Read Nguna Togoa Etafe North YEREMIAH 19 Bible Online

YEREMIAH 19 - Nguna Togoa Etafe North bible

YEREMIAH 19

¹Yehovah e noa dapala nea, e naga, P̃a vano, po pakotovi lasa sikai ni naruku, go p̃a viragi lua namariki maga ni narei seara kakada, go namariki maga ni tea viri maga seara kakada;

²Go kuga tave pano paki nap̃aloa ki natu ni Hinnom, waina e doko m̃aladigi ki namata‐pua ni taleva ni elo sake, go tokora wanogoe p̃a rogorogo ki navasaana maga waina aga wo noa ki‐go asa:

³P̃a naga, Kuga rogo navasaana ki Yehovah, nimu nawota maga ni Yudah O, go nimu naatatoko maga ni Yerusalem; Yehovah ki taua maga, Sup̃e ki Israel, e noa dapala nea, e naga, Kuga leo, aga wo piragi nasaana umai paki tokora waia, waina te naata e pe rogo nalo kakana, nadaligana ero pe wo kikia.

⁴Nalakena eu doropusi au, po mari tokora waia e pei tea m̃oli, go eu dap̃ara ki tea ni nap̃o wia asa paki sup̃e p̃ota maga, waina eu da pea atae ra mau, nara ma tamada maga go nawota maga ni Yudah; go eu mari tokora waia e pura ki nada ni tea tautau maga;

⁵Go eu davagi tokora vakilagi maga ki Baal, naga euga tap̃ara ki natuda naanoai maga ki nakapu asa, naga euga vei navituaana tap̃arakiana maga paki Baal; waina kinau a da pitip̃aki asa mau, kite pasa asa, kite midoa ki nia namidodoana aginau mau:

⁶Nalakena tea wanogoe kuga leo, naaleatia maga euga wo umai, Yehovah e noa e, go tokora waia ega wo da moro pei tea sosoana ki Tofeth mau, kite ki Nap̃aloa ki natu ni Hinnom mau, ma ega wo pei tea sosoana ki Nap̃aloa ni Namaripunueana.

⁷Go aga wo mari namidoakip̃otaeana ki Yudah go Yerusalem ega vei tea m̃oli tokora waia; go aga wo mari ra euga rowo ki lova narae ni tea kokona ki da maga, go ki nam̃elearu ni tea maga waina eu laaga namauriana adeada: go aga wo pitua ki nap̃atoko mate adeada maga euga vei navinaga ki manu maga ni namalopa, go ki nalo mauri maga ni maramana.

⁸Go aga wo mari natokoana waia ega vei tea ni nasaram̃akotoana sikai, go tea ni nasaram̃asikaana sikai; sara naata waina euga surata liu sa euga wo saram̃akoto asa po mamarago ki nia nalakena namarisasakiana kakana maga mamau puti.

⁹Go aga wo mari ra euga kani nap̃okasi ni natuda naanoai maga go nap̃okasi ni natuda nagoroi maga, go euga wo dum̃ada gani nap̃okasida sara naata sikasikai, doko nakelugoroana go doko nariesokiana waina tea kokona ki da maga go tea maga waina eu laaga namauriana adeada, euga wo diesoki ra asa.

¹⁰Go ragi wanogoe p̃a marip̃orae lasa ni naruku wanogoe, doko namata ni naatam̃oli maga waina kuga mamau pano,

¹¹Go p̃a noa ki da, p̃a naga, Yehovah ki taua maga e noa dapala nea, e naga, Dapala waina tea sikai e marip̃orae lasa sikai ni naruku, go e mari sap̃o pei tea mariana ega moro pei tea mamaau sikai, dapala nogoe aga wo marip̃orae narei waia go natokoana waia: go euga wo ovaki doko Tofeth pa pa namalopa waina euga ovaki asa ega wo dika.

¹²Aga wo mari ega tapala nogoe paki tokora waia, Yehovah e noa e, go paki naatatoko kakana maga, go aga wo mari natokoana waia ega moro dapala Tofeth:

¹³Go nasum̃a maga ni Yerusalem, go nasum̃a maga ki nawota maga ni Yudah, nasum̃a maga mamau puti wanogoe waina eu dap̃ara ki tea ni nap̃o wia asa nam̃asua kakada maga paki taua mamau ni nakoroatelagi, go waina eu daki navituaana takiana maga asa paki sup̃e p̃ota maga, nara euga wo pei tea mariana euga vei tea mamaragokiana ega tapala Tofeth.

¹⁴Go Yeremiah e pae Tofeth umai, pae tokora waina Yehovah e dip̃aki lua e paki asa pano naga ega veanoasai asa; go e lawodu roara ni nasum̃a ki Yehovah, po noa ki narei mamau,

¹⁵e naga, Yehovah ki taua maga, Sup̃e ki Israel, e noa dapala nea, e naga, Kuga leo, aga wo piragi umai paki natokoana waia go paki natokoana kakana maga mamau puti, nasaana mamau puti waina a pea noa sua e naga aga mari a dip̃a e; nalakena eu dum̃ada mari nanoada e kasua, naga euga ta dogo navasaana aginau maga mau.