Read Nguna Togoa Etafe North YEREMIAH 2 Bible Online

YEREMIAH 2 - Nguna Togoa Etafe North bible

YEREMIAH 2

¹Go navasaana ki Yehovah e umai paki nau,

²e naga, P̃a vano, po pioso paki nadaliga ni Yerusalem, po naga, Yehovah e noa dapala nea, e naga, A midoaki parati ki nawiaana ni navei‐naatara‐ana anigo, nadodomiana anigo dapala nagoroi laki sikai; takana waina ku dausi au doko masop̃alo, doko navanua sikai waina eu da sapuraki asa mau.

³Israel e pei tea tapu paki Yehovah, e pei takavea ni nawa vea maga ni nalolovaeana aneana: tea mamau puti waina eu gani a, sogi ega wo liko ara; nasaana ega wo pakilina ki da, Yehovah e noa e.

⁴Kuga rogo navasaana ki Yehovah, nasum̃a ni Yakob O, go nimu naworawora maga mamau puti ni nasum̃a ni Israel:

⁵Yehovah e noa dapala nea, e naga, Seve namarinaleotageleana waina tamamu maga eu pap̃ai a doko au, naga eu pa dua kinau pano paki uvea, go naga eu surata dausi naleo p̃alo, po pei tea p̃alo maga?

⁶Eu da noa naga, Yehovah wai, waina e piragi lua gida m̃elu dua ki navanua ni Ityipt umai; waina e maraki gida duaduru masop̃alo, duaduru navanua sikai ni malo garagara maga go ni m̃orutano maga, duaduru navanua sikai ni nagaragaraana go ni melu ni namateana, duaduru navanua sikai waina te naata e da pea duagoto asa mau, go tokora waina naatam̃oli e da doko asa doko mau?

⁷Go a piragi lua mu paki navanua sikai ni namasu, naga kuga laelaea gani nawa kakana maga, go nawiaana kakana; ma ragi waina ku umai paki asa, ku mari navanua aginau e pei tea m̃oli, go ku mari tea veanipiolikiana aginau e pei tea mamaragokiana sikai.

⁸Tea viri maga eu da noa, Yehovah wai? Go tea maga waina eu atae p̃otae nawotaeana eu da atae au mau: go tea maraki maga eu dapiri dip̃a au, go profeta maga eu peanoasai pae nagisa ni Baal, po surata dausi naleo maga waina eu da pei nasilaeana mau.

⁹Nalakena tea wanogoe a ko do pululu ki mu, Yehovah e noa e, go aga wo pululu ki natumu maga natuda maga.

¹⁰Nalakena kuga tuagoto paki naureure maga ni Kittim, po punusi a; go kuga tip̃aki lua pano paki Kedar, po midoakiusiusi parati ki; po punusi mase te naleo dapala nogoe sikai e pe toko kite.

¹¹Nalauna sikai e surupioli ki sup̃e adeada maga, waina eu da pei sup̃e maga mau, kite? Ma narei aginau eu surupioli ki nasamasamaana adeada raki tea waina e da pei nasilaeana mau.

¹²Kuga saram̃akoto nalo kakana, nakoroatelagi maga O, go kuga mataku ki namatakuana warua, kuga vei maso maladi mau, Yehovah e noa e.

¹³Nalakena narei aginau eu mari tea sa dua; eu doropusi au, namata noai mauri maga, go eu dum̃ada madeada mari m̃oru noai maga, m̃oru maworawora maga, waina eu da mariatae dape soki noai mau.

¹⁴Israel e pei tea suasua sikai, kite? E pei naviti atatoko sikai, kite? Go ekasana e pei tea vuti‐lua‐pavakotoana sikai?

¹⁵Laion tureai maga eu uru dip̃a e, eu uru kasua: go eu mari navanua aneana e pei maso maladi one; natokoana aneana maga eu pei tea tap̃arakiana sua, naatam̃oli e dika ara.

¹⁶Go Nof go Tapanes natuda maga eu p̃oka p̃orae nam̃asua ni nap̃aum̃a.

¹⁷Ku da dum̃am̃a pei nalakena naleo wanogoe e pakilina ki‐go, nalakena ku doropusi Yehovah Sup̃e anigo, ragi waina e maraki ko pae napua, kite?

¹⁸Go p̃a wo peani tea wia nasava ragi waina p̃a vaki Ityipt, naga p̃a munu noai maga ni Shihor? Kite p̃a wo peani tea wia nasava ragi waina p̃a vaki Assiria, naga p̃a munu noai maga ni Noaisara?

¹⁹Nasigisigileoana anigo ega wo dum̃ana parati ko, go nasukasukaana anigo ega wo dum̃ana pasa kasua ki‐go: nalakena tea wanogoe p̃a atae po punusi naga e pei naleo sa go tea kokona sikai, waina ku doropusi Yehovah Sup̃e anigo, go waina namatau‐kinau‐ana e da doko ako mau, Yehovah ki taua maga, Yehovah e noa e.

²⁰Nalakena ragi ni tuai a mari kotovi nakau ni nanoam̃a, po peresi lua natali solisoki anigo maga; go ku noa naga, Kinau aga wo da manigo suasua mau; go doko sara tava vakilagi maga go melu ni sara nakau mamalakesa maga, ku kolo suai natano, doko do mari namaripeleana.

²¹Ma kinau a lawo ko ku pei vaine wia lua sikai ni napati dautau usuraki: go dapale sava ku po ulua po pei vaine sa sikai?

²²Nalakena ku pe tum̃am̃a sarue ko ki lai, go ki sop, ma namarinaleotageleana anigo e pe wo dokolina naraegu, Yehovah Sup̃e e noa e.

²³Go ekasana ku piviari noa naga, Kinau a da loa mau, kinau a da dausi Baal mau? P̃a leo punusi napua anigo doko nap̃aloa, go p̃a atae tea waina ku mari a: nigo ku pei kamel vusavusa sava m̃araverave sikai waina e do surata dagiagi napua aneana maga;

²⁴Ass mila sikai ni masop̃alo, waina e do marousu ki nalagi doko namasausauana aneana; doko ragi kakana sei e mariatae doa e ega vano? Tea maga mamau puti waina eu laaga asa, euga wo da dum̃ada mari ra namawosaana mau; doko atelagi aneana, euga wo pap̃ai a.

²⁵P̃a mauti nam̃elem̃a naga ega ta masale ki nam̃elevasiana mau, go namanum̃a naga ega ta madou mau: ma ku noa naga, Naleogoroana e dika, e dika sa; nalakena a dodomi sup̃e p̃ota maga, go tea maga wanogoe aga wo dausi ra pano.

²⁶Dapala waina tea vanako sikai e maliere ragi waina e pei tea vap̃aiana, dapala nogoe nasum̃a ni Israel ega wo maliere; nara ma nawota adeada maga, go tea maraki adeada maga, go tea viri adeada maga, go profeta adeada maga;

²⁷Waina eu noa ki nalakelake ni nakau sikai, eu naga, Nigo ku pei tamagu; go ki vatu sikai, Nigo ku pisola kinau: nalakena eu dum̃ada doa ra po dua au natakuda, ma eu da dua au naraeda mau: ma ragi ni nariesoki‐ra‐ana, euga wo naga, P̃a tuleana, po mauti gami.

²⁸Ma sup̃e anigo maga wai, waina ku dum̃am̃a manigo mari ra? Nara euga tuleana, po mauti ko ragi ni nariesoki‐ko‐ana, waina eu pe mariatae: nalakena pataka ni naveveana ni natokoana anigo maga, naveveana ni sup̃e anigo maga eu pataka sikai, Yudah O.

²⁹Go ekasana ku pululu dip̃a au? Ku mamau puti mari p̃auluulu dip̃a au, Yehovah e noa e.

³⁰Kinau a atugi m̃oli ki natumu maga; eu da masauna naga euga vei tea varati‐piseikiana mau: lova animu e dum̃ana dinomi profeta animu maga, dakiusi laion vivikati sikai.

³¹Go nimu tagona O, kuga taki dorogo paki navasaana ki Yehovah. Kinau a pei masop̃alo sikai paki Israel, kite? Kite navanua sikai ni namaligo wono, kite? Go ekasana narei aginau eu noa naga, Kinami au dum̃agami doko; auga wo da moro paloti punusi ko mau?

³²Nagoroi atara sikai e mariatae malio ki naleo maga ni narekeikiana aneana, kite nagoroi laki sikai ki tea suniana aneana, kite? Ma narei aginau eu malio kinau naaleatia laapa liu.

³³Ekasana ku marimatana ki napua anigo naga p̃a laaga nadodomiana? Nalakena tea wanogoe nagoroi sigisigileo maga nara ma, ku pasa pisei ki da napua anigo maga.

³⁴Go nada tautau ni tea rogokitesa maga e pei tea vap̃aiana doko nam̃asere anigo maga: e da pae nakili‐darave‐ana mau naga a pap̃ai a, ma e dokolina napua maga mamau puti.

³⁵Ma nigo ku naga, Kinau a dautau; lomau namaetoana aneana e m̃elu dua kinau pano. P̃a leo, aga wo piragi ko paki navasap̃otaeana, nalakena ku naga, Kinau a da mari namarinaleosaana mau.

³⁶Ekasana ku do surata dagiagi? P̃a wo pei tea toropusiana paki namaliereana pae Ityipt, dapala waina ku pea pei tea toropusiana paki namaliereana pae Assiria.

³⁷P̃a wo moro m̃elu dua ki nia pano, nam̃elearum̃a eroga wo doko nap̃aum̃a: nalakena Yehovah e dip̃adoa tea maga waina ku pavatu ara, go p̃a wo da disu p̃ia pae ara mau.