Read Nguna Togoa Etafe North YEREMIAH 16 Bible Online

YEREMIAH 16 - Nguna Togoa Etafe North bible

YEREMIAH 16

¹Go navasaana ki Yehovah e moro umai paki nau, doko do naga,

²P̃a ta dawiri nagoroi sikai, kite pesi piakiki naanoai kite piakiki nagoroi doko tokora waia mau.

³Nalakena Yehovah e noa dapala nea nalo ni piakiki naanoai maga go nalo ni piakiki nagoroi maga waina euga vakilina tokora waia, go nalo ni p̃ilada maga waina euga tape ra, go nalo ni tamada maga waina euga vesi ra doko navanua waia, e naga,

⁴Euga wo mate namateana sa maga; euga wo da pei tea tagisiana mau, go euga wo da pei tea ovakiana mau; euga wo pei natap̃ata doko narae ni natano: go euga wo pei tea kani‐dinomiana ki lova, go ki navitoloana; go nap̃atoko mate adeada maga euga wo pei navinaga agi manu maga ni namalopa, go agi nalo mauri maga ni maramana.

⁵Nalakena Yehovah e noa dapala nea, e naga, P̃a ta paki ekopu ni nasum̃a ni nasusueana mau, kite pano naga p̃a lalagaarova, kite dagisi ra mau: nalakena a dape lua natam̃ateana aginau go nasaup̃iaana go nadodomiana maga m̃elu dua ki narei waia, Yehovah e noa e.

⁶Tea vakilagi go tea vakitano euga wo mamau puti mate navanua waia: euga wo da pei tea ovakiana mau, go naatam̃oli maga euga wo da dagisi ra mau, kite dum̃ada dovae ra, kite dum̃ada mari ra nam̃asuaana nalo kakada mau.

⁷Go naatam̃oli maga euga wo da magi tea susue maga dovap̃orae bred naga euga vakavakale ra nalo ni tea mate mau; go naatam̃oli maga euga wo da dua ra lasa munu ni navakavakaleana naga euga munugi a nalo ni tamada kite p̃ilada mau.

⁸Go p̃a ta paki ekopu ni nasum̃a ni nakaniana mau naga p̃a tasake sikoti ra, naga kuga mamau ganikani po munu.

⁹Nalakena Yehovah ki taua maga, Sup̃e ki Israel, e noa dapala nea, e naga, P̃a leo, doko naaleatia animu maga go doko narae ni namatamu, aga wo mari nadaleo ni nalaelaeaana go nadaleo ni nasamasamaana, nadaleo ni tea vitawiri go nadaleo ni tea laki, ega wo makoto m̃elu dua ki tokora waia.

¹⁰Go ega wo pakilina, ragi waina p̃a wo noakisai narei waia ki navasaana mamau puti wanogoe go nara euga wo noa ki‐go naga, Ekasana Yehovah e pasa dawona ki nasaana warua waia dip̃a gami? Kite nasava e pei namarinaleotageleana aginami? Kite seve namarinaleosaana waina au mari naleo sa asa dip̃a Yehovah Sup̃e aginami?

¹¹P̃a noa ki da, p̃a naga, Nalakena tamamu maga eu doropusi au, Yehovah e noa e, go eu surata dausi sup̃e p̃ota maga, po madeada suasua, po lotu ki da, po doropusi au, po da pavaigoro nawotaeana aginau mau;

¹²Go nimu ku mari naleo sa warua liu tea ki tamamu maga; nalakena kuga leo, ku mamau puti surata pae nakasuaana ni nap̃op̃osaana animu sikasikai, dapala waina ku da dogo parati kinau mau:

¹³Nalakena tea wanogoe aga wo sila ki mu m̃elu dua ki navanua waia pano paki navanua sikai waina nimu ma tamamu maga ku da pea atae a mau; go tokora wanogoe kuga wo magi sup̃e p̃ota maga suasua aleati go p̃ogi; nalakena aga wo da saup̃ia ki mu mau.

¹⁴Nalakena tea wanogoe p̃a leo, naaleatia maga euga wo umai, Yehovah e noa e, go ega wo da moro pei tea noaana naga, Yehovah e mauri, waina e piragi lua Israel natuna maga m̃elu dua ki navanua ni Ityipt sake umai;

¹⁵Ma ega wo pei tea noaana naga, Yehovah e mauri, waina e piragi lua Israel natuna maga m̃elu dua ki navanua ni north sake umai, go m̃elu dua ki navanua maga mamau puti waina e kopasi lua ra paki ara pano: nalakena aga wo moro piragi liliua ki da paki navanua adeada waina a dua tamada maga asa.

¹⁶P̃a leo, aga wo pitip̃aki po paraki tea araika maga laapa umai, Yehovah e noa e, go euga wo puati ra; go edaku ki tea wanogoe aga wo pitip̃aki po paraki tea valako maga laapa umai, go euga wo palako ki da m̃elu dua ki sara tava warua, go m̃elu dua ki sara tava sula, go m̃elu dua ki valea maga ni vatu laketoko maga.

¹⁷Nalakena namatagu ero do leosoki napua adeada maga mamau puti: eu da pei tea tasurukiana m̃elu dua ki naraegu mau, go namarinaleotageleana adeada e da sili pa dua ki namatagu maga mau.

¹⁸Go aga wo pitua dip̃a ki namarinaleotageleana adeada go ki namarinaleosaana adeada ega vaka rua; nalakena eu mari navanua aginau e pei tea m̃oli ki nap̃atoko mate maga ni tea karaikitaana adeada maga, go eu mari tea veaniana aginau e pura ki tea mamaragokiana adeada maga.

¹⁹Yehovah O, nakasuaana aginau, go p̃aaka aginau, go tokora ni nasavasiliana aginau naaleatia ni nariesokiana, nalauna maga euga wo pae namatap̃ago maga ni maramana umai punusi ko, go euga wo noa naga, Tamagami maga eu da peani pioli ki te navatuna mau, ma nasorosoroana m̃oli, naleo p̃alo maga waina eu da pei nasilaeana mau.

²⁰Naatam̃oli sikai ega wo dum̃ana maneana mari sup̃e maga, waina eu da pei sup̃e maga mau, kite?

²¹Nalakena tea wanogoe p̃a leo, aga wo mari ra euga atae, aga wo paka sikai maau waia mari ra euga atae nam̃elearugu go namarimatuaana aginau; go euga wo atae naga nagisagu e pei Yehovah.