Read Nguna Togoa Etafe North YEREMIAH 14 Bible Online

YEREMIAH 14 - Nguna Togoa Etafe North bible

YEREMIAH 14

¹Navasaana ki Yehovah waina e umai paki Yeremiah nalo ni nagaragaraana.

²Yudah e susue go namata‐pua kakana maga eu po manainai, eu do natano doko do lalagaarova; go nakuapiosoana ki Yerusalem e sake pano.

³Navarapule kakana maga eu dip̃aki lua tea suasua adeada maga pano paki noai maga: eu rumai paki m̃oru maga ni noai, po da pap̃ai te noai ara mau; eu liliu, lasa adeada maga eu p̃alo doko: eu maliere po matamaliere, go eu kulugoro nap̃auda.

⁴Nalakena natano waina e saram̃akoto, nalakena usa e dika navanua, naatam̃oli sisi natano eu maliere, eu kulugoro nap̃auda.

⁵Diir goroi e pisola vanua, po doropusi natuna e doko, nalakena nam̃enau e dika.

⁶Go ass mila maga eu lawodu tokora vakilagi maga, eu do sovasova dakiusi koria mila maga; namatada maga eu m̃odave, nalakena nataputea e dika.

⁷Namarinaleotageleana aginami maga eu do noasokisoki dip̃a gami, ma p̃a mari nawosiana anigo, nalakena nagisam̃a, Yehovah O: nalakena narowokitakuana aginami eu laapa; au mari naleo sa dip̃a ko.

⁸Yehovah O, naleogoroana ki Israel, Tea Maumaupauri kakana ragi ni nariesokiana, ekasana p̃a wo doko dapala nam̃enaki‐atatoko sikai navanua, go dapala naatam̃oli sikai waina e do surata napua, waina e dawasi naga ega maromaro p̃ogi sikai?

⁹Ekasana p̃a wo doko dapala naatam̃oli m̃anaunau sikai, dapala naatam̃oli marimatua sikai waina e da mariatae mautipauri mau? Ma nigo, Yehovah O, ku doko m̃aleoputo kakagami, go au pei tea salagisana ki nagisam̃a; p̃a ta doropusi gami mau.

¹⁰Yehovah e noa dapala nea nalo ni narei wanogoe, e naga, Dapala nogoe eu laelaea surata sasap̃o; eu da mari nam̃eleda eu soki du mau: nalakena tea wanogoe Yehovah e da piragi soki ra mau; sala waia nae ega wo midoaki namarinaleotageleana adeada, po parati ra nalakena namarinaleosaana adeada maga.

¹¹Go Yehovah e noa kinau, e naga, P̃a ta magi narei wanogoe dapasavasa raki nawiaana adeada mau.

¹²Ragi waina euga vali, aga wo da dogo naviosoana adeada mau; go ragi waina euga vitua ki navituaana tap̃arakiana go navituaana ni flaur, aga wo da midoa ki da mau: ma aga wo mari puoli ki da ki lova, go ki navitoloana, go ki nasasanaana sa.

¹³Go kinau a naga, E, Yehovah Sup̃e O! P̃a leo, profeta maga eu do noa ki da, eu naga, Kuga wo da punusi lova mau, go kuga wo da peani navitoloana mau; ma aga wo dua mu natam̃ateana ni nalomauana doko tokora waia.

¹⁴Go Yehovah e noa kinau, e naga, Profeta maga eu do peanoasai nasorosoroana maga doko nagisagu: kinau a da dip̃aki lua ra mau, go kinau a da dip̃aki da mau, go kinau a da pasa paki da mau: eu peanoasai paki mu navunusiana sorosoro sikai, go nakikitaana, go naleo p̃alo sikai, go namarisoreana ni nap̃op̃oda.

¹⁵Nalakena tea wanogoe Yehovah e noa dapala nea, e naga, Nalo ni profeta maga waina eu peanoasai doko nagisagu, go a da dip̃aki lua ra mau, ma eu do noa naga, Lova go navitoloana eroga wo da doko navanua waia mau: kinau a noa naga, Ki lova go ki navitoloana profeta maga wanogoe euga wo pei tea maripuolikiana.

¹⁶Go nalo ni narei waina nara eu do peanoasai paki da, narei wanogoe euga wo pei tea nadikiana paki napua maga ni Yerusalem pano nalakena navitoloana go lova; go tea waina ega ova ki da nara ma adagoroi maga, go natuda naanoai maga, go natuda nagoroi maga, ega wo dika: nalakena aga wo ligisi nasigisigileoana adeada paki da.

¹⁷Go p̃a noa navasaana waia paki da, p̃a naga, Namatagu eroga wo sara siwo ki naririmata maga aleati go p̃ogi, go euga ta nopu mau; nalakena narei aginau natuda nagoroi atara e pei tea atugiana ki wotu warua sikai, ki wotu waina e p̃arua p̃arua liu.

¹⁸A pe tave pano paki vanua, p̃a leo, tea maga waina eu pei tea maripunueana ki lova! Go a pe sili paki natokoana, p̃a leo, tea maga waina eu sasana ki navitoloana! Nalakena profeta go tea viri ero dua puti do pakokoto usuraki navanua, go eu dika ki naataeana.

¹⁹Ku dip̃adoa Yudah, kite? Naatam̃a e mamarago ki Sion, kite? Ekasana ku atugi gami, go namaripauri‐gamiana e dika? Au leogoro natam̃ateana, ma tea wia e da umai mau; go ki ragi sikai ni namaripauriana, go p̃a leo, narogokitesaana.

²⁰Yehovah O, au ataedogo nasigisigileoana aginami, go namarinaleotageleana ki tamagami maga: nalakena au mari naleo sa dip̃a ko.

²¹P̃a ta dip̃akotovi gami mau, nalakena nagisam̃a; p̃a ta dododao malo tasake ni nasamasamaana anigo mau: p̃a midoa ki parati ki, p̃a ta mari kotovi navasasokiana anigo mau waina ku mari a paki gami.

²²Tea p̃alo maga ki nalauna p̃ota maga sikai kakada e mariatae mari usa ega p̃owo, kite? Kite nakoroatelagi maga eu mariatae pitua ki usa walapa maga, kite? Nigo ku da pei nae mau, Yehovah Sup̃e aginami O? Nalakena tea wanogoe auga wo leogoro ako; nalakena nigo ku mari naleo maga mamau puti wanogoe.