Read Nguna Togoa Etafe North YEREMIAH 20 Bible Online

YEREMIAH 20 - Nguna Togoa Etafe North bible

YEREMIAH 20

¹Go Pashur natu ni Immer tea viri, waina e pei nap̃au ni tea vavai maga ekopu ni nasum̃a ki Yehovah, e dogo naga Yeremiah e peanoasai naleo maga wanogoe.

²Go Pashur e atugi profeta Yeremiah, po alasoki nam̃elena maga ki nakau alatisoki waina e doko namata‐pua ni Benyamin doko taleva ni elagi, nap̃irikia ni nasum̃a ki Yehovah.

³Go e pakilina matamai ki nia, naga Pashur e piragi lua Yeremiah dave m̃elu dua ki nakau alatisoki. Go Yeremiah e noa ki nia, e naga, Yehovah e da salagisam̃a ki Pashur mau, ma ki Tea Vakamatakua doko nap̃irikia maga.

⁴Nalakena Yehovah e noa dapala nea, e naga, P̃a leo, aga wo mari ko p̃a vei tea vakamatakua sikai dum̃am̃a paki‐go, go paki tam̃a ri maga mamau puti: go euga wo dowo ki lova ki tea kokona ki da maga, go namatam̃a eroga wo leo punusi a: go aga wo pitua ki Yudah mamau paki nam̃elearu ni nawota ni Babelon, go nae ega wo piragi lua pavakoto ara paki Babelon pano, go ega wo atugi ra ki lova.

⁵Go aga wo pitua ki nasogolapaana maga mamau puti ni natokoana waia, go nataluaana kakana maga mamau puti, go sara naleo wia masauniana kakana maga mamau puti, go naleo tauakiana wia maga mamau puti ki nawota maga ni Yudah, tea mamau puti wanogoe aga wo pitua ki da paki nam̃elearu ni tea kokona ki da maga, go nara euga wo dape lua pavakoto ara, po puti lua ra, po dape lua ra paki Babelon pano.

⁶Go nigo Pashur, go tea maga mamau puti waina eu doko nasum̃a anigo doko, kuga wo pei tea viragi‐lua‐pavakotoana: go p̃a wo pei tea viragiana paki Babelon pano, go tokora wanogoe p̃a wo mate asa, go tokora wanogoe p̃a wo pei tea ovakiana asa, nigo, go tam̃a ri maga mamau puti waina ku madeada peanoasai nasorosoroana.

⁷Yehovah O, ku piragi sasap̃o kinau, go a pei tea viragi‐sasap̃okiana: nigo ku kasua liu au, go ku marimatua kinau: a po pei tea vasasaudoakiana sikai naaleatia mamau, sara naata eu do muru ki saudoa kinau.

⁸Nalakena ragi waina a pasa, a kuapioso; a kuapioso po naga, Namaripavakotoana go namarisakiana! Nalakena navasaana ki Yehovah e maginau pei navasapinoakiana sikai, go navasadaoana sikai sara naaleatia.

⁹Go a naga, Aga wo da pasa lagati a, kite moro noa nagisana mau; ma tea waina e dakiusi nakapu vavaga sikai waina e pei tea kokoroana navatugu maga, e doko nap̃op̃ogu, go a mawosa ki nasokiana, go a da mariatae soki du mau.

¹⁰Nalakena a dogo nataururuana ki tea laapa, namatakuana e doko daliviri; eu naga, Tuga vasa dip̃a e, tuga vasa dip̃a e. Naatam̃oli maga ni natam̃ateana aginau waina eu pavaigoro raki waina a pe dapilagona, eu naga, Mase e pe wo pei tea surueana, go tu pe wo marimatua ki nia, go tu pe wo mari nasikoana anigida paki nia.

¹¹Ma Yehovah e sikoti au doko, e pei tea marimatua go tea mataukiana sikai: nalakena tea wanogoe tea maga waina eu kopalele au euga wo dapilagona, go euga wo da marimatua mau: euga wo maliere p̃arua, nalakena euga wo da mari manumatua mau: navasadaoana adeada ega wo du mau du, ega wo da pei tea maliokiana mau.

¹²Ma Yehovah ki taua maga O, waina ku do maridogo tea leana, waina ku do leo punusi nap̃op̃o ni naatam̃oli go namidodoana, p̃a suasua kinau naga aga leo punusi nasikoana anigo paki da; nalakena a noa pakasa ki navululuana aginau paki‐go.

¹³Kuga lega ki Yehovah, kuga samasama ni Yehovah: nalakena e pualua naata ni tea tika m̃elu dua ki nam̃elearu ni tea mari naleo sa maga.

¹⁴Naaleatia waina a pakilina asa ega vei tea vasasakiana: naaleatia waina p̃ilagu e dape au asa ega ta pei tea vasap̃iakiana mau.

¹⁵Navasasakiana ega toko naatam̃oli waina e dape narogorogoana maga umai paki tamagu, doko do naga, Piakiki naanoai sikai e manigo pakilina; doko do mari a e laelaea p̃arua asa.

¹⁶Go naatam̃oli wanogoe ega takiusi natokoana maga waina Yehovah e dap̃olosiwo ki da, po da midoa ki piri asa mau: go ega rogo nakuapiosoana sikai malip̃ogi, go nararasaana aleati;

¹⁷Nalakena e da mari punue au doko nasum̃a ni kanao mau; e pe tapala nogoe p̃ilagu e pe maginau pei matigo, go e pe vilake au doko pa pa e pe tu mau du.

¹⁸Ekasana a dave m̃elu nasum̃a ni kanao naga aga vunusi nawosimawosaana go nasusueana, naga naaleatia aginau maga euga wo mavunuvunu ki namaliereana?