Read Nguna Togoa Etafe North YEREMIAH 21 Bible Online

YEREMIAH 21 - Nguna Togoa Etafe North bible

YEREMIAH 21

¹Navasaana waina e pae Yehovah umai paki Yeremiah, ragi waina nawota Sedekiah e dip̃aki lua Pashur natu ni Malkiyah, go Sefaniah natu ni Maaseiah tea viri pa punusi a,

²doko do naga, P̃a maginami pusuusu ki Yehovah, a pavara ni ko asa; nalakena Nebukadnessar nawota ni Babelon e do mari navakalo dip̃a gami: mase Yehovah e pe wo mari paki gami ega vae nawosiana ni namagaana aneana maga mamau puti, po mari a e pe m̃elu dua ki gami pano.

³Go Yeremiah e noa ki da, e naga, Kuga noa ega tapala nea paki Sedekiah,

⁴kuga naga, Yehovah, Sup̃e ki Israel, e noa dapala nea, e naga, Kuga leo, nalikau maga ni navakalo waina eu doko nam̃elearumu maga, waina ku do marimari dip̃a nawota ni Babelon asa, go dip̃a naka ni Kaldea waina eu kelugoro mu etaku ni p̃aaka maga, aga wo mari ra euga m̃elu dua ki mu pano, go aga wo piragi saisai ki da euga toko m̃aleoputo ni natokoana waia.

⁵Go kinau aga wo dum̃agu marimari dip̃a mu ki nam̃elearu saikiana sikai, go ki aru kasua sikai doko namaetoana, go doko namaritausuana, go doko namaritausuana warua.

⁶Go aga wo atugi naatatoko maga ni natokoana waia, naatam̃oli go nalo tuavati euga mamau: euga wo mate ki nasasanaana sa warua liu sikai.

⁷Go edaku ki tea wanogoe, Yehovah e noa e, aga wo pitua ki Sedekiah nawota ni Yudah, nara ma tea suasua aneana maga, go narei ni natokoana waia waina euga ta mate ki nasasanaana sa, go ki lova, go ki navitoloana, aga wo pitua ki da paki nam̃elearu ni Nebukadnessar nawota ni Babelon, go paki nam̃elearu ni tea kokona ki da maga, go paki nam̃elearu ni tea maga waina eu laaga namauriana adeada: go nae ega wo atugi ra ki nawoka ni lova; ega wo da mari malemale ra mau, kite dodomi ra mau, kite maritadodomi ra mau.

⁸Go p̃a noa ki narei waia, p̃a naga, Yehovah e noa dapala nea, e naga, Kuga leo, a lawo ki napua paki namauriana go ki napua paki namateana ero doko naraemu.

⁹Naata waina ega toko natokoana waia doko, ega wo mate ki lova, go ki navitoloana, go ki nasasanaana sa: ma naata waina ega tave pano, po dowo pano paki naka ni Kaldea waina eu kelugoro mu, nae ega wo mauri, go namauriana aneana ega wo maneana pei tea vuti‐lua‐pavakotoana sikai.

¹⁰Nalakena a lawo ki naraegu e dip̃a natokoana waia naga aga mari tea sa asa, po da mari tea wia asa mau, Yehovah e noa e: ega wo pei tea vituakiana paki nam̃elearu ni nawota ni Babelon, go nae ega wo dap̃ara ki nia ki nakapu.

¹¹Go nalo ni nasum̃a ki nawota ni Yudah, kuga rogo navasaana ki Yehovah,

¹²waina e naga, Nasum̃a ni David O, Yehovah e noa dapala nea, e naga, P̃a mari naleanaana sara malip̃ogi, po pualua tea viragilua‐pavakotoana m̃elu dua ki nam̃elearu ni tea riesoki, mase namaritausuana aginau e pe m̃elu pano dakiusi nakapu vavaga, po soro dapala waina te naata e pe ta mariatae puepunue a mau, nalakena namariana sa animu maga.

¹³P̃a leo, kinau a mari dip̃a ko, naatatoko ni nap̃aloa O, go vatu laketoko ni malo matemate, Yehovah e noa e; nigo waina ku naga, Sei ega wo siwo umai dip̃a gami? Kite sei ega wo sili paki malo atatoko aginami maga?

¹⁴Ma kinau aga wo parati mu ega vataka ni nawa ni natomariana animu maga, Yehovah e noa e: go aga wo dokoni nakapu sikai mala ni nakau kakana, go ega wo gani dinomi sara naleo waina eu doko dalivirigoro e.