Read Nguna Togoa Etafe North YEREMIAH 22 Bible Online

YEREMIAH 22 - Nguna Togoa Etafe North bible

YEREMIAH 22

¹Yehovah e noa dapala nea, e naga, P̃a siwo paki nasum̃a ki nawota ni Yudah pano, po noa navasaana waia tokora wanogoe,

²P̃a naga, P̃a rogo navasaana ki Yehovah, nawota ni Yudah O, waina ku dasake doko malo tasake ki David, nigo, go tea suasua anigo maga, go narei anigo waina eu do sili pae namata‐pua maga waia.

³Yehovah e noa dapala nea, e naga, P̃a mari naleanaana go namarinaleoleanaana, po pualua tea vuti‐lua‐pavakotoana m̃elu dua ki nam̃elearu ni tea riesoki: go p̃a ta mari tea waina e dagele mau, p̃a ta mari pavakoto mau, paki nam̃enaki, kite paki namatapesu, kite nagoroi malepu, go p̃a ta daki nada tautau tokora waia mau.

⁴Nalakena ku pe rogo parati ki navasaana wanogoe, nawota maga waina eu dasake doko malo tasake ki David, eu pe wo sili pae namata‐pua maga ni nasum̃a waia, doko do pei tea musagiana ki kariot maga, go doko do sakesaake horse maga, nara ma tea suasua adeada maga, go narei adeada.

⁵Ma ku pe karai dogo parati ki navasaana maga wanogoe, a pivisa pae nagisagu, Yehovah e noa e, naga nasum̃a waia e pe wo pei maso maladi sikai.

⁶Nalakena Yehovah e noa dapala nea nalo ni nasum̃a ki nawota ni Yudah, e naga, Ku maginau pei tea takiusi Cilead, dakiusi nap̃au ni Lebanon: ma aga wo mari ko p̃a vei masop̃alo sikai, go natokoana maga waina naatam̃oli ega tika ara.

⁷Go aga wo mari m̃ata ki tea marisasaki maga dip̃a ko, euga vilake nalikau adeada maga sara naata sikasikai; go euga wo daekotokotovi nakau sidar wialua anigo maga, po nadi ki da paki nakapu.

⁸Go nalauna laapa euga wo surata liu natokoana waia, go euga wo dum̃ada noa ki da, sara naata sikasikai paki tea ni m̃aladigi ki nia, euga wo naga, Ekasana Yehovah e mari dapala nea paki natokoana warua waia?

⁹Go euga wo pasadara, po naga, Nalakena eu doropusi navasasokiana ki Yehovah Sup̃e adeada, po lotu ki sup̃e p̃ota maga, po madeada suasua.

¹⁰Kuga ta dagisi tea mate mau, kite susue nalo kakana mau: ma kuga tagisi p̃arua ki tea waina ega wo surata pano; nalakena nae ega wo da moro liliu umai mau, kite moro punusi navanua atatoko aneana mau.

¹¹Nalakana Yehovah e noa dapala nea nalo ni Shallum natu ni Yosiah, nawota ni Yudah, waina e maramara du oli tamana Yosiah, waina e m̃elu dua ki tokora waia po pano, e naga, Ega wo da moro liliu paki nia mau;

¹²Ma doko tokora waina eu piragi‐lua‐pavakoto asa pano, tokora wanogoe ega wo mate asa, go ega wo da moro punusi navanua waia mau.

¹³Ai ki naata waina e davagi nasum̃a aneana doko namarinaleotageleana, go em̃ago ni elagi aneana maga doko namariana waina e da leana mau; waina e mari tea ni m̃aladigi ki nia e maneana suasua namoriana e dika, po da dua e te navatuna dip̃a nawosiana aneana mau;

¹⁴Waina e naga, Aga wo dum̃agu maginau davagi nasum̃a welewelea sikai go em̃ago ni elagi warua maga: go waina e dum̃ana dae namata leoduru maga asa; po duri napapa sidar ekopu kakana, po puluti a ki tea miala kesakesa.

¹⁵P̃a wo maramara nalakena ku mari manumatua nalo ni sidar, kite? Tamam̃a e da ganikani po munu, po mari naleanaana go namarinaleoleanaana mau, kite? Go nae e doko p̃ia doko.

¹⁶E pasap̃otae navululuana ki tea rogokitesa go tea tika; go e doko p̃ia doko. Go tea wanogoe e da pei naga ega atae au, kite? Yehovah e noa e.

¹⁷Ma namatam̃a go nap̃op̃om̃a ku da lawo ki da paki te navatuna mau, ma eu doko namatam̃aguraana, go natakiana ni nada tautau, go nariesokiana, go namaripavakotoana, naga euga mari tea maga wanogoe euga sikida.

¹⁸Nalakena tea wanogoe Yehovah e noa dapala nea nalo ni Yehoiakim natu ni Yosiah, nawota ni Yudah, e naga, Euga wo da dagisi a mau, doko do naga, Ai taigu! Kite, Ai goregu! Euga wo da dagisi a mau, doko do naga, Ai nawota! Kite, Ai nasamasamaana aneana!

¹⁹Ega wo pei tea ovakiana naovakiana ni ass sikai, ega wo pei tea rosagiana po pei tea nadikiana paki etaku ni namata‐pua maga ni Yerusalem pano.

²⁰P̃a sake paki Lebanon pano, po kuapioso; go p̃a sike nadaleom̃a Bashan: po pioso m̃elu Abarim; nalakena tea dodomi au maga mamau puti eu pei tea maripuolikiana.

²¹A pasa paki‐go ragi ni natokop̃iaana anigo; ma ku naga, A karai dogo e. Tea wanogoe e pei natomariana anigo waina ku mari a pae ragi ni navei‐natureai‐ana anigo pa pa paki naaleatia waia, naga ku da dogo parati ki nadaleogu mau.

²²Nalagi ega wo gani dinomi tea leoparatiki anigo maga mamau puti, go tea dodomi anigo maga euga wo pei tea viragi‐lua‐pavakotoana: ragi wanogoe p̃a wo maliere po pinovinoi lomau nalakena nasigisigileoana mamau anigo.

²³Nigo naatatoko ni Lebanon O, waina ku mari vete anigo doko nakau sidar maga, p̃a wo pei tea saup̃iakiana ragi waina navitinuana ega wo pa parati ki‐go, navitinuana waina e dakiusi nagoroi sikai waina e dogo navitinuana ni navisoloana!

²⁴Kinau a mauri, Yehovah e noa e, go Koniah natu ni Yehoiakim nawota ni Yudah e pe vei rig waina e doko nam̃elearugu ni matua, ma a pe vaku lua ko m̃elu dua ki nia pano;

²⁵Go aga wo pitua ki‐go paki nam̃elearu ni tea maga waina eu laaga namauriana anigo, go paki nam̃elearu ni tea maga waina ku matau ki da, paki nam̃elearu ni Nebukadnessar nawota ni Babelon nogo, go paki nam̃elearu ni naka ni Kaldea.

²⁶Go aga wo nadi ki‐go pano, nimu ma p̃ilam̃a waina e dape ko, paki navanua p̃ota sikai waina ku da pakilina asa mau; go tokora wanogoe p̃a wo mate asa.

²⁷Ma navanua waina nap̃op̃oda e masau p̃arua naga ega liliu paki asa, tokora wanogoe euga wo da liliu paki asa mau.

²⁸Naatam̃oli wanogoe, Koniah nogo, e pei lasa mawora sikai waina e pei tea midoakip̃alokiana, kite? E pei lasa sikai waina eu da maro asa mau, kite? Ekasana eu pei tea kopasiluaana pano, nara ma naworana, po pei tea nadikiana paki navanua sikai waina eu da atae a mau?

²⁹Navanua O, navanua, navanua, p̃a rogo navasaana ki Yehovah.

³⁰Yehovah e noa dapala nea, e naga, Kuga midiri nagisa ni naatam̃oli wanogoe naga e pei tea tika piakiki, naatam̃oli sikai waina ega wo da disu p̃ia doko naaleatia aneana maga mau: nalakena naworana te naata sikai kakana ega wo da disu p̃ia mau, ega wo da dasake doko malo tasake ki David, kite maramara doko Yudah mau.