹⁷Ma ku pe karai daki dorogo, naatagu e pe wo dagi nap̃alaugu nalakena naveip̃op̃ovakilagiana animu; go naririmatagu maga euga wo pevera, nalakena navata ki Yehovah e pei tea viragi‐luapavakotoana.

¹⁸P̃a noa ki nawota go ki p̃ilana, nawota nagoroi, p̃a naga, Koroga tum̃amu doro mu pakitano, koroga toko etano: nalakena vauvau leom̃atakiana ni nasamasamaana animu e m̃elu dua ki nap̃aumu po pakitano.

¹⁹Natokoana maga ni Sauth eu pei tea kokoroana, go tea waina ega wolagati ra e dika: Yudah e pei tea viragi‐lua‐pavakotoana, e mamau pei tea viragi‐lua‐pavakotoana.

²⁰P̃a sike namatam̃a Yerusalem O, po leo punusi tea maga waina eu do pae north umai: navata waina e pei tea vituakiana paki‐go, navata leom̃atakiana anigo waina wai?

²¹P̃a wo noa nasava ragi waina euga wo dowo paki‐go dapala tea marimatua maga, nara waina nigo ku dum̃am̃a pasa pisei ki da naga euga vei tam̃a ri maga? Narogokitesaana maga euga wo da puasoki ko, dakiusi nagoroi sikai waina e dogo navitinuana ni navisolaana, kite?

²²Go ku pe noa nap̃op̃om̃a, ku pe naga, Ekasana naleo maga wanogoe eu pakilina kinau? Nalakena nalapalapaana ni namarinaleotageleana anigo, e pei nalakena naga nam̃asere anigo e pei tea lagai‐pakasakiana, go naga nam̃ago ni nam̃elem̃a ero pei tea mariana ero dokolina.

²³Naka ni Ethiopia e mariatae suru pioli ki nawilina kite leopard e mariatae suru pioli ki wotuwotu aneana maga, kite? E pe tapala nogoe nigo ma, waina natomariana anigo e pei naga p̃a to mari tea waina e sa, ku pe mariatae mari tea waina e p̃ia.

²⁴Nalakena tea wanogoe aga wo daperavera ki da, dapala nap̃olaga waina e do pano puoli ki nalagi ni masop̃alo.

²⁵Tea wanogoe e pei tea veanip̃otaeana anigo, matele waina a manigo dowogi lua e, Yehovah e noa e; nalakena ku malio kinau, po pavatu nasorosoroana.

²⁶Go nalakena tea wanogoe aga wo lagai nam̃asere anigo paki naraem̃a, go tea ni namaliereana anigo ega wo dokolina.

²⁷Kinau a punusi tea mamaragokiana anigo maga, go namaripeleana anigo maga, go naviragisuana anigo maga, go nawosiana sa ni namasausaraana anigo, doko tava maga ni vanua. Ai ki‐go, Yerusalem O! P̃a wo da pei tea maridautau‐kiana mau, kite? Ega wo doko pa pa paki seve ragi?