Read Nguna Togoa Etafe North YEREMIAH 23 Bible Online

YEREMIAH 23 - Nguna Togoa Etafe North bible

YEREMIAH 23

¹Ai ki tea leoparatiki maga waina eu mari puoli ki po daperavera ki shiip maga ni napega aginau!

²Yehovah e noa e. Nalakena tea wanogoe Yehovah, Sup̃e ki Israel, e noa dapala nea dip̃a tea leoparatiki maga waina eu pagani narei aneana, e naga, Nimu ku daperavera ki navata aginau, po kopasi lua ra pano, go ku da pa punusi ra mau; kuga leo, aga wo parati mu namarinaleosaana animu maga, Yehovah e noa e.

³Go aga wo piragi saisai ki namagovai ni navata aginau waina eu pei tea toropusiana doko, m̃elu dua ki navanua maga mamau puti waina a kopasi lua ra paki asa pano, go aga wo moro piragi ra liliu paki loga adeada maga; go euga wo pavakawora po laapa.

⁴Go aga wo lawo ki tea leoparatiki maga dap̃au ra waina euga wo pagani ra: go euga wo da moro mataku mau, kite m̃anaunau mau, go tea sikai kakada ega wo da puoli mau, Yehovah e noa e.

⁵Kuga leo, naaleatia maga euga wo umai, Yehovah e noa e, go aga wo magi David sike lawo ki Ara leana sikai, go nae ega wo maramara pei nawota po mari manumatua, go ega wo mari navasap̃otaeana go naleanaana doko navanua.

⁶Doko naaleatia aneana maga Yudah ega wo pei tea mautiana, go Israel ega wo doko p̃ia doko: go nagisana waina ega wo pei tea salagisana asa ega vei tea waia: Yehovah e pei namarinaleoleanaana anigida.

⁷Nalakena tea wanogoe kuga leo, naaleatia maga euga wo umai, Yehovah e noa e, go euga wo da moro noa naga, Yehovah e mauri, waina e piragi lua Israel natuna maga m̃elu dua ki navanua ni Ityipt sake umai;

⁸Ma euga wo naga, Yehovah e mauri, waina e piragi lua po maraki naworawora ni nasum̃a ni Israel m̃elu dua ki navanua ni north sake umai, go m̃elu dua ki navanua maga mamau puti waina e kopasi lua ra paki asa pano; go euga wo doko navanua adeada doko.

⁹Nalo ni profeta maga. Nap̃op̃ogu e mawora nap̃alaugu, navatugu maga mamau puti eu duruuru; a dakiusi naatam̃oli matamaloku sikai, go dakiusi naatam̃oli sikai waina waine e marimatua ki nia; nalakena Yehovah, go nalakena navasaana tapu aneana maga.

¹⁰Nalakena navanua e pura ki tea maripele maga; go nalakena navasasakiana, navanua e do malepu pano; napega maga ni masop̃alo eu kokolo sua; napua adeada waina eu dausi a pano, e pei tea ni namaripavakotoana, go namarimatuaana adeada e da pei tea leana mau.

¹¹Nalakena profeta go tea viri eu mamau pei tea mari saudoa maga; io, a po pap̃ai nasigisigileoana adeada ekopu ni nasum̃a aginau, Yehovah e noa e.

¹²Nalakena tea wanogoe napua adeada ega wo madeada pei tokora m̃arasarasa maga doko namaligo: euga wo pei tea tieluaana pano, po dowo asa: nalakena aga wo mari nasaana ega wo pa parati ki da, ega vei natau ni navarati‐ra‐ana, Yehovah e noa e.

¹³Go a punusi naveilalaana doko profeta maga ni Samaria; eu peanoasai pae nagisa ni Baal, po mari narei aginau Israel eu sasap̃o pano.

¹⁴Go a moro punusi tea waina e sa do liu, doko profeta maga ni Yerusalem; eu do maripele, po do surata doko nasorosoroana maga, go eu mari nam̃elearu ni tea marinaleosa maga e kasua, dapala waina te naata sikai e da maradoa m̃elu dua ki nasigisigileoana aneana mau: eu po mamau puti pei tea tapala Sodom doko namatagu, go naatatoko kakana maga eu po dapala Comorrah.

¹⁵Nalakena tea wanogoe Yehovah ki taua maga e noa dapala nea nalo ni profeta maga, e naga, Kuga leo, aga wo pagani ra ki nakokonae, po mari ra euga munu noai ni nakokonaana: nalakena naveinakalepoana e dave m̃elu profeta maga ni Yerusalem po pano papule navanua mamau.

¹⁶Yehovah ki taua maga e noa dapala nea, e naga, Kuga ta daki dorogo paki navasaana maga ki profeta maga mau, waina eu do peanoasai asa paki mu; eu do pasa pisei ki mu tea waina e p̃alo: eu do pasa ki navunusiana maga ni nap̃op̃oda, eu da pasa ki tea waina e m̃elu nawoka ni Yehovah mau.

¹⁷Eu do pasa pitip̃atip̃a paki tea maga waina eu midoa ki p̃alo kinau, eu naga, Yehovah e naga, Kuga wo doko natam̃ateana; go eu noa ki tea maga mamau puti waina eu do dum̃ada surata nakasuaana ni nap̃op̃oda, eu naga, Te nasaana ega wo da pa parati ki mu mau.

¹⁸Nalakena sei kakada waina nara ma tea vusum̃aki maga ki Yehovah eu mamau lawodu, naga ega atae p̃otae po dogo navasaana aneana? Kite sei kakada waina e dogo po dogo soki navasaana aneana?

¹⁹Kuga leo, suitaviro ki Yehovah, namaritausuana aneana nogo, e m̃elu pano, io, e pei suitaviro sa liu sikai: ega wo atugi nap̃au ni tea sigisigileo.

²⁰Namaetoana ki Yehovah ega wo da liliu pano mau, pa pa ega wo mari sua, go pa pa ega wo pakavuro namidodoana maga waina e midoa ki soki ra nap̃op̃ona: naaleatia edaku mau maga kuga wo midoa ki atae a, go ega wo dokolina ki mu.

²¹Kinau a da dip̃aki lua profeta maga wanogoe pano mau, ma eu dum̃ada pano: kinau a da pasa paki da mau, ma eu dum̃ada peanoasai.

²²Ma nara ma tea vusum̃aki aginau maga eu pe mamau lawodu, eu pe rogorogo ki navasaana aginau maga paki narei aginau, go eu pe vuadoa ra m̃elu dua ki napua sa adeada maga, go m̃elu dua ki natomariana sa adeada maga.

²³Kinau a pei Sup̃e sikai ni m̃aladigi sikina, Yehovah e noa e, go a da pei Sup̃e sikai ni uvea mau, kite?

²⁴Naata sikai e mariatae dokoloku tokora sili maga naga a mari sa punusi a mau, kite? Yehovah e noa e. Kinau a da doko pakavuro nakoroatelagi go maramana mau, kite?

²⁵Yehovah e noa e. Kinau a dogo sua tea waina profeta maga eu noa e waina eu peanoasai nasorosoroana maga doko nagisagu, doko do naga, A po p̃erea ki nap̃erea sikai, a po p̃erea ki nap̃erea sikai.

²⁶Pa pa paki seve ragi tea wanogoe ega wo doko nap̃op̃o ni profeta maga waina eu do peanoasai nasorosoroana maga, go waina eu do peanoasai namarisoreana ni nap̃op̃oda?

²⁷Waina eu midoa ki nia naga euga mari narei aginau euga malio ki nagisagu, pae nap̃erea adeada maga waina eu dum̃ada noakisai ra asa, sara naata sikasikai paki tea ni m̃aladigi ki nia, dakiusi waina tamada maga eu pea malio ki nagisagu nalakena Baal?

²⁸Profeta waina ega p̃erea ki nap̃erea sikai, ega noasai nap̃erea sikai; go tea waina e peani navasaana aginau, ega vasa lomau ki navasaana aginau. Nap̃olaga e pitotowo ma whiit, kite? Yehovah e noa e.

²⁹Navasaana aginau e da dakiusi nakapu vavaga mau, kite? Yehovah e noa e; go dakiusi hammer sikai waina e p̃oka p̃oroworosi vatu laketoko, kite?

³⁰Nalakena tea wanogoe kuga leo, kinau a marimari dip̃a profeta maga, Yehovah e noa e, nara waina eu do panako navasaana aginau maga sara naata sikasikai ki tea ni m̃aladigi ki nia.

³¹Kuga leo, a marimari dip̃a profeta maga, Yehovah e noa e, nara waina eu do pasa ki namenada, doko do naga, Yehovah e noa e.

³²Kuga leo, a marimari dip̃a tea maga waina eu do peanoasai nap̃erea sorosoro maga, Yehovah e noa e, go waina eu do noasai ra, po mari narei aginau eu sasap̃o ki nasorosoroana adeada maga, go ki navasapukap̃aloana adeada: ma kinau a da dip̃aki lua ra pano mau, kite dip̃aki da mau; go euga wo da magi narei waia mari te navatuna mau, Yehovah e noa e.

³³Go ragi waina narei waia, kite profeta, kite tea viri sikai ega wo pusuusu paki‐go, po naga, Naveanoasaiana ki Yehovah e pei nasava? P̃a noa ki da, p̃a naga, Seve naveanoasaiana! Go aga wo mari puoli ki‐go, Yehovah e noa e.

³⁴Go nalo ni profeta, go tea viri, go narei, waina ega wo noa naga, Naveanoasaiana ki Yehovah; kinau aga wo parati naatam̃oli wanogoe go nasum̃a aneana.

³⁵Kuga noa ega tapala nea dum̃amu paki mu sara naata sikasikai paki tea ni m̃aladigi ki nia, go sara naata sikasikai paki taina, kuga naga, Yehovah e pasadara nasava? Kite, Yehovah e noa nasava?

³⁶Go kuga ta moro pasa nalo ni naveanoasaiana ki Yehovah mau; nalakena navasaana ki sara naatam̃oli sikasikai ega tum̃ana pei naveanoasaiana aneana; nalakena ku doa sa ki navasaana maga ki Sup̃e mauri, ki Yehovah ki taua maga, Sup̃e anigida.

³⁷P̃a noa ki profeta wanogoe, p̃a naga, Yehovah e pasadara ko ki nasava?

³⁸Kite, Yehovah e noa nasava? Ma ku pe noa, Naveanoasaiana ki Yehovah; Yehovah e pe wo noa dapala nea: Nalakena ku noa navasaana waia, Naveanoasaiana ki Yehovah, go kinau a dip̃aki lua noa ki mu naga, Kuga ta noa, Naveanoasaiana ki Yehovah mau;

³⁹Nalakena tea wanogoe kuga leo, aga wo malio ki mu lomau, go aga wo mari puoli ki mu, go natokoana waina a dua mu asa, nimu ma tamamu maga, aga wo mari puoli ki nia m̃elu dua ki namatagu:

⁴⁰Go aga wo mari navasapinoaana doko mau doko sikai ega wo umai doko mu, go namaliereana sikai waina ega tu du po du mau du, waina ega wo da pei tea maliokiana mau.