Read Nguna Togoa Etafe North YEREMIAH 26 Bible Online

YEREMIAH 26 - Nguna Togoa Etafe North bible

YEREMIAH 26

¹Doko ragi ni naatulakeana ni namaramaraana ki Yehoiakim natu ni Yosiah, nawota ni Yudah, navasaana waia e pae Yehovah umai, doko do naga,

²Yehovah e noa dapala nea, e naga, P̃a lawodu roara ni nasum̃a ki Yehovah, po pasa paki natokoana maga mamau puti ni Yudah, waina eu rumai naga euga lotu doko ekopu ni nasum̃a ki Yehovah, ki navasaana mamau puti waina aga wo dip̃aki‐go naga p̃a noa ki da asa; p̃a ta mauti te navasaana sikai mau.

³Mase eu pe wo daki dorogo, po maradoa sara naata sikasikai m̃elu dua ki napua sa aneana; naga aga midoaki piri nasaana waina a midoa ki nia naga aga mari a paki da, nalakena natomariana sa adeada maga.

⁴Go p̃a noa ki da, p̃a naga, Yehovah e noa dapala nea, e naga, Ku pe karai dogo parati ki nau, po da surata doko nawotaeana aginau waina a lawo ki nia naraemu mau,

⁵Po da dogo parati ki navasaana maga ki tea suasua aginau profeta maga, waina a dip̃aki lua ra pano punusi mu pitip̃atip̃a, ma ku da dogo parati ki da mau;

⁶Kinau a pe wo mari nasum̃a waia e pe wo dakiusi Shiloh, po mari natokoana waia e pe wo pei navasasakiana sikai agi nalauna maga mamau puti ni maramana.

⁷Go tea viri maga go profeta maga go narei mamau puti eu dogo navasaana maga wanogoe ki Yeremiah ragi waina e pasa asa doko ekopu ni nasum̃a ki Yehovah.

⁸Go e pakilina, ragi waina Yeremiah e noa sua navasaana waina Yehovah e dip̃aki nia asa naga ega noa ki narei mamau puti asa, go e nopu, e pakilina naga tea viri maga, go profeta maga go narei mamau puti eu puasoki a, po naga, P̃a wo mate lomau.

⁹Ekasana ku peanoasai pae nagisa ni Yehovah, doko do naga, Nasum̃a waia ega wo dakiusi Shiloh, go natokoana waia ega wo pei maso maladi sikai, naatam̃oli ega tika asa? Go narei mamau puti eu pei tea saisaikiana doko daliviri Yeremiah ekopu ni nasum̃a ki Yehovah.

¹⁰Go ragi waina tea maraki maga ni Yudah eu dogo naleo maga wanogoe, eu pae nasum̃a ki nawota sake umai paki ekopu ni nasum̃a ki Yehovah; go eu doko natano tokora ni nasiliana Namata‐pua Vau ni nasum̃a ki Yehovah.

¹¹Go tea viri maga go profeta maga eu pasa paki tea maraki maga go paki narei mamau puti, po naga, Naatam̃oli waia e pataka ni namateana; nalakena e peanoasai dip̃a natokoana waia, dapala waina ku dogo sua e ki nadaligamu maga.

¹²Go Yeremiah e noa ki tea maraki maga go ki narei mamau puti, e naga, Yehovah e dip̃aki lua au umai naga aga veanoasai dip̃a nasum̃a waia go dip̃a natokoana waia ki navasaana maga mamau puti waina ku po dogo sua ra.

¹³Nalakena tea wanogoe kuga midoakidoa m̃elu dua ki napua animu maga go natomariana animu maga, po dogo parati ki nadaleo ni Yehovah Sup̃e animu; go Yehovah ega wo dum̃ana midoa ki piri nasaana waina e naga ega mari a dip̃a mu.

¹⁴Ma kinau, kuga leo, kinau a doko nam̃elearumu: kuga mari paki nau ega tapala waina ku pe midoa ki nia naga e p̃ia go e leana namatamu maga.

¹⁵Ma tea sikai maau, kuga atae lomau waina ku pe toropusi au paki namateana, ku pe wo dum̃amu mari nada tautau ega toko mu, go ega toko natokoana waia, go ega toko naatatoko kakana maga: nalakena e pei lomau Yehovah e dip̃aki lua au umai punusi mu naga aga vasa navasaana maga mamau puti waia nadaligamu.

¹⁶Go tea maraki maga go narei mamau puti eu noa ki tea viri maga go ki profeta maga, eu naga, E da leana naga naatam̃oli waia ega vei tea toropusiana paki namateana; nalakena e pasa paki gida pae nagisa ni Yehovah Sup̃e anigida.

¹⁷Go tea matua maga ni navanua seara kakada eu duleana, po pasa paki nasaisaiana mamau ni narei,

¹⁸po naga, Doko naaleatia maga ki Hesekiah nawota ni Yudah, Mikaiah naatam̃oli ni Moreshet e peanoasai; go e pasa paki narei mamau puti ni Yudah, po naga, Yehovah ki taua maga e noa dapala nea, e naga, Sion ega wo pei tea sisiana ega tapala vanua sikai, go Yerusalem ega wo pei taua sikai ni tea makaka maga, go tava ni nasum̃a tapu ega wo pei tokora vakilagi sikai ni mala ni nakau.

¹⁹Go Hesekiah nawota ni Yudah go Yudah mamau eu doropusi a paki namateana, kite? E da matau ki Yehovah, po da pavara narae ni Yehovah mau, go Yehovah e da dum̃ana midoa ki piri nasaana waina e noa sua e dip̃a ra mau, kite? Go nigida tuga wo dum̃agida mari tea sa warua liu dip̃a naatagida, kite?

²⁰Go naatam̃oli p̃ota sikai e doko sala vea waina e moro peanoasai pae nagisa ni Yehovah, e pei Uriah natu ni Shemaiah ni Kiriath‐yearim; go nae e peanoasai dip̃a natokoana waia go dip̃a navanua waia, go navasaana aneana e pataka sikai ma navasaana mamau puti ki Yeremiah:

²¹Go ragi waina nawota Yehoiakim, nara ma naatam̃oli marimatua aneana maga ni navakalo, go tea maraki aneana maga, eu dogo navasaana aneana maga, nawota e laaga naga ega toropusi a paki namateana; ma ragi waina Uriah e dogo e, e mataku, po sava pano, po paki Ityipt pano:

²²Go nawota Yehoiakim e dip̃aki lua naatam̃oli maga paki Ityipt pano, Elnathan natu ni Akbor nogo, nara ma naatam̃oli seara eu mamau paki Ityipt pano:

²³Go eu piragi lua Uriah m̃elu dua ki Ityipt umai punusi nawota Yehoiakim; waina e mari punue a ki lova, po nadi ki nap̃atoko mate aneana paki matigo maga ki naatam̃oli natuna maga.

²⁴Ma nam̃elearu ni Ahikam natu ni Shafan e sikoti Yeremiah, dapala waina e da pei tea vituakiana paki nam̃elearu ni narei naga ega vei tea toropusiana paki namateana mau.