Read Nguna Togoa Etafe North YEREMIAH 27 Bible Online

YEREMIAH 27 - Nguna Togoa Etafe North bible

YEREMIAH 27

¹Doko ragi ni naatulakeana ni namaramaraana ki Yehoiakim natu ni Yosiah, nawota ni Yudah, navasaana waia e pae Yehovah umai paki Yeremiah,

²e naga, Yehovah e noa dapala nea paki nau, e naga, P̃a tum̃am̃a manigo mari natali solisoki go nakau ni nanoa sikai, po sara ki nia nanoam̃a;

³Go p̃a tip̃aki lua navasaana paki nawota ni Edom, go paki nawota ni Moab, go paki nawota ki Ammon natuna maga, go paki nawota ni Tair, go paki nawota ni Sidon, pae nam̃elearu ni tea tautauana maga waina eu rumai paki Yerusalem naga euga vunusi Sedekiah nawota ni Yudah;

⁴Go p̃a tua ra natip̃akiana sikai naga euga noa ki nawota adeada maga asa, p̃a naga, Yehovah ki taua maga, Sup̃e ki Israel, e noa dapala nea, e naga, Kuga noa ega tapala nea paki nawota animu maga, kuga naga,

⁵Kinau a mari maramana, go naatam̃oli go nalo tuavati waina eu doko narae ni maramana, pae namarimatuaana warua aginau go pae aru saikiana aginau; go a pitua ki nia paki naata waina a masauna naga aga tua e asa.

⁶Go a po pitua ki navanua maga mamau puti wanogoe paki nam̃elearu ni Nebukadnessar nawota ni Babelon, tea suasua aginau; go nalo tuavati maga ni vanua nara ma a po dua e ara naga euga maneana suasua.

⁷Go nalauna maga mamau puti euga wo maneana suasua, go magi natuna, go natuna natuna, pa pa ragi ni navanua aneana ega wo umai: go ragi wanogoe nalauna laapa go nawota warua maga euga wo mari a ega vei naviti adeada naga ega madeada suasua.

⁸Go ega wo pakilina, naga te nalauna kite te namarakiana waina e pe wo karai magi Nebukadnessar nawota ni Babelon wanogoe suasua, go waina e pe wo karai doropusi nanoana etano ki nakau ni nanoa ki nawota ni Babelon, kinau a pe wo parati nalauna wanogoe ki lova, go ki navitoloana, go ki nasasanaana sa, Yehovah e noa e, pa pa aga wo mari puoli ki nia pae nam̃elearuna.

⁹Ma nimu, kuga ta daki dorogo paki profeta animu maga mau, kite paki tea kikita animu maga, kite paki tea p̃erea animu maga, kite paki tea vasapua animu maga, kite paki munuai animu maga mau, waina eu do pasa paki mu, doko do naga, Kuga wo da magi nawota ni Babelon suasua mau:

¹⁰Nalakena eu peanoasai nasorosoroana sikai paki mu, naga kuga wo pei tea viragiluaana m̃elu dua ki navanua animu paki uvea pano; go naga kinau aga wo kopasi lua mu pano, go naga kuga wo mate puoli.

¹¹Ma te nalauna waina ega wo mari nanoana ega wo doko etano ki nakau ni nanoa ki nawota ni Babelon, po maneana suasua, nalauna wanogoe aga wo doropusi a ega wo doko navanua aneana doko, Yehovah e noa e; go euga wo kili a, po doko asa doko.

¹²Go a pasa paki Sedekiah nawota ni Yudah pataka ni navasaana maga mamau puti wanogoe, po naga, Kuga mari nanoamu euga toko etano ki nakau nanoa ki nawota ni Babelon, po maneana suasua, go magi narei aneana, po mauri.

¹³Ekasana kuga wo mate ki lova, go ki navitoloana, go ki nasasanaana sa, nigo go narei anigo, dapala waina Yehovah e noa sua e nalo ni nalauna waina e pe wo karai magi nawota ni Babelon suasua?

¹⁴Go kuga ta daki dorogo mau paki navasaana maga ki profeta maga waina eu pasa paki mu, doko do naga, Kuga wo da magi nawota ni Babelon suasua mau: nalakena eu peanoasai nasorosoroana sikai paki mu.

¹⁵Nalakena kinau a da dip̃aki lua ra mau, Yehovah e noa e, ma eu do dum̃ada peanoasai sorosoro pae nagisagu; naga kinau aga kopasi lua mu pano, go naga kuga mate puoli, nimu ma profeta maga waina eu do peanoasai paki mu.

¹⁶Go a pasa paki tea viri maga go paki narei mamau puti waia, po naga, Yehovah e noa dapala nea, e naga, Kuga ta daki dorogo paki navasaana maga ki profeta animu maga mau, waina eu do peanoasai paki mu, doko do naga, Kuga leo, ega ta pei tuai go lasa maga ni nasum̃a ki Yehovah euga wo moro pei tea viragi‐liliua‐kiana m̃elu dua ki Babelon umai: nalakena eu do peanoasai nasorosoroana sikai paki mu.

¹⁷Kuga ta daki dorogo paki da mau; kuga magi nawota ni Babelon suasua, po mauri: ekasana natokoana waia ega wo pei maso maladi sikai?

¹⁸Ma eu pe vei profeta maga, go navasaana ki Yehovah e pe toko sikoti ra, euga mari navavaraniana paki Yehovah ki taua maga, naga lasa maga waina eu pei tea toropusiana doko ekopu ni nasum̃a ki Yehovah, go doko ekopu ni nasum̃a ki nawota ni Yudah, go doko Yerusalem, euga ta paki Babelon pano mau.

¹⁹Nalakena Yehovah ki taua maga e noa dapala nea nalo ni tea lawodu maga, go nalo ni lasa warua ni noai, go nalo ni laketano maga, go nalo ni namagovai ni lasa maga waina eu pei tea toropusiana doko natokoana waia doko,

²⁰Waina Nebukadnessar nawota ni Babelon e da dape lua ra pano mau, ragi waina e piragi lua pavakoto Yekoniah natu ni Yehoiakim, nawota ni Yudah, m̃elu dua ki Yerusalem paki Babelon pano, nara ma naatam̃oli vakilagi maga mamau puti ni Yudah go ni Yerusalem;

²¹Io, Yehovah ki taua maga, Sup̃e ki Israel, e noa dapala nea nalo ni lasa maga wanogoe waina eu pei tea toropusiana doko ekopu ni nasum̃a ki Yehovah, go doko ekopu ni nasum̃a ki nawota ni Yudah, go doko Yerusalem, e naga,

²²Euga wo pei tea viragi‐luapavakotoana paki Babelon pano, go euga wo doko tokora wanogoe doko pa pa paki naaleatia waina aga wo pa punusi ra, Yehovah e noa e; ragi wanogoe aga wo piragi liliua ki da sake umai, po doropusi ra euga wo moro doko tokora waia doko.