Read Nguna Togoa Etafe North YEREMIAH 15 Bible Online

YEREMIAH 15 - Nguna Togoa Etafe North bible

YEREMIAH 15

¹Go Yehovah e noa kinau, e naga, Moses go Samuel ero pe lawodu naraegu, ma nap̃op̃ogu e pe wo da maradoa paki narei waia mau: p̃a mari puoli ki da m̃elu dua ki namatagu pano, go euga vano.

²Go ega wo pakilina, waina eu pe noa ki‐go naga, Auga wo paki esava? P̃a noa ki da naga, Yehovah e noa dapala nea, e naga, Tea maga waina eu pei tea tip̃akotoviana paki namateana, euga vaki namateana; go tea maga waina eu pei tea tip̃akotoviana paki lova euga vaki lova; go tea maga waina eu pei tea tip̃akotoviana paki navitoloana, euga vaki navitoloana; go tea maga waina eu pei tea tip̃akotoviana paki naviragilua‐pavakotoana, euga vaki naviragilua‐pavakotoana.

³Go aga wo lawo ki tea marisaki visarasara pati dap̃au ra, Yehovah e noa e: lova naga ega maripunuvunue, go koria maga naga euga katip̃oraworae, go manu maga ni namalopa go nalo mila maga ni maramana, naga euga kani dinomi go naga euga mari sa sa ki.

⁴Go aga wo mari ra euga vei tea duletuleakiana usuraki namarakiana maga mamau puti ni maramana, nalakena Manasseh natu ni Hesekiah nawota ni Yudah, nalakena tea waina e mari a doko Yerusalem.

⁵Nalakena sei ega wo dodomi ko, Yerusalem O? Kite sei ega wo dagisi ko? Kite sei ega wo dawasi naga ega vusuusu ki‐go natam̃ateana anigo?

⁶Ku dip̃adoa au, Yehovah e noa e, ku dowo kitaku: nalakena tea wanogoe aga wo sai ki nam̃elearugu dip̃a ko, po mari puoli ki‐go; kinau a mawosa ki namidoakipiriana.

⁷Go aga wo nive ra ki nive sikai namata‐pua maga ni navanua; aga wo mari natuda maga euga wo puoli ki da ki namateana, aga wo mari puoli ki narei aginau; nalakena eu da maradoa liliu m̃elu dua ki napua adeada maga mau.

⁸A mari nagoroi malepu adeada maga eu laapa liu naworaone ni natasi maga: a piragi tea marisaki sikai e mari dip̃a p̃ila ni natureai maga aleati: a mari narogokitesaana go tea ni namatakuana maga eu dowo ara m̃araverave.

⁹Nagoroi waina e pisola ki piakiki larua e manainai: e matekimala; elo e maneana musu ragi waina e ko aleati doko; e maliere go e pinovinoi: go namagovai kakada waina eu pei tea toropusiana doko, aga wo pitua ki da paki lova narae ni tea kokona ki da maga, Yehovah e noa e.

¹⁰Ai kinau, p̃ilagu, waina ku dape au, a pei naatam̃oli sikai ni navivimariana go naatam̃oli sikai ni navileana paki maramana mamau! A da pitua ki tea seakiana mau, go a da datago tea seakiana mau; ma eu mamau puti pasa sa kinau.

¹¹Ega tapala nogoe, Yehovah O, a pe ta madeada mari natarotaroana paki‐go raki tea wia, a pe ta magi tea kokona mari navululuana paki‐go ragi ni narogokitesaana go ragi ni nariesokiana!

¹²Tea sikai e mariatae p̃ori kotovi airon, airon pae north, go brass, kite?

¹³Naloriki anigo maga go naleo tauakiana wia anigo maga, aga wo pituaki m̃oli ki da euga vei tea vuti‐lua‐pavakotoana sikai, nalakena namarinaleosaana anigo maga mamau puti waina ku mari ra usuraki m̃aleoputo ni kokoi anigo maga mamau puti.

¹⁴Go aga wo mari ko p̃a wo magi tea kokona ki‐go maga suasua doko navanua sikai waina ku da pea atae a mau, nalakena nakapu sikai e pei tea tokoniana namaetoana aginau waina ega wo soro pa pa ega tu mau du.

¹⁵Yehovah O, nigo ku atae: p̃a midoa ki nau po umai punusi au, po maginau mari nasikoana paki tea maga waina eu do kopalele au; p̃a ta dape lua au pano namaritasokiparauana anigo mau: p̃a atae naga a dapetape navasapinoaana nalakena nigo.

¹⁶Navasaana anigo maga eu pei tea vap̃aiana, go a gani dinomi ra; go navasaana anigo maga eu pei nalaelaeaana sikai go navakavakaeana ni nap̃op̃ogu: nalakena a pei tea salagisana ki nagisam̃a, Yehovah Sup̃e ki taua maga O.

¹⁷A da dasake sikoti tea maga waina eu mari katakata, go a da mari p̃aragoto mau: a dasake a sikigu doko, nalakena nam̃elearum̃a; nalakena ku mari au a pura ki namaetoana.

¹⁸Ekasana navitinuana aginau e da makoto mau, go ekasana wotu aginau e da apu mau, doko da suasua naga ega nopu? P̃a wo maginau pei nap̃ap̃a noaisara sorosoro sikai dakiusi noai maga waina eu dap̃a kite?

¹⁹Nalakena tea wanogoe Yehovah e noa dapala nea, e naga, Ku pe maradoa, a pe wo piragi liliua ki‐go, naga p̃a lawodu naraegu; go ku pe lua ki tea wialua po da lua ki tea p̃alo mau, ku pe wo maginau pei nawokagu: nara euga wo maradoa liliu paki‐go, ma nigo p̃a ta maradoa liliu paki da mau.

²⁰Go aga wo mari ko p̃a vei p̃aaka kasua sikai ni brass paki narei waia; go euga wo marimari dip̃a ko, ma euga wo da marimatua ki‐go mau: nalakena kinau a sikoti ko doko naga aga mauti ko po pualua ko, Yehovah e noa e.

²¹Go aga wo pualua ko m̃elu dua ki nam̃elearu ni tea sigisigileo go aga wo daulua ko m̃elu dua ki nam̃elearu ni tea vakamatakua.