Read Nguna Togoa Etafe North YEREMIAH 17 Bible Online

YEREMIAH 17 - Nguna Togoa Etafe North bible

YEREMIAH 17

¹Namarinaleosaana ki Yudah e pei tea midiriana ki pen ni vatu, go ki namata ni daimond sikai: e pei tea tae‐midiriana tea welewelea ni nap̃op̃oda, go napati maga ni wede ni naviriana animu maga;

²Go natuda maga eu midoa ki parati ki wede ni naviriana adeada maga go Asherah adeada maga waina eu doko melu ni nakau mamalakesa maga nam̃asua ni tava vakilagi maga.

³Tava aginau O waina ku doko vanua doko, aga wo pitua ki naloriki anigo maga go naleo tauakiana wia anigo maga mamau puti euga vei tea vuti‐luapavakotoana sikai, nalakena namarinaleosaana animu waina ku mari naleo sa asa usuraki navanua animu.

⁴Go nigo ku dum̃am̃a pei nalakena tea veanipiolikiana anigo waina a dua ko asa, ega wo pei tea vutiluaana kiam̃a; go aga wo mari ko p̃a wo magi tea kokona ki‐go maga suasua doko navanua waina ku da pea atae a mau: nalakena ku dokoni nakapu sikai namaetoana aginau, waina ega wo soro pa pa ega tu mau du.

⁵Yehovah e noa dapala nea, e naga, Ae navasasakiana ki naatam̃oli waina e pavatu naatam̃oli, po mari nap̃okasi e pei naruna, go waina nap̃op̃ona e maradoa m̃elu dua ki Yehovah pano.

⁶Nalakena nae ega wo dakiusi nataputea sa ni masop̃alo, go ega wo da punusi tea wia mau ragi waina ega wo umai; ma ega wo atatoko tokora garagara maga ni maso maladi, navanua sikai ni natasimena waina naatam̃oli e dika asa.

⁷Ae namaropaana ki naatam̃oli waina e do pavatu Yehovah, go waina naleogoroana aneana e pei Yehovah.

⁸Nalakena nae ega wo dakiusi nakau sikai waina e pei tea lawoana nadigi ni noai maga, go waina e do sai ki nakoana maga nadigi ni noaisara; ega wo da mataku ragi ni navivitinuana mau, ma nauluna ega wo malakesa doko; go ega wo da midoa ki natau ni nagaragaraana mau, go ega wo da dika ki nawana mau.

⁹Nap̃op̃o ni naatam̃oli e midoa ki namarisoreana p̃arua liu sara navatuna, go e manainai p̃arua: sei e mariatae midoa ki atae a?

¹⁰Kinau Yehovah a leousiusi namidodoana, po maridogo nap̃op̃ona, naga aga lagati dua naatam̃oli ega vataka ni napua aneana maga, ega vataka ni nawa ni natomariana aneana maga.

¹¹Dapala p̃ilake waina e dakovi atolu maga waina e da dum̃ana nadi ki da mau, naatam̃oli waina e dalua nasogolapaana go e da pae naleanaana mau e dapala nogoe; doko namawota ni naaleatia aneana maga, euga wo doropusi a po pano, go ragi ni nanopuana ni namauriana aneana, ega wo pei tea manumatavusa sikai.

¹²Malo tasake ni nasamasamaniana, waina e pei tea sikeana pakilagi pae ragi vea mau, e pei tokora ni nasavasiliana anigida.

¹³Yehovah O, naleogoroana ki Israel, tea maga mamau puti waina eu doropusi ko, euga wo pei tea toropusiana paki namaliereana; tea maga waina eu maradoa m̃elu dua ki‐go pano, nagisada ega wo pei tea midiriana nam̃otam̃ota ni natano, nalakena eu doropusi Yehovah, namata noai ni noai mauri maga.

¹⁴P̃a maripauri au Yehovah O, go aga wo pei tea maripauriana; p̃a mautipauri au, go aga wo pei tea mautipauriana: nalakena nigo ku pei nasamasamaana aginau.

¹⁵P̃a leo, eu noa kinau, eu naga, Navasaana ki Yehovah wai?

¹⁶Ega umai. Ma kinau, a da maridie ko naga p̃a tip̃aki lua nasaana mau; go a da masauna naga naaleatia ni narogokitesaana ega umai mau, nigo ku atae a; tea waina e dave m̃elu nagolegu maga, e doko kivea ki naraem̃a.

¹⁷P̃a ta pei tea ni namatakuana sikai paki nau mau: nigo ku pei tokora ni nasavasiliana aginau naaleatia ni nasaana.

¹⁸Tea maga waina eu kopalele au, euga vei tea toropusiana paki namaliereana, ma kinau aga ta pei tea toropusiana paki namaliereana mau; nara euga m̃anaunau, ma kinau aga ta m̃anaunau mau: p̃a mari naaleatia ni nasaana ega vakilina ki da, po mari puoli ki da ki namarisakiana ega vaka rua.

¹⁹Yehovah e noa dapala nea, e naga, P̃a vano, po lawodu namata‐pua ki narei natuna maga, tokora waina nawota maga ni Yudah eu sili umai asa, go waina eu dave pano asa, po doko namata‐pua maga mamau puti ni Yerusalem;

²⁰Go p̃a noa ki da, p̃a naga, Kuga rogo navasaana ki Yehovah, nimu nawota maga ni Yudah, go nimu Yudah mamau, go nimu naatatoko maga mamau puti ni Yerusalem, waina ku sili pae namata‐pua maga waia umai;

²¹Yehovah e noa dapala nea, e naga, Kuga tum̃amu pavaigoro mu, go kuga ta dapetape te natapetapeana sikai naaleatia ni sabbath mau, kite dape a umai pae namata‐pua maga ni Yerusalem mau;

²²Go kuga ta dapetape te natapetapeana sikai m̃elu dua ki ekopu ni nasum̃a animu maga pano paki katama naaleatia ni sabbath mau, go kuga ta mari te nawosiana sikai asa mau: ma kuga vavaigoro naaleatia ni sabbath naga ega tapu, dapala waina a dip̃aki tamamu maga asa;

²³Ma eu da dogo parati ki nia mau, kite daki nadaligada mau, ma eu dum̃ada mari nanoada e kasua, naga euga ta dogo e mau, go naga euga ta dape natapavanauana mau.

²⁴Go ega wo pakilina, waina ku pe rogo parati kinau, Yehovah e noa e, po da dape te natapetapeana sikai pae namata‐pua maga ni natokoana waia umai naaleatia ni sabbath mau, ma ku pe vavaigoro naaleatia ni sabbath naga ega tapu, po da mari te nawosiana sikai asa mau;

²⁵Nawota maga go tea maraki maga waina euga tasake malo tasake ki David, eu pe wo sili namata‐pua maga ni natokoana waia umai, doko do pei tea musagiana kariot maga, po sakesaake horse maga, nara ma tea maraki adeada maga, naatam̃oli maga ni Yudah, go naatatoko maga ni Yerusalem: go natokoana waia e pe wo doko, po doko mau doko.

²⁶Go euga wo pae natokoana maga ni Yudah umai, go pae tokora maga waina eu doko daliviri Yerusalem, go pae navanua ni Benyamin, go pae navanua ni malo matemate, go pae tava maga, go pae taleva ni Sauth, euga wo dape navituaana tap̃arakiana maga, go naviriana maga, go naviriana maga ni navinaga, go libano, go naviriana maga ni navituaana maga ni navasadodom̃atakiana, umai paki nasum̃a ki Yehovah.

²⁷Ma ku pe ta dogo parati kinau mau, naga ku pe ta pavaigoro naaleatia ni sabbath naga ega tapu mau, naga ku pe ta dapetape te natapetapeana sikai po sili namatapua maga ni Yerusalem naaleatia ni sabbath mau; kinau a pe wo dokoni nakapu sikai namata‐pua kakana maga, go ega wo gani dinomi nasum̃a vakilagi maga ni Yerusalem, go ega wo da pei tea vuepunueana mau.