Read Nguna Togoa Etafe North YEREMIAH 24 Bible Online

YEREMIAH 24 - Nguna Togoa Etafe North bible

YEREMIAH 24

¹Yehovah e pisei ki nau navunusiana waia, go p̃a leo, nala dua ni napuliva ero pei tea lawokiana ero doko kivea ki nasum̃a tapu ki Yehovah; e pei edaku ki ragi waina Nebukadnessar nawota ni Babelon e piragi‐lua‐pavakoto Yekoniah natu ni Yehoiakim, nawota ni Yudah, go tea maraki maga ni Yudah, nara ma mataisau maga ni nakau go mataisau maga ni airon, m̃elu dua ki Yerusalem, po piragi lua ra paki Babelon pano.

²Nala sikai napuliva wia maga eu doko asa, eu dakiusi nawa vea ni takavea maga: go nala kerua napuliva sa maga eu doko asa waina eu sa mau sa, naga eu mari sa pei tea kaniana mau.

³Go Yehovah e noa kinau, e naga, Ku punusi nasava, Yeremiah? Go a naga, Napuliva maga; napuliva wia maga, waina eu p̃ia pa; go tea sa maga waina eu sa liu, waina eu mari sa pei tea kaniana mau, nalakena eu sa p̃arua.

⁴Go navasaana ki Yehovah e umai paki nau, doko do naga,

⁵Yehovah Sup̃e ki Israel, e noa dapala nea, e naga, Ega tapala napuliva wia maga waia, ega tapala nogoe aga wo midoa ki nia naga tea viragi‐luapavakotoana maga ni Yudah eu p̃ia, nara waina a dip̃aki lua ra m̃elu dua ki tokora waia pano paki navanua ki naka ni Kaldea, naga euga toko p̃ia doko.

⁶Nalakena aga wo lawo ki namatagu maga doko ara raki tea waina e p̃ia, go aga wo moro piragi lua ra umai paki navanua waia: go aga wo davagi ra, po da dakai ra mau; go aga wo lawo ki da, po da paku dakati ra mau.

⁷Go aga wo dua ra namidodoana sikai naga euga atae au, naga kinau a pei Yehovah: go nara euga wo pei narei aginau, go kinau aga wo pei Sup̃e adeada: nalakena euga wo maradoa liliu punusi au ki nap̃op̃oda mamau.

⁸Go nalo ni napuliva sa maga, waina eu mari sa pei tea kaniana mau, nalakena eu sa liu; Yehovah e noa dapala nea, e naga, Ega tapala nogoe aga wo pitua ki Sedekiah nawota ni Yudah, go tea maraki aneana maga, go namagovai ni Yerusalem waina e pei tea toropusiana doko navanua waia, go tea maga waina eu doko navanua ni Ityipt doko:

⁹Aga wo pitua ki da naga euga vei tea duletuleakiana usuraki namarakiana maga mamau puti ni maramana, naga euga toko sa doko; naga euga wo pei navasapinoaana sikai go naluluakia sikai, navasasaudoaana sikai go navasasakiana sikai, doko sara tokora waina aga wo kopasi lua ra paki asa pano.

¹⁰Go aga wo dip̃aki lua lova, go navitoloana, go nasasanaana sa euga wo dape parati ki da pa pa euga wo pei tea maripuoli‐kiana m̃elu dua ki navanua waina a dua ra asa, nara ma tamada maga.