Read Nguna Togoa Etafe North YEREMIAH 28 Bible Online

YEREMIAH 28 - Nguna Togoa Etafe North bible

YEREMIAH 28

¹Go e pakilina natau sikai maau wanogoe, doko ragi ni naatulakeana ni namaramaraana ki Sedekiah nawota ni Yudah, doko natau kevati, atelagi kelima kakana, naga Hananiah natu ni profeta Assur, waina e pei tea ni Cibeon, e pasa paki nau doko ekopu ni nasum̃a ki Yehovah, narae ni tea viri maga go ni narei mamau puti, po naga, Yehovah ki taua maga,

²Sup̃e ki Israel, e noa dapala nea, e naga, A po mari kotovi nakau nanoa ki nawota ni Babelon.

³Natau mamau dua eroga wo da nopu go aga wo moro piragi liliua ki lasa maga mamau puti ni nasum̃a ki Yehovah umai paki tokora waia, waina Nebukadnessar nawota ni Babelon e dape lua ra m̃elu dua ki tokora waia pano, po piragi lua pavakoto ara paki Babelon pano:

⁴Go aga wo moro piragi liliua ki Yekoniah natu ni Yehoiakim, nawota ni Yudah umai paki tokora waia, nara ma tea viragi‐lua‐pavakotoana maga mamau puti ni Yudah, waina eu paki Babelon pano, Yehovah e noa e: nalakena aga wo mari kotovi nakau ni nanoa ki nawota ni Babelon.

⁵Go profeta Yeremiah e noa ki profeta Hananiah doko narae ni tea viri maga, go doko narae ni narei mamau puti waina eu lawodu doko ekopu ni nasum̃a ki Yehovah,

⁶Profeta wanogoe Yeremiah nogo, e naga, Amen: Yehovah ega mari dapala nogoe: Yehovah ega vakavuro navasaana anigo maga waina ku peanoasai a, naga ega moro dape liliua ki lasa maga ni nasum̃a ki Yehovah, go tea viragi‐lua‐pavakotoana maga mamau puti, m̃elu dua ki Babelon umai paki tokora waia.

⁷Ma p̃a rogo navasaana waia waina aga noa e nadaligam̃a, go nadaliga ni narei mamau puti:

⁸Profeta maga ni ragi ni tuai waina eu doko pea kinau go pea ki‐go, eu peanoasai nalo ni navakalo, go nalo ni navitoloana, go nalo ni nasasanaana sa, dip̃a navanua laapa, go dip̃a namarakiana warua maga.

⁹Nalo ni profeta waina e do peanoasai nalo ni natam̃ateana, ragi waina navasaana ki profeta wanogoe ega wo lolomana, profeta wanogoe ega wo pei tea ataeana naga Yehovah e dip̃aki lua e lomau.

¹⁰Go profeta Hananiah e dape lua nakau ni nanoa m̃elu dua ki nanoa ni profeta Yeremiah, po mari kotovi a.

¹¹Go Hananiah e pasa doko narae ni narei mamau puti, po naga, Yehovah e noa dapala nea, e naga, Natau mamau dua eroga wo da nopu mau, go ega tapala nogoe aga wo mari kotovi nakau ni nanoa ki Nebukadnessar nawota ni Babelon m̃elu dua ki nanoa ni nalauna maga mamau puti. Go profeta Yeremiah e pae napua aneana pano.

¹²Go edaku ki ragi waina profeta Hananiah e mari kotovi nakau ni nanoa m̃elu dua ki nanoa ni profeta Yeremiah, navasaana ki Yehovah e pakilina ki Yeremiah,

¹³po naga, P̃a vano, po noa ki Hananiah, p̃a naga, Yehovah e noa dapala nea, e naga, Ku po mari kotovi nakau ni nanoa ni nakau; ma p̃a wo madeada mari nakau ni nanoa ni airon.

¹⁴Nalakena Yehovah ki taua maga, Sup̃e ki Israel, e noa dapala nea, e naga, Kinau a doropusi nakau ni nanoa ni airon e doko nanoa ni nalauna maga mamau puti wanogoe, naga euga magi Nebukadnessar nawota ni Babelon suasua; go euga wo maneana suasua: go a moro dua e nalo tuavati maga ni vanua.

¹⁵Go profeta Yeremiah e noa ki profeta Hananiah, e naga, P̃a taki dorogo, Hananiah; Yehovah e da dip̃aki lua ko mau; ma ku mari narei waia eu pavatu nasorosoroana sikai.

¹⁶Nalakena tea wanogoe Yehovah e noa dapala nea, e naga, P̃a leo, aga wo mari puoli ki‐go m̃elu dua ki narae ni maramana: natau waia p̃a wo mate, nalakena ku pasa p̃auluulu dip̃a Yehovah.

¹⁷Go dapala nogoe profeta Hananiah e mate natau sikai maau wanogoe, doko atelagi kelarua kakana.