Read Nguna Togoa Etafe North YEREMIAH 25 Bible Online

YEREMIAH 25 - Nguna Togoa Etafe North bible

YEREMIAH 25

¹Navasaana waina e umai paki Yeremiah nalo ni narei mamau puti ni Yudah, doko natau kevati ki Yehoiakim natu ni Yosiah, nawota ni Yudah; tea sikai maau wanogoe e pei natau vea ki Nebukadnessar, nawota ni Babelon;

²E pei navasaana wanogoe waina profeta Yeremiah e noa ki narei mamau puti ni Yudah asa, go ki naatatoko maga mamau puti ni Yerusalem,

³e naga, Pae natau kerualima sikai tamate dolu ki Yosiah natu ni Amon, nawota ni Yudah, pa pa paki naaleatia waia, natau kerualima dua tamate dolu wanogoe, navasaana ki Yehovah e umai paki nau, go kinau a pasa paki mu asa, a pasa pitip̃atip̃a; ma nimu ku da daki dorogo mau.

⁴Go Yehovah e dip̃aki lua tea suasua aneana profeta maga mamau puti pa punusi mu pitip̃atip̃a; ma ku da daki dorogo mau, kite daki nadaligamu naga kuga rogo e mau;

⁵Eu naga, Kuga maradoa liliu sara naata sikasikai m̃elu dua ki napua sa aneana, go m̃elu dua ki natomariana sa aneana maga, go kuga toko navanua waina Yehovah e dua mu go tamamu maga asa ragi ni tuai, ega vei animu pa pa ega tu mau du:

⁶Go kuga ta dausi sup̃e p̃ota maga mau naga kuga madeada suasua, po lotu ki da, kite mari p̃auluulu ki nau naga aga maeto ki nawosiana ni nam̃elearumu maga; go aga wo da mari sa ki mu mau.

⁷Ma ku da daki dorogo paki nau mau, Yehovah e noa e; ma ku mari p̃auluulu kinau po mari au a maeto ki nawosiana ni nam̃elearumu maga, po dum̃amu mari sa ki mu asa.

⁸Nalakena tea wanogoe Yehovah ki taua maga e noa dapala nea, e naga, Nalakena ku da dogo parati ki navasaana aginau maga mau,

⁹Kuga leo, aga wo dip̃aki lua po paraki naworawora maga mamau puti ni north umai, Yehovah e noa e, go tea suasua aginau Nebukadnessar nawota ni Babelon, go aga wo piragi ra umai dip̃a navanua waia, go dip̃a natokoana kakana maga, go dip̃a nalauna maga mamau puti waia daliviri; go aga wo mari puoli ki da, po mari ra euga vei tea ni nasaram̃akotoana sikai, go tea ni nasaram̃asikaana sikai, go maso maladi sikai waina ega tu du po du mau du.

¹⁰Go aga wo dape lua kiada nadaleo ni nalaelaeaana go nadaleo ni nasamasamaana, nadaleo ni tea vitawiri, go nadaleo ni tea laki, nadaleo ni vatumaa, go namarama ni nasulu.

¹¹Go navanua mamau waia ega wo pei maso maladi sikai, go tea ni nasaram̃akotoana sikai; go nalauna maga waia euga wo magi nawota ni Babelon suasua natau rualima larua.

¹²Go ega wo pakilina, ragi waina natau rualima larua euga wo pei tea vakavuroana, naga aga wo parati nawota ni Babelon, go nalauna wanogoe, go navanua ki naka ni Kaldea, Yehovah e noa e, nalakena namarinaleotagele adeada go aga wo maria ega vei maso maladi sikai pa pa ega tu mau du.

¹³Go aga wo mari navasaana aginau maga mamau puti waina a noa sua e dip̃a e, naga euga wo pakilina ki navanua wanogoe, tea mamau puti waina e pei tea midiriana tusi waia, waina Yeremiah e peanoasai a dip̃a nalauna maga mamau puti.

¹⁴Nalakena nalauna laapa go nawota warua maga euga wo mari ra euga vei naviti adeada maga: go aga wo lagati dua ra ega vataka ni natomariana adeada maga, go ega vataka ni nawosiana ni nam̃elearuda maga.

¹⁵Nalakena Yehovah, Sup̃e ki Israel, e noa dapala nea paki nau, e naga, P̃a tape lasa munu ni waine ni namaritausuana waia ki nam̃elearugu, po mari nalauna maga mamau puti waina aga wo dip̃aki lua ko pa punusi ra, naga euga munugi a.

¹⁶Go euga wo munu, po surata darataara, po doropa, nalakena lova waina aga wo dip̃aki lua e paki m̃aleoputo kakada.

¹⁷Go a dape lasa munu wanogoe ki nam̃elearu ni Yehovah, po mari nalauna maga mamau puti waina Yehovah e dip̃aki lua au pa punusi ra, naga eu munugi a: Yerusalem nogo,

¹⁸go natokoana maga ni Yudah, go nawota kakada maga, go tea maraki kakada maga, naga ega mari ra euga vei maso maladi sikai, go tea ni nasaram̃akotoana sikai, go tea ni nasaram̃asikaana sikai, go navasasakiana sikai; dapala waina e doko naaleatia waia;

¹⁹Faraoh nawota ni Ityipt, go tea suasua aneana maga, go tea maraki aneana maga, go narei aneana mamau puti;

²⁰Go nam̃enaki‐atatoko maga mamau puti waina eu sari ra doko, go nawota maga mamau puti ni navanua ni Us, go nawota maga mamau puti ni navanua ki Filistine maga, go Ashkelon, go Kasa, go Ekron, go namagovai ni Ashdod waina eu pei tea toropusiana doko;

²¹Edom, go Moab, go Ammon natuna maga;

²²Go nawota maga mamau puti ni Tair, go nawota maga mamau puti ni Sidon, go nawota maga ni navanua ni elau waina e doko taleva kerua ni natasi;

²³Dedan, go Tema, go Bus, go tea mamau puti waina eu alakotovi nalolu ni nap̃alakutuda maga;

²⁴Go nawota maga mamau puti ni Arabia, go nawota maga mamau puti ni naworawora maga waina eu sarisari doko masop̃alo doko;

²⁵Go nawota maga mamau puti ni Simri, go nawota maga mamau puti ni Elam, go nawota maga mamau puti ni Media;

²⁶Go nawota maga mamau puti ni north, tea ni uvea go tea ni m̃aladigi, sikai go sikai; go namarakiana maga mamau puti ni maramana, waina eu doko narae ni maramana: go edaku ki tea maga wanogoe, nawota ni Babelon ega wo munu.

²⁷Go p̃a noa ki da, p̃a naga, Yehovah ki taua maga, Sup̃e ki Israel, e noa dapala nea, e naga, Kuga munu, go kuga matamaloku, po lua, po dowo pakitano, po da moro duleana mau, nalakena lova waina kinau aga wo dip̃aki lua e pano paki m̃aleoputo kakamu.

²⁸Go ega wo doko, waina eu pe karai dape lasa munu wanogoe ki nam̃elearum̃a naga eu pe munu, p̃a noa ki da, p̃a naga, Yehovah ki taua maga e noa dapala nea, e naga, E one mu one naga kuga wo munu.

²⁹Nalakena p̃a leo, kinau a pae asa mari nasaana e pakilina ki natokoana waina e pei tea salagisana ki nagisagu, go nimu kuga wo da pei tea varatiana mau, kite? Kuga wo pei tea varatiana: nalakena aga wo pioso raki lova sikai dip̃a naatatoko maga mamau puti ni maramana, Yehovah ki taua maga e noa e.

³⁰Nalakena tea wanogoe p̃a veanoasai navasaana maga mamau puti waia dip̃a ra, po noa ki da, p̃a naga, Yehovah ega wo uru m̃elu elagi mau, po lua ki nadaleona pae nasum̃atokoana tapu aneana; ega wo uru kasua dip̃a navata aneana; ega wo pitua ki nararasaana sikai dip̃a naatatoko maga mamau puti ni maramana, ega tapala tea maga waina eu pasisoki nawa ni vaine.

³¹Namarip̃araiana sikai ega wo pei tea rogoana pa pa paki namatap̃ago ni maramana: nalakena Yehovah e peani navululuana sikai dip̃a nalauna maga, ega wo pululu ki sara nap̃okasi; go nalo ni tea sigisigileo, ega wo pitua ki da paki lova, Yehovah e noa e.

³²Yehovah ki taua maga e noa dapala nea, e naga, Kuga leo, nasaana ega wo m̃elu dua ki nalauna sikai po pano paki nalauna p̃ota sikai, go suitaviro warua sikai ega wo pei tea sikeana ega tuleana m̃elu namatap̃ago maga ni maramana.

³³Go naaleatia wanogoe tea maripunueana maga ki Yehovah euga wo doko pae namatap̃ago sikai ni maramana pano pa pa paki namatap̃ago kerua ni maramana: euga wo da pei tea tagisiana mau, kite pei tea viragisaisai‐kiana mau, kite pei tea ovakiana mau; euga wo pei natap̃ata doko narae ni natano.

³⁴Kuga lalagaarova, nimu tea leoparatiki maga, po kuapioso; po dum̃amu malulua ki mu natano‐apu, nimu tea tap̃au maga dap̃au navata: nalakena naaleatia maga ni namari‐punue‐mu‐ana eu po pakilina, go aga wo mari p̃oraworae mu, go kuga wo dowo dakiusi lasa wia masauniana sikai.

³⁵Go tea leoparatiki maga euga wo dika ki napua waina euga sava pae asa pano, go tea tap̃au dap̃au navata, ki tokora waina ega sava sili asa.

³⁶Kuga rogo nadaleo ni nakuapiosoana ki tea leoparatiki maga, go nalalagaarovaana ki tea tap̃au dap̃au navata! Nalakena Yehovah e mari napega adeada maga eu pei maso maladi.

³⁷Go loga maga ni natam̃ateana eu pei tea mariana eu dam̃ate doko, nalakena namaetoana vivitinu ki Yehovah.

³⁸E doropusi malo tokoana aneana, dakiusi laion: nalakena navanua adeada e po pei tea ni nasaram̃akotoana sikai nalakena nakasuaana ni lova waina e diesoki ra, go nalakena namaetoana vivitinu ki Yehovah.